Nahoum 3 - UNIMBƆTI NYƆƆBUNDI GBƆŊKU

Bi pɔ̄fì nnikpaakoon tiŋki Niiniifi yab

¹ Mbusu dɔ̄ ki cí Niiniifi tiŋki kin poon nnikpaakoon bée! Dimuuldi nì tipɔmbɔti di gbí ki-poon. Bi pée fúkuĺ binib ní kaa gbèentí.

² Pīlifìmaan! Anaalab di nìiǹnée! Tɔrɔkub taaŋi di wàkalìńee! Itaamu di tòó càlib calibee! Kujaau tɔrɔkub di jàkànée!

³ Bitanjakaliibi dū bi-ba ki bílìń! Ntàataajimu di ŋmóò làka lakee! Ŋkpamu di jìl̀ pàlpalee! Bitaŋkpiibi dɔ̄ an kɔkɔ fìlfilfil! Anikpil dɔ̄ akpuku akpuku! Baa ti ŋūǹ kí kàaǹ-ŋi gba! Binib kíǹ ki gbéetí-ŋi ní.

Icoo cúú Niiniifi tiŋki

⁴ Niiniifi tiŋki ŋá alaakpaatuun ŋfunyɔm kutuku kutuku pu. Kì nìn ŋān̄ ki bí gbàlgbalgbal, ní ki nìn sàtī binib. Kì nìn cáá ki-laakpaati ki cútí atimbun tikpil kuyuŋu, ní kì nìn cáá ki-nyɔkɔŋu ki sàtī anibul.

⁵ Ti-Dindaan Mpɔŋkɔdaan nín lī puee sɔ̀. M làá já nì si. M làá kóoǹ a-wɔndoou kí bìitī a-cancaŋgbeel pu kí dàkà atimbun, ní kí bìitī a-cooi pu kí dàkà abee ŋin kíǹee.

⁶ M làá dū titampummool kí bìin̄ a-pu kí kɔ́ǹ-si icoo, ní kí nyāntí-si kí páań mpaampiin pu.

⁷ Bin kɔkɔ làá dāá ká-see dāa sáń-si ní ki lì yii: «Niiniifi tiŋki pée nāaǹ ní múb, ŋma làá yāliŋkì ki-pu dee? La ní m làá nín ká binib bí dāá ŋméeǹ-kì dee?»

Bi làá ŋá Niiniifi kii bi nín ŋá Teebeesi puee ní

⁸ Niiniifi tiŋki, a dàkafī yii a sɔ́ǹ Teebeesi tiŋki kin bí Niil buntaaŋi kansikinee níii? Nnyim di nìn māntìi tú-kì, ní dimɔɔl cí-kì, ní nnyim sá ki-guŋŋi.

⁹ Eetiiyoopii nì Eejipiti di nìn sá ki-pɔŋŋu ŋun kaa cáá dikúntilee. Puuti yab nì Liibii yab di nìn sá ki-bɔɔbi.

¹⁰ Ama nì míǹ kɔkɔee, bi cúú Teebeesi yab ki cūnnì kuyuŋu. Bi nìn nàn̄ bi-bipɔmmu asaŋkaŋkpil kɔkɔ pu. Bi nìn tɔ́ kasi ki yākatì bi-kpambaliŋ ki cáá-bi ki cūnnì kuyuŋu, ní ki bóob́ ki-kpootiliibi ikusaka.

¹¹ Sii Niiniifi tiŋki, digìńdi làá dāá kɔ́ si mun, a làá dāá nyàab̀ kí báĺ. Sii mun làá dāá nyàab̀ kibalilaŋ a-nannanliibi ń taa cúú-si.

Niiniifi tiŋki làá lítí

¹² A-sintil difɔkɔŋi sá kii fiigi biliŋ ŋin lúń busubu pu ki mántèe ní. Bi yaa pée yáká-buee, abil gbátí ní kí kɔ́ un là kí ŋmɔ́-ŋee nyɔkɔn.

¹³ Kpèè a-janjaliibi bí kii binimpoobee ní, a-nannanliibi yaa páaǹnée, a-tiŋki punyɔmmu cútí kí pìitī ní bàaa bí kɔ́, di sá yii ŋŋmi wùn̄ mu-kpàlkaati.

¹⁴ Niiniifi yab, lúḿmaan nnyim kí yóoń, di sá yii binannanliibi làá màntīí tū ni-tiŋki. Mɔ̀tīí ŋāŋkìmaan ni-sintil difɔkɔŋi, tāāmaan kuyɔkɔu, ní kí yòon̄ ni-brikisi gaŋgammu!

¹⁵ Ama niin ní ŋŋmi làá wà-ni ní kpú, kujaaun ní ni làá kpú kí céetí. Bi làá kpɔ̀ kí céetí-ni kii inaakitoon nín ŋmóò ki céetí tikɔkɔ puee ní. Niiniifi, a-nib nìn wīikí kii inaakitoonee ní!

Báà ubɔ kaa ti kóò Niiniifi tiŋkin

¹⁶ Ni-nyampoobi nìn wīikí ki jítiǹ iŋmalbijaa in bí kutaa puee. Kɔŋkɔnnee bi wáŋkì kii inaakicaan nín yíkí kí búntí puee.

¹⁷ A-ciitiliibi nìn būtì kii inaakicaanee ní, ní a-kàlimbi mun nìn wīikí kii kunaakicikuee. An yaa dá láá sɔ̀m̀ee, inaaki náká an pu. Ama ŋwìiń yaa nyáńee, i yíkí ní kí búntí ní ubɔ kaa nyí laakin i túĺee. I nín bí la dee?

Asaluu un baa ŋūǹ kí ŋāŋkèe

¹⁸ Asuur bɔtiu, a-kpootiliibi gèen̄ kaa fīntì! A-baatandambi kaa ti bíi cìŋkī bi-ba! A-janjaliibi yàl̄ ki gbí ajoon pu, ní ubɔ kaa bí kí kóoǹ-bi kí kpāfì.

¹⁹ Asaluu un gbáń-see kaa ti cáá diŋaŋkil. Nnyɔkɔ kaa bí kí cáaǹ tiweendi tin a fōōyee. Bin kɔkɔ gbìl̄ tin bāań-see kpáafí bi-ŋalii nnaabu ŋun bāań-see pu, di sá yii a ŋá ntoom ki kíǹ ŋma? A-toom kaa cáá kikuntilaŋ.