Osée 2 - UNIMBƆTI NYƆƆBUNDI GBƆŊKU

Jisirayeel wiŋkpaaŋŋu dal

¹ Ama Isirayeel yab làá dāá nīn wīikí kii tiŋku gbandi bul din baa ŋūǹ kí ŋmàntāaa, kaa ŋūǹ kí kàaǹee ní. Laakin ní Unimbɔti nìn tùkū-bi yii: «Naa ti sá m-nibulee», niin ubaanti ní u làá dāá yíiń-bi yii: «Dimaŋfal Nimbɔtiu biyaamu.»

² Juuda beel yab nì Isirayeel beel yab làá dāá fàtīí ŋá ubaanti. Bi làá dāá lēē ubɔtibaanti ú nīn kpòotī-bi, ní bí dāá bùtī kí gbí bi-tiŋki kɔkɔ. Di sá yii an dāa sá Jisirayeel wiŋkpaaŋŋu dal ní.

³ Ní yíiń ni-mambi nì ni-naalib yii «M-nibul» ní kí yíiń ni-niisalib yii «Bi là-mi».

Isirayeel, unimpu un nyáń u-cal boonee

⁴ Ní yíiń ni-na ibeeyiin, ní yíiń-u tibuul. Di sá yii waa ti sá m-nimpuu ní ma mun kaa ti sá u-cal. Ú lēē u-laakpaatuuŋŋi daanti u-nimbiin kí fá, ní kí lēē u-laakpaati daanti u-biiŋi kansikin!

⁵ An yaa kaa sá mimmee, m làá lòotī-u dicancaŋgbeel, ú gítí kii u nín nìn bí pu ŋwiin ŋun bi màl̄-uee. M làá yàntī u-tiŋki ń kpántí kii kuteeuee, ní kí dū-kì kí kpántí kitiŋkuliŋŋi. M làá yàntī nnyinnyoo ń kpɔ̀-u.

⁶ Maa làá nīn là u-biyaamu bɔti, di sá yii u ŋá tilaakpaal ní ki màl̄-mu.

⁷ Tiŋman, mu-na dū u-ba ki líì nì alaakpaatuun. Un di màl̄-muee ŋá ticoobɔti. Di sá u lī yii: «M làá nóó m-bɔmbi bin tìì-mi m-jinti nì m-nyɔkaati, nì ipii kuti nì gulfamɔnti wampeeŋkaati nì m-kpam nì m-daamee.»

⁸ «An pu ní m làá dū ikuŋkum kí pìin̄-u nsan, ní kí mā digundi kí màntīí tū-u ú taa ti ká nsan kí nyā.

⁹ U làá dāá jà u-bɔmbi boon, ama waa làá dāá ŋmā kí cúú-bi. U làá dāá nyàab̀-bi, ama kaa làá dāá ká-bi. Niinee ní ú dāá lì yii: <M làá fàtīí gítí m-taafaacal cee, di sá yii m nín nìn bí u-ceeyee, m nìn bí mmɔnni ki jítiǹ kɔŋkɔnnee.>

¹⁰ «Waa nìn béè yii an sá man di nìn tìì-u bilee nì ndaam nì ŋkpam. Man di nìn tìì-u animbil nì sindaariya, ama ní u dūu ŋá saraabi ki tīī diwaal Baal.

¹¹ An puee bilee yuntiŋu yaa láa bàn̄ee, m làá dāá fàtīí yòon̄ m-wanti, ní ndapɔm mun yuntiŋu yaa láa bàn̄ee, ḿ dāá fàtīí tí yòon̄ m-daam. M làá dāá bìitī m-pikuti nì m-gulifau wampeeŋkaati tin bīī u-cooi puee.

¹² Tiŋman, m làá dāá bìitī u-cooi pu kí dàkà u-bɔmbi, ní báà ubɔ mun dāa kpá kí fōō-u m-ŋaan.

¹³ M làá dāá kúntí u-faalii, nì u-jiŋaalib nì u-jiŋaalib bin u jīǹ uŋmapɔɔn yaa páaǹee, nì u-wiŋŋuŋfikaai nì u-jiŋaalib bin kɔkɔ pée kíǹ u jīǹee.

¹⁴ M làá dāá bīil̀ u-fiinyi nì u-fiigi sufii in pu u nìn lì yii: <Kpèè m-bɔmbi nín pàn̄-mi tipaal tiŋyee sèé.> M làá yàntī an kpántí kupɔɔu ní ipeel ń dūú kpántí i-jinti.

¹⁵ M làá dáaĺ u-tafal ŋyunti ŋun u dūu nóó diwaal Baalee pu. U nìn tùutī talaalub ki ŋáań saraabi. U nìn cáá abɔmbil nì tiléeŋkaal ki nyāantí u-ba. U nìn sáń ki pá u-bɔmbi boon, ki nìn súntì man pu! Ti-Dindaan di sòon̄ míǹ.

¹⁶ An pu ní m làá gíiǹní u-landɔkɔŋu m-cee. M làá cáá-u kí cùnnì kuteeun ní kí sòoǹ án kɔ́ u-pɔbilin.

¹⁷ M làá dāá fàtīí gíiǹ u-fiinyikpaaŋŋi kí tīī-u niin, ní kí dāá yàntī Akɔɔr tantakal ń kpántí dimákal punyɔkɔki. Niinee u làá dāá tí táá-mi kii ŋyunti ŋun u nìn dáá sá usapɔɔnee, a lì kii ŋwiin ŋun u nìn nyáń Eejipiti tiŋkinee.»

Dimɔɔkil wiiŋŋu

¹⁸ «Ti-Dindaan di sòon̄ yii ŋwiin gbantee u làá dāá yíiń-mi yii <m-cal> ní kaa làá ti yíiń-mi yii <m-waal Baal, an dàkà yii m-kpiliu>.

¹⁹ M làá lēē awaa Baal yindi u-nyɔkɔn, ní ubɔ gíti kpá kí téetí diyindi gbanti pu.

²⁰ Yaadalee, m-nibul puee, m làá dāá pòon̄ kí ŋá mpèé nì ipeel nì inoon nì tin fù ti-pooŋi puee. M làá dāá kúntí butɔbu nì kitàataajiki nì kujaau, kitiŋ nee poon. M làá dāá yàntī bin kóò kitiŋ nee puee ń gèeǹ nì ŋgbansɔŋfi.

²¹ M làá dāá mɔ̀nnì-si kí cáá-si kí nīn cáa cá jaanjaan. M làá dāá dū ibaamɔn nì tin bí deedeeyee nì dineendi nì disaasɔl kí pà a-cootiiku pu.

²² M làá dāá dū deedee ní kí pà a-cootiiku pu, ní á béé yii m sá a-Dindaan.

²³ Ti-Dindaan nín lī puee sɔ̀. Ŋwiin gbantee, m làá dāá nīn sá Unimbɔti un fòol̄ ŋwimmeemee. M làá dāá tīī kutagbɔŋu kun ku nyàab̀ m-ceeyee, ní kutagbɔŋu mun ń dāá tīī kitiŋ ntaanyim min kì nyàab̀ ku-ceeyee.

²⁴ Ní kitiŋ ń yàntī bilee nì fiinyi nì fiigi ń lòoǹ tiŋan Jisirayeel tantakalin.

²⁵ Man làá dāá yàaǹ iwambool kitiŋ nee pu. M làá dāá nīn néeń 'Baa là-mi' ní kí dāá tùkù 'Naa sá m-nibul' yii: <A sá m-nibul>, ní úǹ ń dāá kíí-mi yii: <M-Nimbɔtiu.>»