Lamentations 2 - UNIMBƆTI NYƆƆBUNDI GBƆŊKU

Ti-Dindaan ŋá Jeerusaleem yab kii u sá bi-nannanliuee

¹ Mana ní ti-Dindaan fōō diŋuul ki kpátì dibɔmbɔndi ki bīiǹ Siiyɔn tiŋki pu míǹ. U téeń doooo yilpu Isirayeel yab nyooti ki lúkuń kitiŋ pu. U nín fōō siiyɔn pu mbum miŋyee, waa ti kpáàa nyí laakin u-taaŋi tɔ̄kɔntée pu.

² Ti-Dindaan nyīī u-nibul Jaakɔb yab ki múĺ kaa súń bi-saai. U nín fōō mbum miŋyee yāntì u kpéelikì Juuda yab timmu mun bi máń agun ki māntìi túee. U lábitì abee nì bikpootiliibi ki cìb̄ kitiŋ, ki kpēē-bi fám.

³ U nín fōō mbum miŋyee yāntì u nāaǹ Isirayeel yab pɔŋyi kɔkɔ. Ti-Dindaan kaa ti fìil̄-bi binannanliibi ŋaan. Ama u tūū ŋŋmi ní an wùn̄ ki māntìi tú-u.

⁴ U píĺ u-tɔbu ki tāntì kí tɔ̄ kii unannanlee. U tɔ́ ki kūū tin kɔkɔ nìn pée ŋān̄ nnimbikpeeyee. U fīitì u-bum kii ŋŋmee ki pɔ̀l̄ Siiyɔn nimbɔtidiiku kun cáá kunyaaŋŋuee pu.

⁵ Ti-Dindaan ŋá Isirayeel tiŋki kii kì sá u-pulincɔntee. U gbáń ki wīī ki-beeciŋŋi kɔkɔ ki kpīkitì ki-guŋŋi ŋin kì máń ki dūu cíitì ki-bee, ní ki dū nnaabu nì dinimbinaamandi ki yàl̄ Juuda tiŋki kɔkɔ pu.

⁶ U ŋá mpɔn ki kɔ́ u-naabakakun ki kpītì u-paaŋŋu ŋun pu ti nì u kpáfée. Ti-Dindaan yāntì bi súntì Siiyɔn tiŋkin mpaan ŋun pu ti kpáfée nì ŋwiŋŋuŋfikaa pu. U nín fōō mbum miŋyee yāntì u kpēē ki sīŋkiǹ ubɔti nì bisaraaŋaliibi.

⁷ Ti-Dindaan fá u-saraafaŋŋu, waa ti là u-circir kɔŋkooŋŋu. U dū dibeecindi guŋŋi ki ŋá unannanli ŋaan, ní bi kūuntí kunimbɔtidiin kii jiŋaal wiiŋŋuee.

⁸ Ti-Dindaan lēē yii u làá wīī agun ŋin wúń Siiyɔn tiŋki yab puee. Waa làá tàan̄, u làá kpēelikì-ŋi ŋí taa ti nín̄ bí. U fáá agunliitil ní ŋi lítì.

⁹ Kitiŋee gundi punyɔmmu lítì, ti-Dindaan wīī mpunyɔmu kpàlkaati. Bi cáá ki-bɔtiu nì ki-yidambi ki cūnnì nnicantimun kuyuŋu. Ubɔ kaa ti bí kí dàkà marab. Ti-Dindaan kaa ti lèekī tiba ki dàkà u-bɔnaatiliibi.

¹⁰ Siiyɔn tindaŋkpilib tātìi kā kitiŋ dikru. Bi kā ki pēē kpɔsatab ntam pùkū bi-yiliŋ. Jeerusaleem sapɔmbi yiliŋ tīī kitiŋ.

*

¹¹ M wīī nnyinnyim ki gīī, m yaa kpēē tin bāań m-nibul puee ní an cúú m-poon kí kùtī, m-poon kaami cɔ́tì. Di sá yii mbiyaamu nì nnaŋgbammamu bí ki kúù imɔŋkijaa pu.

