Matthieu 19 - UNIMBƆTI NYƆƆBUNDI GBƆŊKU

Unimpu nì uninja ń taa yàkatī tɔbin

¹ Yeesu dàkā an bɔti ki dóòyee, ní ki yíkì Galiilee tiŋkin ki póotì Juudee watil, Jɔɔdan buŋgbandi lapu pu.

² Kunipaau nìn nóó-u ní u cāantí bi-weeŋyi.

³ Niinee Fariisab biba dɔ́miń u-cee kí píĺ-u tibɔti kí kpèè u-nyɔkɔn ní ki bālifì-u yii: «Ti-marau pú nsan yii á jà a-nimpuu báà tin ní u yaa pée ŋéeee?»

⁴ Ní Yeesu kíí-bi yii: «Naa kàan̄ Unimbɔti gbɔŋku ki ká an nín lī puee níii? Yii ŋkilkaaminee, Unimbɔti unáanli náań uninja nì unimpu ní, ní ki bí yii:

⁵ <An sá uninja ń nyā u-baa nì u-na cee ní u nì u-nimpuu ń nīn bí ní bi-liitil ń kpántí unibaanti.>

⁶ Mimmee, baa ti sá bili, bi ŋá unibaanti dee. Míǹ puee, unil ń taa yàkatī tin Unimbɔti dūu kpáfèe.»

⁷ Niinee ní bi bālifì-u yii: «Kin mimmee ba pu ní Mooyiisi nìn pú nsan yii á ŋmà kugbɔŋu kun dàkà yii a jìn̄ a-nimpuuee kí ŋúbíǹ-u ní kí nín jà-u ní?>»

⁸ Ní u kíí-bi yii: «An sá ni-pɔɔgbifiŋŋu di yì-tì ní Mooyiisi pú-ni nsan yii ní jà ni-nimpoobi. Ŋkilkaaminee an kaa nìn sá míǹ.

⁹ M tùkù-ni yii, sii un cáá unimpu ní an kaa sá ticati tin kòóyee, ní a jìn̄-u ki fātìi cáá ubɔee, a ŋá tilaakpaal Unimbɔti nimbiin.»

¹⁰ Ní u-boonnooliibi bí yii: «An yaa sá míǹ ní uninja nì u-nimpuu kansikinee, mimmee, a yaa kaa pūtì cáá unimpu, an sɔ́ dee.»

¹¹ Ní u bí-bi yii: «An kaa sá báà ŋma di ŋūǹ tibɔti nee, see bin an pú bí ŋmēe.

¹² Kun yàntī bininjab biba kaa cāab̀ binimpoobee bí tɔbin. Bibee, an sá doooo bi-na poon ní baa sá bininjab, ní bi fāatì biba, ní biba muee, an sá Unimbɔti Beel puee ní bi dū bi-ba ki ŋá kii baa sá bininjabee. Un yaa ŋūǹ kí gbìl̄ tibɔti nee taapuee ń gbìl̄.»

Yeesu mēē mbiyaamu pu

¹³ Bi nìn cáań mbiyaamu Yeesu cee ú dū u-ŋalii kí páań mu-pu kí mèè kí tīī-mu, ní u-boonnooliibi bíi wòoǹ bin cáań-muee.

¹⁴ Ní Yeesu bí-bi yii: «Càntīmaan mbiyaamu nee! Yàntīmaan mú dāan̄ m-cee kí taa pìin̄-mu nsan, kun puee Unimbɔti Beel sá ki tīī bin náań nì muee ní.»

¹⁵ Ní u dū u-ŋalii ki páaǹ mu-pu ki mēē ki tīī-mu ní ki búntì.

Ugaaja ubɔ bɔti

¹⁶ Uninja ubɔ nìn dɔ́miń Yeesu cee ní ki bālifì-u yii: «Ukpil, ditummɔntiil dilal ní m làá ŋá ní kí ká dimaŋfal din kaa cáá dikúntilee ní?»

¹⁷ Ní Yeesu kíí-u yii: «Ba pu ní a bàlifī-mi timɔntiil pu? Unimbɔti baba di sá umɔnti. A yaa là kí kɔ́ dimaŋfal din kaa cáá dikúntilee nee, á nīn tɔ́ marab.» Ní u fātìi bālifì Yeesu yii: «Marab bilab?»

¹⁸ Ní Yeesu bí-u yii: «Taa kpɔ̀ unil, taa ŋá tilaakpaal, taa yɔ̀, taa mɔ̄ntì ubɔ nyɔkɔ pu,

¹⁹ kí nīn tɔ́ a-baa nì a-na, kí nīn néeń a-juti kii sii a-bee.»

²⁰ Ní unaacimpɔɔnee bí-u yii: «M ŋá míǹ kɔkɔ, tilati di gíti kíǹ?»

²¹ Ní Yeesu kíí-u yii: «A yaa là kí ŋá min sá páaayee, cù kí dū tin kɔkɔ a cááyee kí nyāfì kí dū animbil kí yàkatī bifalaadambi, ní kí tin ká tigaajati Unimbɔti cee. A yaa ŋá míǹ ki dóòyee ní á dāá nīn nóó-mi.»

²² Unaacimpɔɔnee nín gbìl̄ an nyɔɔbundee, ní kunimbaau kɔ́-u ní u búntì soooo, kun puee u nìn cáá tigaajati tikpil.

²³ Niinee ní Yeesu bí u-boonnooliibi yii: «Ibaamɔn ní m tùkù-ni, an dāa pɔ̄ɔ̄ ki tīī ugaaja ń kɔ́ Unimbɔti Beelin.

²⁴ M gíti tùkù-ni yii, an pɔ̀fì ki tīī ugutaamu ń jītí ujoo buŋŋun ki jítiǹ ugaaja ń kɔ́ Unimbɔti beelin.»

²⁵ U-boonnooliibi nín gbìl̄ mimmee, ní bi bākatì tikpil, ní ki bí yii: «Kin, ŋma di nín ŋūǹ kí ká difiil dee?»

²⁶ Ní Yeesu kpēē-bi dímmm ní ki bí yii: «An pɔ̄ɔǹ unil, ama Unimbɔti ceeyee tikɔkɔ sá sɔkɔmii ní.»

²⁷ Niinee ní Peetroo bí-u yii: «Kin, timbi nín yíkì ki fá tikɔkɔ nì tikɔkɔ ki nóó-si nee, timbi paati dāa sá ba?»

²⁸ Ní Yeesu bí yii: «Ibaamɔn ní m tùkù-ni duulinyapɔɔn un dòońee nee, man Kinibiki yaa láa kāl̀ m-beejal pu nì tinyoolee, nimbi bin nóó-mee mun dāa kàal̀ abeejal saalaa nì ali pu ní kí sòoǹ Isirayeel naakɔti saalaa nì tilee bɔti.

²⁹ Ní un kamaa yaa yíkì ki fá u-diiŋŋi nì u-nabiyaamu, nì u-niisalib, nì u-baa, nì u-na, nì u-biyaamu, nì u-kpaatanti man puee, Unimbɔti làá tin pà udaan míǹ dilaataal pu, ní ú gíti fōō dimaŋfal din kaa cáá dikúntilee.

³⁰ Ama bisanlintiliibi tikpil dāa kpántí biboompaanliibi, ní biboompaanliibi mun tikpil ń kpántí bisanlintiliibi.»