Néhémie 9 - UNIMBƆTI NYƆƆBUNDI GBƆŊKU

Isirayeel yab mēē bi-kpitii pɔ̄tam pu

¹ Uŋmabaanti gbanti poon iwiin mmuŋku nì inaa dal ní Isirayeel yab dū kutukub ki pēeǹ, ki dū ntam ki pùkū bi-yiliŋ ní ki kpáfì ki bóob́ kinyɔkɔ.

² Bin nìn sá Isirayeel yabee nìn gāntì bi-ba nì bin kaa sée ní ki yúl̀ ki bīitì bi-kpitii nì bi-naanjab yìntitam pu.

³ Bi nìn yíkìi yúl̀. Báà ŋma yú u-paaŋŋu pu mimmee, ní bi kàan̄ ti-Dindaan bi-Nimbɔtiu marau gbɔŋku áli tikúti tita. Bi nìn dū tikúti tita mun ki gbāaǹ ti-Dindaan bi-Nimbɔtiu nimbiin ki bīitì bi-kpitii pu.

⁴ Leefii yab kɔl puee, Yeesuwa nì Banii nì Kaadimiyeel nì Seebaniya nì Bunii nì Seereebiya nì Banii nì Keenanii nìn yíkì ki mēē ti-Dindaan bi-Nimbɔtiu mpɔn.

⁵ Leefii yab Yeesuwa nì Kaadimiyeel nì Banii nì Asabineeya nì Seereebiya nì Oodiya nì Seebaniya nì Peetaya nìn téeń mpɔn yii: «Yīkìmaan! Nyɔ̄ŋkìmaan ti-Dindaan ni-Nimbɔtiu, nyɔ̄ŋkìmaan-u ŋyunti kamaa!» «Ti-Dindaan, báà ŋma ń nyɔ̄ŋkì a-yindi din cáá tinyoolee! A sá ukpaan ki jítiǹ ijaam nì inyɔŋki in ŋūǹ kí nyā unil nyɔkɔnee.

Neeyeemiya mēē samaa nimbiin

⁶ Sii baba di sá ti-Dindaan! Sii di náań yilpu, yilpu fɔ́ŋŋŋ nì iŋmalbijaa kɔkɔ. Sii di náań tiŋkub nì tin kɔkɔ bí bi-poonee. Sii di tīī tin kɔkɔ pée bée kufoou, ní iŋmalbijaa gbàantí a-nimbiin.

⁷ Sii ti-Dindaan Unimbɔti di lēē Abram. Sii di nyántìń-u Uur, Kaaldee yab tiŋkin ní ki pú-u diyindi yii Abraam.

⁸ A ká yii u yú nì si deedee nì dipɔbil diba, ní a pūtì ki pōoǹ-u yii a làá dū Kanaan yab nì Eeti yab nì Amɔɔr yab nì Peeriisi yab nì Jeebusi yab nì Giirgaasi yab timmu kí tīī u-naantiibi. A lafun ŋá míǹ, kun puee a sá deedeedaan.

⁹ «A nìn ká falaa un poon ní ti-naanjab nìn bí Eejipiti tiŋkinee, ki nìn gbìl̄ bi nín nìn yúl̀ Tikati mɔɔl gbandi ki kúuǹ ki yíiń-si á dāá jòoń-bee.

¹⁰ A nìn ŋá maamaaci daanti nì atuŋkpaan ki dàkā Faaroo nì u-kàliŋkpilib nì u-tiŋki kɔkɔ nib, kun puee a nìn nyí bi nín nìn sāaǹ ti-naanjab dilambil poon puee. Míǹ pu ní a nìn nyáń diyiŋkpaandi, di bí ki dāa sāā díǹ.

¹¹ A nìn búkutì tiŋku nyim mili ti-naanjab nimbiin ní bi dūtì ŋkulimmi. A nìn téé bin nìn jìń-bee ki tɔ́ nnyimin, ní bi múĺ taapu taapu kii ditaŋkpalee.

¹² A nìn yāntì ditagbancancaal kpòotī a-nibul ŋwiimpu, ní kunyeeuee ditagbancancaalee kpántí ŋŋmi ki ŋmíntí nsan ŋun pu bi nìn còom̄ee.

¹³ A nìn kpákatìń Siinaayi jool pu ki sòon̄ní-bi doooo yilpu. A nìn tīī-bi abɔkpaa ŋin tèen̄ee, a-dàkatam min sá ibaamɔnee nì akoobil nì marab bin sá bimɔntiibee.

