Nombres 5 - UNIMBƆTI NYƆƆBUNDI GBƆŊKU

Bí nyāntí bin kaa bí circiree dinaapaalin

¹ Ti-Dindaan bí Mooyiisi yii:

² «Á tīī Isirayeel yab mara yii bí nyāntí binyaŋgbantiibi kɔkɔ nì bin kɔkɔ cáá batikuee nì bin di yaa gbēē dinikpilee dinaapaalin.

³ Udaan yaa sá uninjeeee, unimpueeee, ní nyāntí-u ŋkpaanceeti, án nín làá ŋá pu ú taa kɔ́ǹ Isirayeel yab naapaal din poon m kóòyee tijɔkɔndee.»

⁴ Ní Isirayeel yab ŋá kii ti-Dindaan nín tùkū Mooyiisi yii bí ŋá puee. Bi nìn jìn̄ an nibee kɔkɔ ki nyántì dinaapaalin.

Ubɔ yaa yùn̄ u-juti wantee ú téeǹ

⁵ Ní ti-Dindaan bí Mooyiisi

⁶ ń tùkù Isirayeel yab yii: «Uninja kii unimpu ubɔ di yaa ŋá u-juti ikpiti, báà in ní an yaa pée sée, man ni-Dindaan ní u yīntiǹ, udaan fōō dibɔkpil.

⁷ Udaan ń bìitī ikpiti in u ŋée pu, kí téeǹ tiwan daan tin u mūul̀ee, ní kí gíti nyàab̀ tiwan gbanti yaa yākatì miŋmoo puee diba pu kí kūtì kí tīī tiwan daan.

⁸ Un bi mūul̀ee yaa kpíì kaa cáá kinabiki kin cáá nsan kí fōō u-wantee, bí dū tiwanee kí tīī ti-Dindaan, an dàkà yii usaraaŋal. Dibɔkpil daan ń gíti nyàab̀ upìja bí dūú ŋá dibɔkpil saraau kí fíntí u-kpitii.

⁹ Tin kɔkɔ Isirayeel yab yaa lēē bi-saraabi poon ki sú ti-Dindaanee, usaraaŋal un bi cáań ki tīīyee di yì.

¹⁰ Tin kamaa unil yaa dūu sú ti-Dindaanee, ú cáań kí tīī usaraaŋal. Tin kamaa unil yaa dūu tīī usaraaŋalee, usaraaŋal di yì.»

Unimpu un nyáń u-cal boonee bɔti

¹¹ Ti-Dindaan bí Mooyiisi

¹² ń tùkù Isirayeel yab yii: «Tí lì yii ubɔ nimpuu ŋá min kaa ŋān̄ee ki nyáń u-boon,

¹³ ki bíil̀ u-ba ki yāntì uninja ubɔ dōoǹ nì u dibalin ní u-cal kaa nyí ní ubɔ kaa cúú-uaaa, kaa ká kí lēē mmɔ́ɔn yii an sá tiŋman,

¹⁴ ama ní u-cal dàkafī yii u nyáń u-boon ní ki díkí u-pu. An ŋūǹ kí nīn tí sá yii u-cal landɔkɔŋu di sá yii u nyáń u-boon ní an mun kaa sá míǹ.

¹⁵ An yaa bí mimmee, uninjee ń yòon̄ u-nimpuu kí cùnnì usaraaŋal cee, nì ɔɔji yim kiiloobi bita kí ŋá saraa. Ú taa dū ŋkpam kí sìtī ŋyimee pu kí taa ŋá talaalutuukaa, kun puee an sá ipoompoon saraau, saraa un di nyāntí ikpiti mpaampiin puee ní.

¹⁶ Usaraaŋal ń yòon̄ unimpuee kí cùnnì circir kɔŋkooŋŋun ú yūĺ ti-Dindaan nimbiin.

¹⁷ Usaraaŋal ń jōō circir nyim kisampeei ní kí jáfí circir kɔŋkooŋŋu poon tam kí dūú ŋá nnyimee poon.