¹² Mu bàlifī mu-nab yii: «La ní ti làá nín ká tijin kí jī kí ká nnyim kí nyɔ̀ dee?» Mu kúù mu-nab ŋaan kii bin fōō tiweendi kujaaunee nín kúù puee.

*

¹³ Jeerusaleem, maa ti nyí tin m làá sòoǹ nì see! Tiba kaa bí ń dūú ŋmàntīǹ tin poon a bí nee kí dūú sɔ̀ŋkì a-pɔbil, Siiyɔn yab. Nnaabu ŋun jéetì a-puee sá ŋkpaan ki jítiǹ tiŋku. Ŋma di ŋūǹ kí cáaǹ-si.

¹⁴ Bibɔnaatiliibi cáá tinyimɔmbɔti tin kaa bí tibanee ní ki nàatī-si. Baa bìitī a-bɔɔŋŋi pu á bàà kpántí a-bimbim. Tin an lēē ki dàkā-bi a-puee sá nnyimɔn ní, bíǹ di náań-tì.

¹⁵ Jeerusaleem, bin kɔkɔ jītí a-ceeyee kpáafí abaal bi nín nàn̄-si kunaauee pu, ní ki búǹ ifoon ki gbákafí diyil. Bi sòoǹ Jeerusaleem pu yii: «Kitiŋ kinyannyaaŋŋi dándan kin tìì duulinya kɔkɔ dipɔɔsɔŋkilee deeee?»

¹⁶ Sii pu ní a-nannanliibi kɔkɔ sòoǹ ki bèel̄, ki ŋmóò bi-nyiŋŋi nyànya ki lì yii: «Ti nyīī-u ki múĺ, ŋwiin ŋun ti nyàab̀ee bāań dee, ti bí ki wāĺ-ŋu.»

¹⁷ Ti-Dindaan ŋá min u nìn sòon̄ ki yóoǹ doooodooooyee yii u làá ŋée, u kpéelikì kaa súń isaa. Nnaabu ŋun poon u kɔ́ǹ-nee pu ní unannanli bí ki fàal̀ ní ki gbéeǹ ni-nannanliibi mpɔn.

*

¹⁸ Siiyɔn nib, kúum̀maan nì iyaliŋki ti-Dindaan nimbiin. Digundi din bi máń ki māntìi tú kitiŋee, yàntī a-nyinnyim ń nīn pùub̀ ŋwiimpu nì kunyeeu kii mbunee. Á taa ŋùŋfì, kí taa gbèen̄ nsiim.

¹⁹ Yīkì kunyeeu kí nīn tíminsí, kí sòoǹ a-pɔbilin bɔti kɔkɔ ti-Dindaan nimbiin. Yòon̄ a-ŋalii kí túĺ u-watil, kí fīī a-biyaamu mun di bí isantaan kɔkɔ pu ki kúù ŋkùmee.

*

²⁰ M-Dindaan, kpèè tibɔti nee soooo! Ŋma ní a ŋá kii a nín ŋá man pu na? Ubinaati ŋmóò u-poon biki kinaŋgbammaŋ kin u néeńeeee? A kíikí bí kpɔ̀ bisaraaŋaliibi nì a-bɔnaatiliibi a-circir kɔŋkooŋŋunaaa?

²¹ Bijaŋkpilib nì mbiyaamu dɔ̄ adan pu tàb tab. Bi dū ntàataajimu ki kūū m-sapɔmbi nì m-naacimpɔmbi. A-bum wiiŋŋu dalee, aa súń bi-saai, a pɔ̄fì-bi ki lāntì-bi.

²² A yíiń m-kɔŋkɔnaatɔb bin m fàŋkí yɔ́kɔ́ yɔkɔee ki kpáfì kii jiŋaal wiiŋŋuee. Ní daliŋkin ti-Dindaan fīitì u-bumee, báà ubɔ kaa ŋmátì. Uniseen kaa kíǹ ki bí dimaŋfalin. M-nannanliu dɔ́miń ki kúntì bin m kpāā, ki néeń-bi tiŋanee.