Michée 5 - UNIMBƆTI NYƆƆBUNDI GBƆŊKU

Ubɔti ufiil làá nyánní Beetileem tiŋkin ní

¹ Sii Beetileem Eefiraata, Juuda timmu kansikinee, sii di sá kitiŋwaŋwaai. Ama sii poon ní m làá yàntī ubɔti un làá kpòotī m-nibul Isirayeelee ń nyānní. U-nyeeŋŋu kíliń doooo cannaaku ní, iyunti kpiŋkpiki poon.

² Ti-Dindaan làá dū u-nibul kí fá ŋyunti ŋubɔ poon, kí nīn cí ŋyunti ŋun ní unimpu un làá màal̀-uee ń dāá màal̀-u. Ŋyunti gbantee, u-nabiyaamu mun làá dāá kíń kí nīn bí dimaŋfalinee làá dāá dāan̄ kí kūtì Isirayeel yab bin kíǹee pu.

³ Ubɔti gbantee làá dāá yīkì kí dū ti-Dindaan pɔŋŋu, ti-Dindaan u-Nimbɔtiu yiŋkpaandi kí kpàà-bi. U-nibul làá dāá nīn bí ŋgbansɔŋfin. Di sá yii u-kpaanti làá dāá gbìtī kí bà ilaan kɔkɔ.

⁴ Úǹ di làá dāá cáań ŋgbansɔŋfi! Asuur yab yaa láa kɔ́nní ti-tiŋkin, bi-taaŋi yaa láa tāā ti-beeciŋŋinee, ti làá dāá lēē ti-kpilib kupaau bí já nì bi.

⁵ Bi làá dāá dū kitàataajiki kí já nì Asuur tiŋki kí dāá dū kijisaakaai kí já nì Niimroodi tiŋki. Asuur yab yaa láa dòoń kí já nì ti ní ki kɔ́nní ti-tiŋkinee, ti-bɔtiuee làá dāá fīī-ti.

Isirayeel yab bin kíǹee pɔŋŋu

⁶ Jaakɔb naantiibi bin làá dāá kíń kí nīn bí anibul tikpil kansikinee làá dāá nīn náań nì dimalindi din nyánní ti-Dindaan ceeyee ní, kii utaa nín nì ki sɔ̀ŋkī timool puee. Baa làá nīn kā ki máká unil pu, kaa làá nīn kā ki cɔ́tí nisaal pu.

⁷ Jaakɔb naantiibi bin làá dāá kíń kí nīn bí atimbunni, anibul kupaau kansikinee, bi làá dāá nīn bí kii gbikintee ní kupɔɔun peelii kansikin, kii digbikintipɔmbil din bí tipicaŋkpun kansikinee ní. U yaa pée jítì laakin kamaayee, u cútí ipeel ní ki tɔ̀ntī, ní ubɔ kaa ŋūǹ kí fīī-i.

⁸ «Dúkutí a-ŋal a-nannanliu pu kí nà kí dóó bin ná-see kɔkɔ.»

Ti-Dindaan làá kúntí dimákakulindi

⁹ «Ti-Dindaan nín sòon̄ puee sɔ̀. Tin làá dāá bàń ŋwiin gbantee sèé: <M làá dāá nàan̄ a-taamui, ní kí dāá kúntí a-janjatɔrɔkub.

¹⁰ M làá dāá nàan̄ a-timmu, ní kí dāá wīī agun ŋin a máń ki tú a-timmuee.

¹¹ M làá dāá kúntí kusoou tuuŋŋi ni-kansikin. Baa dāa gíti kāntí u-kpaŋkpanti ni-kansikin.

¹² M làá dāá kúntí awaa nì ataŋkpee ŋin ni cóoǹ ki tòotēe. Naa ti làá gbàan̄ tiwan tin ni dū ni-ŋalii ki máńee nimbiin.

¹³ M làá dāá cóotí ni-windɔi, ní kí kúntí ni-timmu.

¹⁴ Nì mbum nì diŋuul poon ní m làá dāá tɔ̀ atimbun ŋin kaa tɔ́-mee ipɔntoon.»