Lamentations 5 - UNIMBƆTI NYƆƆBUNDI GBƆŊKU

Isirayeel yab bin bínní kuyuŋunee bíi mèé ti-Dindaan

¹ Ti-Dindaan, taa súntí tin bāań-ti nee pu. Kpèè kí wāl̀ bi nín bí ki sìí-ti puee.

² Kitiŋ kin a tīī-tee kpántì binicambi yaka, biba di kíǹ ki yì ti-diiŋŋi.

³ Ti-baabi kaa ti bí, ti kpántì ataŋkpiibil. Ti-nab kpántì bikpiipoobi.

⁴ Ti dāā ti-nyim ní kí nín ká kí nyɔ̀, ti dāā ti-dɔi ní kí nín ká kí kpāā.

⁵ Bin bí ki sàantí-tee kā ti-pu ní kàti kati, ti-fam tīl̀, taa pée cáá diŋuŋfil báà fiii.

⁶ Ti tàntī ŋŋal Eejipiti nì Asuur timmun watil pú ní kí wàatī kí nín ká tin ti làá jēe.

⁷ Ti-baabi bin nìn ŋá ikpitee kaa ti bí, ní bi-kpitii gìńdi dɔ́miń ki nyīkiǹ timbi pu.

⁸ Iyumbu di jíń ti-pu dinyandi ní ubɔ kpá kí jòoń-ti.

⁹ Biyipɔɔdambi bin bí kuteeunee puee, ti dù ti-maŋfal kí ŋá awoo ní kí nín ká tijin.

¹⁰ Ŋkùm nín cúú-ti tikpil puee, ti-wunti píĺ ní kpaŋkpam kii ti kā dibubulinee.

¹¹ Bi dōoǹ nì binimpoobi mpɔn Siiyɔn tiŋkin, ki dōoǹ nì bisapɔmbi Juuda timmun.

¹² Bi cúú bikàliŋkpilib ki lúntì idɔ pu, kaa dū bijaŋkpilib ki yíiń tiba.

¹³ Binaacimpɔmbi tú tinàti ní mbiyaamu tú idɔbɔɔ ki còom̄ ki gbéetí.

¹⁴ Bikpilib kaa ti kpáfí ki kàal̀ kitiŋ punyɔkɔ nyɔkɔpu ní binipɔmbi gbēeǹ ilan digaal.

¹⁵ Dipɔɔpindi wáŋkì ti-pɔbiliŋin, ti-ŋool kpántì dikpool.

¹⁶ Ti-beefuuliiki nyáń ti-yil pu ki lítì kitiŋ. An sá-ti mbusu ní, kun puee ti ŋá ikpiti.

¹⁷ An di yì-ti ní ti-pɔbiliŋ fōō tiweendi, ní nnyinnyim yāntì ti kíǹ ki kpèé pùuu.

¹⁸ Di sá yii Siiyɔn jool kpántì kuteeu laakin ŋŋɔkɔmu tú ki yìiǹee.

¹⁹ Ama sii, ti-Dindaan, doooo jaanjaan ní a sá ubɔti, ní a-beejal bí ní ki cá abin abin.

²⁰ Ba pu ní a làá súntí ti-pu talku, kí fàtī a-boon kí tīī-ti kí nīn cá jaanjaan?

²¹ Ti-Dindaan, fàtīí gíiǹní-ti a-cee ní ti mun ń gítiń a-cee tiŋman pu. Pɔ̀ntī ti-bimbim tí fàtīí gítiń kii dooooyee ti nín nìn bí puee.

²² A lafun dū-ti ki fá kɔkɔ kpataaa níii? A lafun gíí ti-pu diŋuul tikpil míǹ níii?