Joël 3 - UNIMBƆTI NYƆƆBUNDI GBƆŊKU

Ti-Dindaan Fam làá kpákatiń

¹ Míǹ boonee, m làá dāá yàntī m-Fam ń kpákatiń unil sá kamaa pu. Ni-jipɔmbi nì ni-bisalib làá dāá kpántí m-bɔnaatiliibi. M làá dāá sòoǹ nì ni-jaŋkpilib tidamintiil poon, ní kí dāá lēē m-bɔti kí dàkà ni-nipɔmbi.

² M làá dāá yàntī m-Fam ń kpákatiń kí kpáaǹ iyumbu bininjab nì binimpoobi pu.

³ M làá dāá yàntī maamaacikpaambi ń nyā kutagbɔŋu nì kitiŋ pu. Fatiku nì ŋŋmi nì nnyiim tagbaŋŋi làá dāá nyā.

⁴ Ŋwìiń dāa kpántí dibɔmbɔndi ní uŋmal ń dāá mántí kii fatikuee, kí wàatī ní ti-Dindaan wiiŋŋu ń nín bàń. Dinyoondi nì ŋwiŋkpaan dal dee ŋu-baba.

⁵ Niinee, un kamaa yaa láa kúuǹ ki yíiń ti-Dindaan yindee dāa kāntí difiil. Di sá yii Siiyɔn jool pu, Jeerusaleem tiŋkinee, biba làá dāá ŋmátí kí nyā nnaabu gbantin, kii ti-Dindaan nín lī puee. An dāa sá bin ní ti-Dindaan dāa yíińee ní.