Osée 10 - UNIMBƆTI NYƆƆBUNDI GBƆŊKU

Isirayeel yab beel kúntitam

¹ Isirayeel beel nìn sá bufiinyisubu bun nìn lòoǹ abil tikpilee ní. U yaa nìn lòon̄ abil tikpilee, míǹ ní u nìn māā isaraafan mun tikpil. An yaa nìn bútì u-tiŋkee, míǹ ní u nìn nyāantí u-taŋkpacooŋkaaŋi.

² Isirayeel yab sá milimilidambi ní. Too, ŋyunti bāań bí fōō bi-kpitii paati. Ti-Dindaan u-ba di làá wìil̀ bi-saraafaŋyi, ní kí kpēelikì bi-taŋkpacooŋkaaŋi.

³ Bi bí ki lì kɔŋkɔnnee yii: «Taa cáá ubɔti, di sá yii taa fāŋkì ti-Dindaan. Báà ti yaa cáá ubɔti, ba ní u ŋūǹ kí ŋá kí tīī-ti?»

⁴ Bi sòoǹ tikpil, ki pùtī fám, bi nì binib ŋáań mpèé, ama bi-baamɔŋyi bí kii ujil nín nyēē adan pu bukpaan puee ní.

⁵ Samaarii yab fàŋkí tin làá bàń Beeti-Aween nabil puee. Dinabilee nibul nì di-saraaŋaliibi bíi ŋáań di-kpool. Bi nìn fàal̀ di-nyaaŋku pu, too, bi yōoǹ-dì ki cáa búntì.

⁶ Bi làá yòon̄ dinabilee kí cáá cùnnì Asuur tiŋkin kí pɔ̄ kitiŋ gbanti bɔtikpaaŋwu. Icoo làá dāá cúú Eefiraayiim yab, tiŋman, icoo làá dāá cúú Isirayeel beel yab tin bi bɔ́ntì kí ŋée pu.

⁷ An dóò Samaarii yab pu dee. Bi-bɔtiu sá kii didɔjal din dēē nnyim puee ní.

⁸ Bi làá dāá kpìtī Aween saraaŋapaaŋyi, íǹ in pu Isirayeel yab nìn ŋáań ikpitee. Abɔjanaakun nì ikuŋkum làá dāá nyā kí múkuǹ i-saraafaŋyi pu. Samaarii yab làá dāá tùkù ajoon yii: «Bìim̄maan ti-pu!» ní kí dāá lì ŋgbantamu yii: «Lítímaan ti-pu!»

⁹ Doooo Giibeeya ní Isirayeel yab yīntiǹ-mi, ní doooo nee, baa kpántì bi-ba. An pu ní bi làá já nì bíǹ binikpitib gbanti Giibeeya jool pu.

¹⁰ Ti-Dindaan lī yii: «M làá dáaĺ bi-tafal. Atimbun làá dāá kpāfì kí já nì bi kí dáaĺ bi-tafal ikpiti in bi ŋáań kaa gbèentée pu.

¹¹ «Eefiraayiim nìn sá kii dinabil din nìn néeń ki tà ki gbátí adibilee ní. Ŋyunti ŋun m ká u-sil nyaaŋkuee, ní m kpàl̄-u ú nīn kù tikpaal. Juuda làá nīn dátí akoo ŋin cátí adanee ní Isirayeel ń nīn dátí akoo ŋin kpátée.

¹² Bɔ̄l̀maan tin bí deedeeyee kí dāá cā tiniti. Ní bēel̀maan kusapɔŋu, di sá yii ŋyunti bāań ní nyàab̀ man ni-Dindaan kí nīn cí ŋyunti ŋun ní m làá dāan̄ kí dū tin bí deedeeyee kí yàaǹ ni-puee.

¹³ Ama ní ni búĺ tikpitil ní ki bíi cēē ikpiti. Ni ŋmɔ́ disubil din ni-nyimɔŋyi lòon̄ee. «Di sá yii ni nìn máká ni-ba pɔŋŋu nì ni-janjaliibi wíiŋŋu pu.

¹⁴ An pu ní kujaau làá pōō ni-nibul kansikin, ní bí dāá nàan̄ ni-timmu mun bi máń agun ki túee kɔkɔ. Ŋi làá dāá kpántí kii Beeti Arbeel tiŋkee ní. Ubɔti Calman nín nìn jáń nì kitiŋ gbantee, u nìn kūū bibinaatiibi ki kpáaǹ bi-biyaamu ní.

¹⁵ Kun ni ŋá Beeteelee nín cáań-ni kuŋyee dee, di sá yii ni-kpitii gíti jítì mara pu. Kutaa tin lì yii ku wúntée, an dóò Isirayeel bɔtiu pu dee.»