Michée 3 - UNIMBƆTI NYƆƆBUNDI GBƆŊKU

Bi bíi kpáafí bikpootiliibi

¹ Ama man bí yii: «Pīlifìmaan, nimbi bin kpòotī Jaakɔb naantiibee, nimbi Isirayeel nibul bɔsoonliibi. Nimbi di kaa bàà máaǹ kí nīn nyí tin bí deedeeyeeee?

² Ama nimbi di ná tin ŋān̄ee ní ki néeń tin kaa ŋān̄ee. Ni cátí binib gbaŋŋu ki bìitī tiwunnan nì akpab pu.»

³ Bi ŋmóò m-nibul nanti kii upeecuncutee. Bi lèekī bi-gbaŋŋu kii naŋkoosinaa nín lèekī puee, ki kɔ́fí bi-kpabiŋ, ki càkà bi-nanti kii an sá tinan ní bi làá tɔ́kɔń dikumboolinee.

⁴ An pu ní bi yaa láa kúuǹ ki yíiń ti-Dindaanee, waa làá dāá kíí-bi. Ŋyunti gbantee, u làá dāá fàtī u-kpaŋkpamboon kí tīī-bi, atuŋkpiti ŋin kɔkɔ bi ŋée pu.

Inyimɔn bɔnaatiliibi bɔkpaaŋi

⁵ Ti-Dindaan nín sòon̄ bibɔnaatiliibi bin mɔ́ntí m-nibulee pu puee sèé: «Bin yaa tīī-bi njimee, bi lì yii Unimbɔti ń tīī-bi ŋgbansɔŋfi. Ama bin kaa tìì-bi tiba bí jēe, bi jáà nì bi.

⁶ An puee kunyeeu làá mɔ́ ni-pu, naa làá ti ká aleedaka. Dibɔmbɔndi làá jēetí ni-pu, naa làá ti ká tiba kí sòoǹ. Ŋwìiń làá jēetí ni-pu, ní ŋwiimpu ń dūú kpántí dibɔmbɔndi.»

⁷ Icoo làá cúú bin wāĺee nì bin būūyee. Bi làá bìin̄ bi-nyɔɔkuti pu, kun puee Unimbɔti kaa ti kíikí-bi.

⁸ Ama mamee, nì ti-Dindaan Fam puee, m cáá mpɔn, ki nyí tin bí deedeeyee, ki cáá dipɔbil. M ŋūǹ kí yàntī Jaakɔb naantiibi, Isirayeel nibul ń béé bi-yìntitam nì bi-kpitii.

Jeerusaleem tiŋki làá wīī

⁹ Pīlifìmaan tin bí nee, nimbi Jaakɔb naantiibi kpootiliibi, nimbi Isirayeel nibul bɔsoonliibi. Ni ná tin bí deedeeyee, kaa sòoǹ tibɔti ibaamɔn.

¹⁰ Ni kù binib ki kāntí animbil ki cáa nyāantí Siiyɔn tiŋki. Ni wɔ́b̀ binib ki kāntí animbil ki cáa nyāantí Jeerusaleem.

¹¹ Bibɔsoonliibi fòol̄ tiwampɔkaal ní ki sòoǹ binib bɔti, bisaraaŋaliibi dàkà Unimbɔti marab ní bi pà-bi, ní Unimbɔti bɔnaatiliibi fòol̄ animbil ní kí nín nàatī Unimbɔti bɔti. Ti-Dindaan yindi pu ní bi tɔ́kɔ́ ki ŋáań tíǹ kɔkɔ ki lì yii: «Ti-Dindaan bí ti-cee. Nnaabu ŋubɔ kpá ki làá jēetí ti-pu.»

¹² Too, ni-puee, bi làá kpɔ̀ Siiyɔn tiŋki kii bi nín kù bukpaa puee, ní Jeerusaleem tiŋki ń kpántí adigbun ŋma, ní ikuŋkum ń nyā kí múkúǹ dijool din pu bi máń kunimbɔtidii ki tɔ́kɔ́ǹee.