Lévitique 17 - UNIMBƆTI NYƆƆBUNDI GBƆŊKU

ISIRAYEEL YAB MÁAǸ KÍ NĪN BÍ CIRCIR Fatiku pu marab

¹ Ti-Dindaan bí Mooyiisi yii:

² «Tùkù Aarɔn nì u-jipɔmbi nì Isirayeel yab kɔkɔ yii marab bin man ni-Dindaan yóoǹee sèé:

³ «Isirayeel yab kansikin ubɔ yaa kūū unaa àá upii àá uŋoobu dinaapaal pu àá dinaapaal kpaanceetiŋu,

⁴ ní kaa cáań-u circir kɔŋkooŋŋu punyɔkɔki nyɔkɔpu kí ŋá saraa kí tīī u-Dindaanee, bi làá dāá bàlifì udaan fatiku gbanti pɔndi. Kii u nín kūū tiwan tin cáá kufoou ki nyántì fatiku ki fée puee, bí nyāntí-u Isirayeel nibul kansikin.

⁵ Mara nee taapu di sá yii Isirayeel yab ń taa ti làntì bi-waŋkuti laaba fám kí ŋá saraa, ama bí cáań tiwaŋkuti gbanti circir kɔŋkooŋŋu punyɔkɔki nyɔkɔpu ti-Dindaan nimbiin kí tīī usaraaŋal ní kí dūú ŋá mpèé saraau kí tīī ti-Dindaan.

⁶ Niinee ní usaraaŋal ń dū fatikuee kí yàaǹ nsaraafan ŋun bí circir kɔŋkooŋŋu nyɔkɔpuee pu, ní kí dū saraayee kpam kí wà ŋŋmi nsaraafanee pu, ní u-sɔnsɔfiŋu ń sɔ̀ŋkì ti-Dindaan pɔbil.

⁷ Mimmee Isirayeel yab kaa ti làá ŋá saraabi kí tīī awaa ŋin bi máń ki nántiǹ iŋɔjaayee. Bí taa nyā ti-Dindaan boon kí kɔ́ǹ bi-ba tijɔkɔndi. An sá dibɔkpaal din kaa kpántée ní ki tīī bi nì bi-biyaamu kí nīn pée cá jaanjaan.

⁸ «Á gíti tùkù-bi yii: Isirayeel yab ubɔ àá binicambi bin kóò bi-kansikinee ubɔ yaa là kí ŋá saraawɔkaa àá saraa un ní an yaa pée sée,

⁹ ní kaa cáań dikpafindi tantiu punyɔkɔki nyɔkɔpu kí ŋá saraa kí tīī ti-Dindaanee, bí nyāntí udaan Isirayeel nibul kansikin.»

¹⁰ «Isirayeel yab ubɔ àá binicambi bin kóò bi-kansikinee ubɔ yaa ŋmɔ́ fatikuee, m làá fàtī m-boon kí tīī udaan ní kí nyāntí-u Isirayeel nibul kansikin.

¹¹ Di sá yii kun kamaa cáá kufoouee maŋfal kā fatikun ní, ní man dūu tīī án fíntí ni-kpitii nsaraafan pu. Tiŋman puee fatiku yàntī ní ká ni-kpitii pɔ̄tam, kun puee u-ni ní dimaŋfal bí.

¹² An pu ní man ni-Dindaan bí nimbi Isirayeel yab yii: <Ni-kansikin ubɔ àá binicambi bin kóò ni-kansikinee ubɔ kaa máaǹ kí ŋmɔ́ fatiku.>

¹³ «Isirayeel yab kansikin ubɔ àá binicambi bin kóò bi-kansikinee ubɔ yaa cūtì kukpɔŋu ní ki kūū upeel un baa kòóyee àá kinɔmbiki kin baa kòóyee, ú yàntī upeelee àá kinɔmbikee fatikuu ń nyā kí fá kitiŋ ní ú dū ntam kí bìin̄ fatikuee pu.

¹⁴ Di sá yii kun pée cáá kufoouee maŋfal kā ku-fatikuun ní. An pu ní m bí nimbi Isirayeel yab yii: <Ní taa ŋmɔ́ báà kuwaŋkuluu kubɔ fatikuu, di sá yii ku-fatikuu di sá ku-maŋfal.> Un yaa ŋmɔ́ fatikuee, bí nyāntí-u Isirayeel nibul kansikin.

¹⁵ «Kitindambiki àá unicaan yaa ŋmɔ́ dipeekpil àá upeel un an cúúyee, u máaǹ kí fíntí u-wampeeŋkaati, kí fàl̀, ní ki làá nīn bí tijɔkɔndin kí cáá sāā kujoou. Míǹ boonee ní ú nín nyā tijɔkɔndin.

¹⁶ Ama udaan yaa kaa fíntì u-wampeeŋkaati, kaa fùl̄ muee, udaan ŋá ikpiti ki fōō dibɔkpil.»