¹⁴ A nìn dī a-tɔntɔnliu Mooyiisi pu ki yāntì bi béè ŋwiŋŋuŋfikaa ŋun bi dūu sú-see. A nìn dàkā-bi marab nì akoobil nì a-dàkatam.

¹⁵ A nìn yāntì tijin nyánní yilpu bi jíń ki díkí, ki nìn yāntì nnyim nyáń ditaŋkpakpaandin bi nyùn̄ nnyinnyoo kpíì. A nìn bí-bi yii bí nīn cá kí fōō kitiŋ kin a pūtì ki pōoǹ yii a làá tīī-bee.

¹⁶ «Ama bíǹ ti-naanjab nìn yōoǹ bi-ba yilpu. Bi nìn pɔ́ɔkì bi-pɔbiliŋ ní kaa nìn tɔ́ a-marab.

¹⁷ Bi nìn yíì kaa pílifiǹ-si. Bi nìn súntì maamaaci tuŋkpaaŋŋi ŋin a nìn ŋá ki tīī-bee pu. Bi nìn pɔ́ɔkì bi-pɔbiliŋ ní ki nìn ká nlandɔkɔ kí fàtīí gítí Eejipiti tiŋkin, laakin bi nìn bí kuyuŋunee. Ama sii sá Unimbɔti un pūǹ ikpitee ní. A-poon mɔ̄ ní a sá ulaŋŋaŋfiti. Aa fòol̄ diŋuul malaa, ní a-ŋanti wīikí tikpilku. Aa nìn dū-bi ki fá,

¹⁸ ki kpáaǹ gba ŋyunti ŋun bi nìn dūntì tikúti ki dūu mɔ́ɔ́ dinabil ki bí yii: <Kpèè a-Nimbɔtiu un nyántìń-si Eejipiti tiŋkinee sèéyee,> bi nìn ŋá-si ikpitikpaan.

¹⁹ Ama sii poon nín mɔ̄ee puee, aa nìn dū-bi ki fá kuteeun. Ditagbancancaal din nìn dàkà-bi nsan ŋwiimpuee kaa nìn kākatì ki wāatì-bi, ní ditagbancancaal din nìn kpántí ŋŋmi kunyeeu ki ŋmíntí nsan ŋun bi nìn còom̄ee mun nìn gbíntìi bí ki ŋmíntí-bi.

²⁰ A nìn tīī-bi a-fammɔntiim bí nīn nyí ki gàntī. Aa nìn ŋmīntì-bi maana bí dūú kpíiǹ bi-ba, kaa nìn tí ŋmīntì-bi nnyim bí dūú kpɔ̀ nnyinnyoo.

²¹ Abin imuŋku ili ŋin bi nìn ŋá kuteeunee, baa tiba kaa nìn lóò-bi. Bi-wampeeŋkaati kaa nìn cátàaa, bi-taaŋi mun kaa nìn díkí.

²² «A nìn dū abee nì anibul ki ŋá bi-ŋaan. A nìn yāntì bi jáń ki pɔ́ɔkiǹ ntimu mun nì bi nìn cáá ŋkpaanyɔmuee, an dàkà yii Eesbɔn bɔtiu Siiwɔn tiŋki nì Baasan bɔtiu Ɔɔgi tiŋki.

²³ A nìn yāntì bi-naantiibi būtì kii iŋmalbijaa in bí kutaa puee ní ki cáá-bi ki kɔ́ǹ kitiŋ kin poon a nìn bí bi-naanjab yii bí cùú fōō án kpántí bi-tiŋkee.

²⁴ Bi-naantiibi gbanti nìn cūtì ki fōō-kì kì kpántì bi-tiŋki. A nìn yāntì Kanaan yab nìn sīntì bi-ba taapu ki tīī-bi ní ki nìn dū-bi ki ŋá bi-ŋaan, bi nì bi-bɔtiibi nì bi-samaau. Ti-naanjab nìn ŋá-bi bi nín là puee.

²⁵ Bi nìn fōō ntimu mun bi nìn máń agun ki māntìi túee nì tikpaatan tin cáá ntiŋkpamee. Bi nìn fōō adiin ŋin poon tigaajati gbée, nì lɔkɔb bin baa gbìn̄ee, nì fiinyi nì ɔliifi sufii nì isufi in lòoǹ asubiŋmɔkaayee tikpil. A-ŋanti puee, bi nìn jíń ki bál̀ bi nín là puee, bi nìn jíń ki díkí, ki nɔ́ĺ ní ki nìn kíǹ ki bí nnaam poon.

