Michée 7 - UNIMBƆTI NYƆƆBUNDI GBƆŊKU

Unimbɔti bɔnaatiliu yaliŋkii

¹ Óo, man falaau na! M sá kii unil un di nyáń kí kìtī fiinyi subiliŋ ŋyunti ŋun ní bi kìtī-ŋee ní, ki cūtì kí nyàab̀ fiinyi biliŋ ŋyunti ŋun bi kītì-ŋi ki dóòyee ní. Báà difiinyisakal diba kaa kíǹ! Báà difiigipɔmbil din m néeńee kaa bí!

² Bin yú nì Unimbɔti deedeeyee kúntì kitiŋ nee pu, báà ubulcinnil ubɔbɔ kaa ti bí. Báà unil kaa ti bí ki-ni ki yú deedee nì Unimbɔti. Bi-kɔkɔ pée dàkafī nnikpaakoon pu ní. Báà ŋma pīil̀ u-juti kutaliŋŋu.

³ Bi yáb̀ kí ŋá ikpiti. Kí wàatī bí ŋá tiŋanee, bibɔtiibi sīintí bi nín là puee, ní bibɔsoonliibi sīintí kunimbiŋmiiu, ní akpambal lì bi nín là puee.

⁴ Bi-kansikin un pée sá unimɔntee bí kii abɔjanaakunee ní, un pée sá deedeedaanee jítiǹ kukuŋkuncikuu pu. Ni-tafadaaldi yuntiŋu bāań dee. Ni-bɔnaatiliibi bin cí-nee nìn sòon̄ an pu. Too, kɔŋkɔnnee, naa ti nyí tin poon ni bée.

⁵ Ní taa fōō ni-jutiibi bɔti kí kíí, kí taa nín̄ máká ni-bɔɔbi pu. Báà sii a-ba nimpuu nimbiin gba, á nīn nyí nì a-ba nì tin a sòoǹee.

⁶ Di sá yii kibininjabiki sìí ki-baa, ní kinimpubiki jáà nì ki-na, ní unimpu nì u-beel kaa kpí. Báà ŋma nannanliu sá u-dicaŋkun yɔu ní.

⁷ Ama mamee, ti-Dindaan watil pú ní m kpèé, Unimbɔti un làá fīī-mee pu ní m máká. M-Nimbɔtiu làá pīlifiǹ-mi.

Isirayeel yab máká Unimbɔti pu

⁸ Nimbi ti-nannanliibi, ní taa nín̄ fàal̀maan tin bāań-ti nee pu. Báà ti yaa lítì, ti làá fàtīí yīkì. Báà ti yaa bí dibɔmbɔndin, ti-Dindaan di sá ti-walifiŋu.

⁹ Diŋuul din ti-Dindaan gíí ti-puee, ti máaǹ kí fōō-dì, kun puee ti yīntiǹ-u. Ama ŋyunti bí ki dòoń, u làá sòoǹ ti-bɔti kí pɔ̀-ti. U làá dāá nyāntí-ti kí gíiǹ ŋwalifin, kí gbéeǹ-ti u-ŋanti.

¹⁰ Ti-nannanliibi yaa láa ká mimmee, bi làá dāá kɔ́ icoo ni. Bíǹ bin nìn bàlifī-ti yii: «Ni-Dindaan ni-Nimbɔtiuee bí lee?» Bi làá dāá tāā-bi kí ŋmàtifì kii adan pu kpatee. Ti làá dāá ká míǹ nì ti-nimbibulii.

¹¹ Ŋwiin bí ki dòoń, bi làá dāá fàtīí mā digundi kí tū ni-tiŋyil. Ŋwiin gbantee, ni-tiŋki làá dāá wàan̄ kí kūtì.

¹² Ŋwiin gbantee, ni-nabiyaamu làá dāá fàtīí gítiń ni-cee. Bi làá dāá nyānní Asuur nì Eejipiti timmun, Niil nì Eefiraati mɔɔgbaŋŋi, kí nyānní tiŋku ubɔ kí cáá sāā un kíǹee, dijool diba kí cáá sāā din kíǹee kí dāan̄.

¹³ Kitiŋ laakin kɔkɔ kíǹee làá dāá kpántí kuteeu binib bin kóò ki-puee kpitii pu.

¹⁴ Ti-Dindaan, dū a-pikpaadɔŋu kí kpàà a-nibul din sá a-fakalee. Dì bí kuteeun di-baba isufi in lòoǹ abilee māntìi tú-dì. Péetí-dì kí cùnnì Baasan pikpaakun nì Galaadi tiŋkin kii dooooyee.

¹⁵ Kii ŋyunti ŋun a nìn nyántìń-ti Eejipiti tiŋkinee, gíti ŋá a-maamaaci tuuŋŋi kí dàkà-ti.

¹⁶ Atimbun ŋin kíǹee nib làá dāá ká míǹ ní icoo ń dāá cúú-bi, min kamaa bi cáá mpɔnee. Bi làá dāá cúú bi-nyɔmmu, ní bi-tafaliŋ ń kpáá baa ti gbìl̀.

¹⁷ Bi làá dāá bàlim̀ ntampukumin kii ikoobu nì ipeel in fù i-biŋŋi puee. Bi làá dāá nyānní bi-balilaŋki bi-wunti jìkì kí dāan̄ sii ti-Dindaan ti-Nimbɔtiu cee. Bi làá dāá fàŋkì-si.

¹⁸ Ti-Dindaan, Unimbɔti ulɔu di gíti bí kii sisee? A lèekī a-nibul din kíǹ ki bí dimaŋfalinee yìntitam, ki pūǹ di-kpitii. Aa fòol̄ diŋuul kí nīn cá jaanjaan, ama an mɔ̄ǹ-si á nīn dàkà-ti a-ŋanti.

¹⁹ A làá fàtīí tí sɔ̄ ti-saai, a làá tāā ti-yìntitam kí múĺ, ní kí dū ti-kpitii kí tɔ̄ tiŋku taapu taapu.

²⁰ A làá dàkà Jaakɔb naantiibi a-deedeeu, kí dàkà Abraam naantiibi a-laŋŋaŋfitiiku, kii a nín nìn pūtì ki pōoǹ ti-baabi dooooyee puee.