¹⁸ Usaraaŋal ń yàntī unimpuee ń nīn yú ti-Dindaan nimbiin ní ú cúú unimpuee yikpiti kí bútí an nīn bí fìkil fikil, ní kí dū saraa un nyāntí ikpiti mpaampiin puee, an dàkà yii ipoompoon saraauee kí ŋúbíǹ-u, ní usaraaŋal ń nīn ŋúb́ u-ba nnyim min tū ki cāabìń mbusuee.

¹⁹ Usaraaŋal ń yàntī unimpuee ń pùtī ní ú bí-u yii: <Uninja ubɔ fám yaa kaa dōoǹ nì si, a yaa kaa nyáń a-cal boon ki kɔ́ǹ a-ba tijɔkɔndee, nnyim min tū ki cāabìń mbusu nee ń taa ŋá-si tiba.

²⁰ Ama a yaa nyáń a-cal boon uninja ubɔ fám dōoǹ nì si, a bíil̀ a-ba ní ki mɔ́ntì a-calee,

²¹ ti-Dindaan ń dáaĺ a-tafal, kí yàntī á kpántí uŋmaŋŋmanti a-pool ń díkí, án nín làá ŋá pu ní a-nibul yab yaa làá pùtēe, bí nīn cáá sii bɔti ní ki ŋmàntī ki pùtēe.

²² Nnyim min cāabìń mbusuee ń kɔ́ a-poon a-pool ń díkí á kpántí uŋmaŋŋmanti.> Ní unimpuee ń kíí yii: <Ameeni, án ŋá míǹ!>

²³ «Ní usaraaŋal ń ŋmà mbusu bɔti tin u sòon̄ ki pūtèe kugbɔŋu pu ní kí dūú bɔ̄ nnyim min tūee poon án fíntí tiŋmaŋmabitee.

²⁴ Ú dū nnyimee kí tīī unimpuee ú nyɔ̀ án kɔ́ u-poon kí tūŋkì.

²⁵ Usaraaŋal ń fōō ipoompoon saraauee unimpuee ŋaan, kí fíiǹ fíiǹ ti-Dindaan nimbiin ní kí cáań nsaraafan pu.

²⁶ Usaraaŋal ń yáfí saraa yimee diŋaŋkul án nīn sá kudaaŋŋu ti-Dindaan nimbiin yii úǹ di yì saraa gbanti, ní kí cáá wà ŋŋmi nsaraafan pu. Míǹ boonee ní ú dū nnyimee kí tīī unimpuee ú nyɔ̀.

²⁷ U yaa nyūntì unimpuee míǹ ní u yaa lafun nyáń u-cal boon ki ŋá tijɔkɔndee, nnyim min cāabìń mbusuee làá kɔ́ u-poon ní kí tūŋkì ní ú díkí kí kpántí uŋmaŋŋmanti. Ŋyunti gbantee, u-nibul yab yaa làá tí pùtēe, bi làá nīn kíǹ ki cáá u-bɔti ní ki ŋmàntī ki pùtī.

²⁸ Ama unimpuee yaa kaa nyáń u-cal boon ní ki sá un kaa ŋá tijɔkɔndee, tiba kaa làá ŋá-u, u làá nīn gbíntìi màal̀ u-biyaamu ní.

²⁹ «Uninja un yaa dākafì u-nimpuu pu yii u nyáń u-boon ki ŋá tijɔkɔndee poompooŋyi saraau marau dee.

³⁰ An yaa tí sá yii uninja di dākafì yii an bí kii u-nimpuu nyáń u-boonee, uninjee ń cáá u-nimpuu u-saraaŋal cee ti-Dindaan nimbiin ú ŋá kii mara nee nín pée sá puee deedee.

³¹ Niinee baa pée cáá tiba kí ŋá uninja, ama an yaa cúú unimpuee, u làá túń u-kpitii.»