Luuki 15 - UNIMBƆTI NYƆƆBUNDI GBƆŊKU

Dipibil din wáŋkèe bɔti

¹ Bifɔtiliibi nì binikpitib bin kɔ kíǹee nìn sútìń ki pìl̄ Yeesu kí pīlifì tin u sòoǹee.

² An yāntì Fariisab nì bimaradakaliibi bíi gbùkum̄, yii: «Kijapaai nee fòol̄ binikpitib, u nì bi jīǹ tijin.»

³ Ní Yeesu dū tibɔti nee ki ŋmāntiǹ yii:

⁴ «Ni-kansikin ubɔ yaa cáá ipii dilaataal, ní ubɔ yaa wáŋkèe, waa dù ubɔ kpá dilaataalee kí yóoń kupikpaapɔɔun kí cùú nyàabìń un wáŋkèe áli kí tin kánní-uaaa?

⁵ U yaa kánní-uee, niinee an mɔ́ɔkíǹ-u ní ú dū-u kí bùkun̄ní.

⁶ U nín bāań mmɔŋkee, ní ú yíiń u-bɔɔbi nì u-kɔŋkɔnnaatɔb kí bí-bi yii: <Fàal̀ kí tūtum̀maan-mi, kun puee m fātìi ká m-piiu un nìn wáŋkèe.>

⁷ Ibaamɔn ní m tùkù-ni, míǹ mbaantiim ní unibaanti un fá u-kpitiiyee puee, dipɔɔpiŋkpaandi bí yilpu ki jítiǹ deedeedambi ubɔ kpá dilaataal bin an kaa ti bàlifī bí kpántí bi-bimbimee.»

Animbil ŋin wáŋkì, bi fātìi kée bɔti

⁸ «Àá unimpu ubɔ di yaa cáá jitɔmbi saalaa bin sá-u tipijatee ní ubɔ yaa wáŋkì, waa tùutī fitila kudiin kí ŋàtī kí nyàab̀ tiŋan áli kí tin ká u-nimbiliŋ.

⁹ U yaa kée ní ú yíiń u-bɔɔbi nì u-kɔŋkɔnnaatɔb kí bí-bi yii: <Fàal̀ kí tūtum̀maan-mi, kun puee m-nimbiliŋ ŋin nìn wáŋkèe, m fātìi ká-ŋi.>

¹⁰ Ibaamɔn ní m tùkù-ni, míǹ mbaantiim Unimbɔti mun nì u-tuuŋyi bí dipɔɔpiŋkpaandin un fá u-kpitiiyee pu.»

Kibiki kin wáŋkì ki fātìi gítìńee bɔti

¹¹ Ní Yeesu fātìi tí bí-bi yii: «Ukpil ubɔ di bí ní ki cáá jipɔmbi bili.

¹² Ní uwaalee bí u-baa yii: <M-baa, tīī-mi m-fakal kɔŋkɔnnee.> Ní u-baa lafun tīī bi-liitil, báà ŋma nì u-wanti.

¹³ Iwiŋkaaŋkaa boonee, ní uwaalee dū u-jandi din bi tīī-uee ki nyáfì ní ki fōō animbil, ní ki yíkìi búntì ndandati kitiŋ kiban, ní ki bí niin ki jīǹ u-nimbiliŋ pùsi pusi.

¹⁴ U jíń u-nimbiliŋ ki dóòyee, ní ŋkùm miba nyáń kitiŋ gbanti poon ki pɔ̄ɔ̄ tikpil. Niinee disool kíǹ ki cáá-u.

¹⁵ Ní u cūtì ki nyàab̄ kitiŋ gbanti niliu ubɔ cee ditundi ní úǹ dū-u ki tɔ́ kusaau digbeetikpaal.

¹⁶ U bàà nìn là kí nīn jīǹ igbeeti jinti, ní báà ubɔ kaa tìì-u.

¹⁷ Niinee ní u kíĺ ki bíi dàkafī tin poon ní u kɔ́ee, ní ki bí yii: <M-baa tɔntɔnliibi tikpil bí mmɔŋki ki bíntí tijin pu, ní man dāa bí doo ki kúù ŋkùm nee.

¹⁸ M làá yīkì kí fàtī m-baa cee. M yaa bàn̄ee, ḿ bí-u yii: 'M-baa, m yīntiǹ Unimbɔti ki yīntiǹ si mun, 19 maa ti máaǹ á yíiń-mi a-biki. Dū-mi kí ŋá kii a-tɔntɔnliu ubɔee.'>

²⁰ U dākafì míǹ ki dóòyee ní ki yíkì ki kíliń nsan ki nín dòoń u-baa cee. «U-baa ká u páaǹnée, ní an cúú-u falaa, ní u sáǹ ki túŋkì-u ní ki ŋá-u aatúuù.

²¹ Ní u bí u-baa yii: <M yīntiǹ Unimbɔti ki yīntiǹ si mun, maa ti máaǹ á yíiń-mi a-biki.>

²² Ama ní u-baa bí u-tɔntɔnliibi yii: <Cáaḿmaan dibɔkutil din ŋān̄ tikpilee malaa malaa kí pèem̄maan-u, kí cáań kibɔmbiki kí fúuń u-ŋambiki, kí cáań anaataka kí táká-u,

²³ kí cúúmaan dinajapɔmbil din cáá ŋkpamee kí kpɔ̀ tí jī kí fàal̀.

²⁴ Kun puee m-biki nee ŋman nìn kpíì ní ki fātìi fīkitì, kì nìn wáŋkì ní m fātìi ká-kì.> Ní bi kíĺ ki bíi jīǹ jiŋaal.

²⁵ «Ŋyuntee u-jipɔŋkpiliu dáá bíń kusaau. U kùnní ki tóobiń mmɔŋkee, ki gbìl̀ agbiil nì diŋool tùm̀ mmɔŋki.

²⁶ Ní u yíiń bitɔntɔnliibi ubɔ ki bālifì-u yii: <Ba ŋá mmɔŋki doo ní?>

²⁷ Ní utɔntɔnlee kíí-u yii: <A-naal di fātìi gítìń, ní a-baa kūū dinajapɔmbil din cáá ŋkpamee, kun puee u fātìi ká-u nì alaafiya.>

²⁸ Niinee, ujipɔŋkpilee fōō diŋuul ní ki yíì kaa là kí kɔ́ kudiin. Ní u-baa nyánní ki sɔ̄kɔl̀-u ú kóoń.

²⁹ Ní u fātìi bí u-baa yii: <M-baa, kpèè abin kupaau sèé, m nín kā ki tūǹ ditundi ki tìì-see. Maa yíì a-tundi diba yii maa làá tɔ̄ kí tīī-si, ama a mun kaa tīī-mi dalba kiŋɔbiki yii man nì m-bɔɔbi ń jī jiŋaal.

³⁰ Ama a-jipɔɔn nee fātìi bāańee, úǹ un yōoǹ a-gaajawanti u nì nnimpulaakpaamu jíńee, úǹ ní a cúú unajapɔɔn un cáá ŋkpamee ki kūū ki fōō-u!>

³¹ Ní u-baa bí-u yii: <M-biki, sii pée bí m-cee doo ní baabadal, tin kɔkɔ m cááyee, sii di yì.

³² Ama an máaǹ tí jī jiŋaal kí fàal̀, kun puee a-naal un ŋman nìn kpíìyee fātìi fīkitì, u nìn wáŋkì ní m fātìi ká-u.>»