Lamentations 3 - UNIMBƆTI NYƆƆBUNDI GBƆŊKU

Un bí nnaabu poonee gbíntìi máká ti-Dindaan pu

¹ M sá unil un di ká dinimbinaamandi mbum min ti-Dindaan fōōyee puee ní.

² Man ní u téé ki līntì u-nyɔkɔpu ḿ còom̀ dibɔmbɔndin, kaa sá ŋwalifin.

³ Man baba tafal ní u dátí baabadal taafaau nì joou.

⁴ U fóofì-mi m-wunti dóò dáká daka, ní ki wīī m-kpabiŋ.

⁵ U dū ntuntun nì agìń ki māntìi gíb́-mi kii digundee.

⁶ U cáá-mi ki kāaǹ dibɔmbɔndi paaŋŋun a lì kii bin kpíì ki dɔ̄ doooodooooyee.

⁷ Ti-Dindaan dū digundi ki māntìi tú-mi ḿ taa ŋmā kí nyā, ki túǹ-mi tikúti tin nyìm̀ee.

⁸ M kúuǹ ki yíiń-u ú dāá jòoń-mi ní u kpáá u-tafaliŋ kaa pílifì m-wimmeem.

⁹ U dū ataŋkpakpaan ki pīiǹ m-saŋŋu ní ki dū-mi ki dī nsaŋkpiti pu.

¹⁰ Ti-Dindaan bí m-cee kii digbiŋgbil di wúliń m-puee, kii gbikinti di nɔ̀kɔ̄ kubambaŋŋun ki cí-mee.

¹¹ U yāntì m fá m-saŋŋu, ní u cúú-mi ki tɔ̄ntì, ki nāaǹ-mi.

¹² U píĺ u-tɔbu ki páaǹ mpiin ki bíitìń-mi.

¹³ U tɔ́ń u-piiŋyi kɔkɔ, ní i dɔ́miń ki yáŋkì m-caŋ ki kɔ́.

¹⁴ Man ní m-nibul kɔkɔ lāā, baabadalee man ní bi gà ilan ki bèel̄.

¹⁵ Ti-Dindaan yāntì m-nyɔkɔ túŋkì, u nyūntì-mi ndabiim.

¹⁶ U tīī-mi itaŋkpabiiti m jú ki wīil̀, ní ki dū ŋfantam ki pùkū-mi.

¹⁷ U lēē m-gbansɔŋfiŋu, m súntì nnaam pu.

¹⁸ Niinee ní m bí yii: an dóò man pu ní, maa ti cáá dimákal diba ti-Dindaan pu.

*

¹⁹ Téetí nnaabu ŋun poon m bée nì takaasi un bíi jīǹ-mee pu. An sá tilool tin tūee ní m bíi nyù.

²⁰ M téetí múlmul, ní an jákatí m-pɔbil.

²¹ Ama tin pu m téetí ki cáá dimákalee sèé:

²² Di sá yii ti-Dindaan ŋanti kaa dóò, u-neendi kaa kúntì.

²³ U-deedeeu pɔ̀ntī ní kutaafaau sá kamaa!

²⁴ M lī m-ban yii: ti-Dindaan di sá man gaajati, úǹ saŋŋu pú ní m kpèé.

²⁵ Ti-Dindaan ŋān̄ bin kpèé u-saŋŋu púee nì bin nyàab̀-uee cee.

²⁶ An ŋān̄ á nīn kā diŋmiŋŋmil ki cí ti-Dindaan jòońtam.

²⁷ An ŋān̄ uninja ń léeń kpancikil u-naacimpɔntin.

²⁸ U yaa bíi dàkà-u min waa lèe, ú cùú kàl̄ ŋkpaanceeti kí nīn ŋmí fɔ́ŋfɔŋ.

²⁹ Ú gbàan̄ u-nimbiin ń cìb̄ dibulin, an yaa yíì u làá ká dimákal.

³⁰ Ú tàntī u-taŋkpanjil kí tīī un là kí fáá-u ntampee, ú nīn fòol̄ asiibil tijin yam ki jīǹ ki díkì.

³¹ Di sá yii ti-Dindaan kaa féeń unil kpataaa pu.

³² Báà u yaa bíi sàantí unil, u làá dāá sɔ̄ u-saai, kun puee u-neendi wīikí tikpil.

³³ An kaa sá yii u-pɔbil poonee an mɔ̄ǹ-u ú sàaǹ inifunaan kí sìntī-bi taapu.

