Osée 14 - UNIMBƆTI NYƆƆBUNDI GBƆŊKU1 Samaarii yab fōō dibɔkpil ní ki máaǹ ditafadaaldi, kun puee bi jáń nì man bi-Nimbɔtiu. Kujaaun ní bi làá tin kpúnní, ní bí tāā kí mátí bi-bipɔmmu ní kí pùtī bi-pɔdambi. Dibakpántil nì dimaŋfapɔndi 2 Isirayeel, fàtīí gítiń ti-Dindaan a-Nimbɔtiu cee, di sá yii a-kpitii di yāntì a gbéetì ki lítì. 3 Gítiḿmaan ti-Dindaan cee kí kpáaǹ anyɔɔbun nee kí tin tùkù-u yii: «Dū ti-kpitii kí pɔ̄-ti, ní kí fōō tin ŋān̄ ti cáa ŋáań-si saraayee. An nín bàà sá tí dū anabil kí ŋá-si saraayee, ti làá dū ti-nyɔmmu poon nyɔɔbuŋŋi ní kí ŋá-si saraa. 4 Asuur tiŋki kaa ŋūǹ kí fīī-ti. Taa làá ti máĺ kí kàl̄ kujaau taamui pu. Ti-waaŋi sá tiwan tin ti dū ti-ŋalii ki kpítèe ní. Taa làá ti tùkù-ŋi yii ŋi sá ti-Nimbɔtiu, di sá yii sii baba di dàkà ditaŋkpiibil kulaŋŋaŋfitiiu.» 5 Ti-Dindaan bí yii: «M làá cáaǹ Isirayeel u nín kaa yúl̀ nì mi deedeeyee pu. M làá nīn néeń-u nì dipɔbil diba, di sá yii diŋuul din m gíí u-puee sɔ̄ŋkì. 6 M làá nīn bí kii dimalindee ní ki tīī Isirayeel. U làá púkuḿ kii nsupumpukumee ní kí báań inyaan kii Leebanɔn tiŋkin isufi in bi yíì Seediree. 7 U làá dāá tɔ̄ apan kí làlim̀ ní kí nīn cáá kunyaaŋŋu kii ɔliifi subuee, ní kí nīn sɔ́fì kii Leebanɔn satin sufiiyee. 8 Bin nìn kóò u-booŋŋu taapuee làá dāá fàtīí gítiń. Bi làá dāá kpɔ̀ bilee kpaaŋŋi. Bi làá dāá púkuḿ kii fiinyi subuee, ní kí dāá nyā diyindi kii Leebanɔn daamee. 9 Eefiraayiim, mpèé ŋulɔŋu di bí man nì awaa kansikin ní? Man di fòol̄ a-wimmeem ní ki wúǹ a-pu. M sá kii siipreesi susɔmbuee ní, man di yì-tì ní a-kpaajinti lòoǹ.» 10 Un cáá dinyilee làá gbìl̄ tibɔti nee taapu. Un cáá iciinee làá béé-tì? Tiŋman, ti-Dindaan saŋyi tèen̄ ní. Deedeedambi di dìŋfī-i, ama pɔɔgaatib yaa dī-iee, see bí gbéetí kí lítí. |
BIBLE EN N'TCHAM (Bassar) © Alliance Biblique du Togo, 2013.
Bible Society of Togo