²⁶ «Ama nì míǹ kɔkɔee, bi nìn yíkì kaa kíí bi-ba pu, ki nìn jáń nì si ní ki fātì bi-boon ki tīī a-marab. Bi nìn kūū a-bɔnaatiliibi bin nìn bí ki sáŋkí-bi yii bí gítiń a-ceeyee. Bi nìn ŋá-si ikpitikpaan.

²⁷ An puee a nìn dū-bi ki líiǹ bi-nannanliibi bi jáń ki pɔ́ɔkiǹ-bi. Bi-nimbinaamandi poonee, bi nìn fáá mbiil yii á jòoń-bi, ní a kāl̀ doooo yilpu ki gbìl̄. A-neeŋkpaandi puee, a nìn tīiń-bi binib bin nìn nyāntí-bi bi-nannanliibi ŋaanee.

²⁸ Ama bi yaa nìn fīī-bi míǹ bi-wunti sɔ̄ŋkèe, ní bí fàtīí kíĺ ki bíi ŋáań-si ikpiti, ní á fàtīí tí dū-bi ki líiǹ bi-nannanliibi. Niinee ní bí tí fáá mbiil yii á jòoń-bi ní á kàl̄ yilpu kí gbìl̄. A-neeŋkpaandi puee, a nìn fīī-bi míǹ ki líí ŋfunyɔm tikpil.

²⁹ A nìn kpáafì-bi bí gítiń kí nóó a-marab, ama bi nìn ŋá dilambil kaa tɔ́ a-marab. Bi nìn yīntiǹ abɔkpaa ŋin unil máaǹ kí nóó kí ŋmátée. Bi nìn pɔ́ɔkì bi-pɔbiliŋ ki kpáá bi-tafaliŋ kaa nìn pée là kí gbìl̄ tiba.

³⁰ «A nìn dū abin kupaau ki jíń kimɔtii bi-pu. A nìn tīī a-bɔnaatiliibi a-Fam bi kpáafì-bi, ama baa nìn pílifì. An puee a nìn dū-bi ki líiǹ ntincamu nib.

³¹ Nì míǹ kɔkɔ, a-neeŋkpaandi puee, aa nìn yāntì bi nāaǹ-bi kɔkɔ, kaa nìn dū-bi ki fá, kun puee a sá Unimbɔti un poon mɔ̄ ki cáá kulaŋŋaŋfitiiuee ní.

³² «Kɔŋkɔnnee ti-Nimbɔtiu, Unimbɔti un sá ukpaan, ki cáá mpɔn, ki sá kuwambiiuee, sii un di ŋúb́ ipoon in a pūtì ki pōoǹ-tee nì deedeeyee, taa lì yii kí yòon̄ Asuur yab bɔtiibi yuntiŋu ki cáa sāā ti-yuntiŋu nee, falaa un ti nì ti-bɔtiibi nì ti-kpootiliibi nì ti-saraaŋaliibi nì ti-bɔnaatiliibi nì ti-naanjab nì a-nibul kɔkɔ jíńee kaa ká-si.

³³ Tin kɔkɔ bāań-ti nee, a ŋá-tì deedee nì mbaamɔn ní, ama ní timbi ŋá tin kaa kítèe.

³⁴ Ti-bɔtiibi nì ti-kpootiliibi nì ti-saraaŋaliibi nì ti-naanjab kaa nìn dū a-dàkatam ki túń ditundi, kaa nìn fātìi tɔ́ a-marab nì a-bɔti tin a nìn dūu kpáafì-bee.

³⁵ Bíǹ bin nìn kā bi-beelin, ki cáá tiwammɔntiil tin kɔkɔ a nìn tīī-bee, nì kitiŋ kin wāā ki cáá ntiŋkpam a nìn cáá-bi ki kɔ́ǹ poonee, baa nìn nóó-si, kaa nìn fātì bi-boon ki tīī bi-tuŋkpitiŋ.

³⁶ Díǹ pu nee, ti kpántì iyumbu! Ti kpántì iyumbu kitiŋ kin a nìn dūu tīī ti-naanjab bí jī tiwammɔntiil tin kɔkɔ kì lòoǹee poon.

³⁷ Ti-kpitii puee, bin a kāaǹ bí nīn sá ti-bɔtiibee di yì tijimmɔntiil tin kitiŋ gbanti lòoǹ tikpilee. Bíǹ di yì timbi ti-ba nì ti-waŋkuti ki ŋáań min bi lèe. Ti bí kunimbaakpaaŋŋu poon ní!»