*

³⁴ Bi yaa bíi tà ki mátí kitiŋ pu yumbui kɔkɔee,

³⁵ bi yaa bíi kpèé unil nì u-baamɔŋyi fám un bí yilpu yilpuee nimbilaaliyinee,

³⁶ bi yaa kūū ubɔ bɔti digàndee, ti-Dindaan kaa wāĺaaa?

³⁷ Ŋma di ŋūǹ kí lì dinyɔɔbundi tiba ń nyā kí nīn bí? Ti-Dindaan di lèekī ní án bàńaaa?

³⁸ Ti-Dindaan di kaa lì ní tikpitil nì tiŋan kɔkɔ ŋáańaaa?

³⁹ Too, ba pu ní unil un bí dimaŋfalin min kamaa u sá unikpitee yáliŋkí?

⁴⁰ Tí nyɔ̀kɔfì kí kpèè ti-bimbim kí dàkafì tiŋan, kí gítiḿmaan ti-Dindaan cee.

⁴¹ Tí yòom̄maan ti-ŋalii yilpu kí túĺ Unimbɔti un bí yilpuee kí mèè nì ti-pɔbiliŋ kɔkɔ.

⁴² Taa yúliǹ-si deedee, ti-Dindaan, ti jáń nì si, ní saa dūu pú-ti.

⁴³ A kɔ́ a-ŋuul poon ki yíkìi jìn̄ ti-boon ki kūū-ti kaa súń isaa.

⁴⁴ A dū ditagbandi ki bīiǹ a-ba pu ti-wimmeem ń taa bàń-si.

⁴⁵ A dū-ti ki ŋá anibul kansikin kii titampummool nì tiwan tin bi dūu fée.

⁴⁶ Timbi ní ti-nannanliibi kɔkɔ sòoǹ ki bíiĺ.

⁴⁷ Tin dɔ̄ ki cí-tee di sá dinyoondi nì nnaabu, dinàandi nì sámbu.

⁴⁸ M-nimbiliŋ pùub̀ nnyinnyim sámbu un kɔ́ m-nibulee pu.

⁴⁹ M sūǹ kaa ŋmīlifí, an kaa cáá digbèendi,

⁵⁰ kí nīn cí ti-Dindaan ń kàlīń yilpu kí kpèè kí wāl̀.

⁵¹ M yaa bíi kpèé tin bāań m-nibulee, an wù m-nimbiliŋ ní.

*

⁵² Bin ná-mi fám maa ŋá-bi tibee jì-mi kii m sá kinɔmbikee.

⁵³ Man nì m-nimbiliŋ yéè ní bi dū-mi ki tɔ́ dilɔkɔgindin ki dū ditaŋkpal ki tɔ́nní-mi.

⁵⁴ Ní nnyim jɔ́m̀ ki bīiǹ m-yil pu ní m bí yii an dóò man pu dee.

⁵⁵ Kubɔbiku gbanti poonee, m kúuǹ ki yíiń sii ti-Dindaan.

⁵⁶ A gbìl̄ m-nyɔkɔ pu m nín lī yii: «Taa kpáá a-tafal, pīlifì m-kuŋkuuntii nì diniindi din m fátée.»

⁵⁷ M nín kúuǹ ki yíiń-see, a sútìń ki pìl̄-mi ní ki bí-mi yii: «Taa fàŋkì.»

⁵⁸ M-Dindaan a mɔ́tì m-pu ní ki fīī-mi ki líì.

⁵⁹ M-Dindaan, a ká agìń ŋin poon binib kɔ́ǹ-mee, pɔ̀-mi!

⁶⁰ A ká ipɔntoon in bi tɔ̀n̄-mee, ki ká bi nín búkú m-pu tiŋyee.

⁶¹ M-Dindaan, a gbìl̄ bi nín sìí-mi puee, nì bi nín sòon̄ ki búkú m-pu puee.

⁶² M-nannanliibi dàkafī m-pu tibɔkpitil ŋma ní, ní ki sòoǹ ki tòó m-pu baabadal.

⁶³ Kpèè, bi yaa kāaa, bi yaa yúɔɔɔ, man bɔti di sá-bi ilan bi gà.

⁶⁴ Ti-Dindaan, pà-bi tin bi ŋá-mee paati.

⁶⁵ Kí pɔ̄ɔkì bi-pɔbiliŋ mbusu ń kɔ́-bi.

⁶⁶ Nì a-ŋuul poon ní a làá jà bi-boon, kí céetí-bi kitiŋ pu.