Marc 16 - UNIMBƆTI NYƆƆBUNDI GBƆŊKU

Yeesu fīkitì ditaŋkpiilin

¹ Ŋwiŋŋuŋfikaa jítèe, Maarii un nyánní Magidalaa tiŋkinee, nì Maarii Yakubu na, nì Saloomee cūtì ki dáń talaalub bin bi cáa ŋáŋkí bitaŋkpiibi wuntee, kí cáá ŋmìtī Yeesu wunti.

² Ku wúntì ŋwimpeekaa dal kutaafaau pɔ̀lpɔlee ní bi búntì dikaakul laŋki.

³ Bi cée ní ki bàlifī tɔb yii: «Ŋma di làá tin bìkitī-ti ditaŋkpal kí wàatī dikaakul nyɔkɔ dee?»

⁴ Bi wáaǹ ki kpēēyee, ki ká ditaŋkpakpaandee bíntì ki wāatì dikaakul nyɔkɔ.

⁵ Binimpoobee bāań ki kɔ́ dikaakulinee, ní ki wál̀ unaacimpɔɔn ubɔ kā bi-ŋaŋgiil pú ki pēē jibapiin, ní tifaandi kɔ́-bi.

⁶ Ama ní unaacimpɔɔnee bí-bi yii: «Taa fàŋkìmaan! M nyí ni nín nyàab̀ Yeesu Naasaareeti yɔu un bi kpáá ndɔpuntikaa puee. U fīkitì, waa bí doo. Kpèèmaan, laakin bi nìn bíl̀-uee sèé,

⁷ kí nín̄ cámaan kí tùkù u-boonnooliibi nì Peetroo yii u làá lìntī, ni tin kāntí-u Galiilee. Niin ní ni làá tin ká-u, kii u nín nìn pée tùkū-ni puee.»

⁸ Bi nyáń dikaakulinee bi-pɔbiliŋ bíil̀ ní bi sáń bi-wunti gbáà. Bi nín fàŋkée puee, baa pée máafì báà ubɔ tiba. [

Yeesu lēē u-ba ki dàkā Maarii Magidalaa yɔu

⁹ Yeesu nín fīkitì kinyɔŋ wimpeepeekaaŋuee, Maarii un nyánní Magidalaa tiŋkin, un ni u nìn jìn̄ arasiniibi bilulee ní u yāntì u péé ki ká-u.

¹⁰ Unimpuee cūtì ki máafì bin nì Yeesu nìn tāatée. U bàn̄ee bíǹ kā nì dinimbinaamandi ki sūǹ.

¹¹ Ama bi nín gbìl̄ unimpuee cee yii Yeesu bí dimaŋfalin u ká-u muee, baa fōō ki kíí.

Yeesu lēē u-ba ki dàkā u-boonnooliibi bili

¹² Míǹ boonee, Yeesu gíti tí lēē u-ba mbamin nsanni ki dàkā u-boonnooliibi kansikin bili bin nìn yíkì ki cá kitimbilii kibanee.

¹³ Bi nìn fātìi gítìń ki máafì bin kíǹee, ní baa tí fōō bi mun bɔti ki kíí.

Yeesu lēē u-ba ki dàkā u-kpambaliŋ

¹⁴ Boonee ní u nyántì u-ba ki dàkā u-kpambaliŋ saalaa nì dibee ŋyunti ŋun bi kā ki jīǹ tijinee. Yeesu wòon̄-bi bi-pɔbiliŋ nín gbìfì baa fōō-u ki kííyee pu, kun puee baa nìn fōō bin ká u nín fīkitèe bɔti ki kíí.

¹⁵ Ní u tùkū-bi yii: «Cùmaan kitiŋ jaŋŋi kɔkɔwoooo kí sòoǹ tibɔmɔntiil nee kí tīī kunibuluu kamaa!

¹⁶ Un yaa fōō ki kíí ní bi fùl̄-u Unimbɔti nyimee kāntí difiil. Ama un yaa kaa fōō ki kííyee dāa kóò ditafadaaldin ní.

¹⁷ Maamaaci tuuŋŋi ŋin bin yaa fōō-mi ki kííyee làá nīn ŋáańee sɔ̀. M-yindi puee bi làá jà arasiniibi, ki làá sòoǹ isooncaan.

¹⁸ Bi làá cūtì ikoobu, kí nyɔ̀ ndabiim, tiba kaa làá ŋá-bi. Bi dāa pāantí bi-ŋalii bibunliibi pu ní bí ká dicáaǹdi.»

Yeesu cāntì-bi ki nín jɔ́ḿ yilpu

¹⁹ Ti-Dindaan Yeesu sòon̄ nì bi míǹ ki dóòyee, ní ki yíkìi nín jɔ́ḿ yilpu ki tin kāl̀ Unimbɔti ŋaŋgiil pú.

²⁰ Ní u-boonnooliibi búntì ki sòoǹ tibɔmɔntiilee ajan kɔkɔ, ní ti-Dindaan bí bi-cee ki tūǹ maamaaci tuuŋŋi ki dàkà yii tibɔti tin bi sòoǹee sá ibaamɔn.]