Joël 1 - UNIMBƆTI NYƆƆBUNDI GBƆŊKU

¹ Ti-Dindaan di sòon̄ nì Peetuweel jipɔɔn Jooweel tibɔti nee.

Inaakitoon nì ŋweel bɔti

² Nimbi bikpilibee, ní pīlifìmaan! Ní ŋátímaan ni-tafaliŋ kí pīlifì, Juuda yab kɔkɔ! Tin bí nee juti jítì ni-yuntii nee poon ni káaa, àá tì jítì ni-naanjab yuntii ni gbìl̄ ní?

³ Ní dūú māafìmaan ni-biyaamu. Ni-biyaamu mun ń dāá dūú māafì bi-biyaamu, ní bi-biyaamu ń dāá dūú māafì bi-boon yab.

⁴ Tijin tin anaakitɔmbil ŋmɔ́ ki kíǹee, inaakitoon dūu ŋmɔ́, tin ní inaakitoon ŋmɔ́ ki kíǹee, inaakicaan dūu ŋmɔ́, ní tin ní inaakicaan ŋmɔ́ ki kíǹee, inaaki dūu ŋmɔ́.

⁵ Bidanyɔgbiliibi, fìntīmaan kí nīn sūǹ. Nín̄ yáliŋkímaan, nimbi bidanyɔliibi kɔkɔ. Di sá yii naa ti làá ká ndapɔm kí nyɔ̀.

⁶ Ditimbundi diba nib bíi jáà nì m-tiŋki. Bi pɔ̄ɔ̄ ní ki wīikí baa ŋūǹ kí kàaǹ-bi. Bi-nyiŋŋi bí kii gbikinti nyiŋŋee ní, ní bi-nyɔɔkpaweeŋyi bí kii ugbikintisal yaŋee.

⁷ Bi yāntì m-fiinyi kpaabu kpántì kii kuteeuee, bi bíil̀ m-fiigi sufii kɔkɔ múb. Bi ŋmɔ́ ki lēē i-pɔkɔti kɔkɔ, ki yāntì i-pammu kíǹ ki pīiǹ kpáu.

⁸ Nín̄ yáliŋkímaan kii usapɔɔn un dáá pée mɔ́ǹ ní u-cal kpíì u kā dikpoolee.

⁹ Baa ti cáǹ tijimpin saraau nì ndaam saraau ti-Dindaan diikun. Bisaraaŋaliibi bin sá ti-Dindaan tɔntɔnliibee kā dikpool.

¹⁰ Bi bíil̀ tisati, kitiŋ kɔ́ kunimbaaun. Tijin gíti kpáaa, ndapɔm gíti kpáaa, ŋkpam mun gúń.

¹¹ Bikpaabi wunti yɔ̄tì. Bin kù fiinyee yáliŋkí ɔɔji nì bilee pu, di sá yii tikpaajin kpá bí cā.

¹² Fiinyi kūń, ní fiigi sufii fáaḿ. Greenaadi sufii nì ibafi nì pɔɔmi sufii, an dàkà yii kusaaun sufii kɔkɔ kūń. Dipɔɔpindi wáŋkì binib kansikin.

Binib ń bóob́ kinyɔkɔ kí gbàam̀ ti-Dindaan

¹³ Bisaraaŋaliibi, dūmaan kpɔsatab kí pèen̄ kí nīn sūm̀maan. Nimbi bin tūǹ nsaraafan pu tundee, nín̄ yáliŋkímaan! Nimbi bin sá m-Nimbɔtiu tɔntɔnliibee, dūmaan kutuku kí pèen̄ kutaa ń wúntí. Di sá yii baa ti cāabìń tijimpin nì ndamam saraau ni-Nimbɔtiu diikun.

¹⁴ Bɔ́ntímaan ni-ba kí bóob́ kinyɔkɔ, yíiḿmaan binib bí kóoǹ kí kpāfì. Ní kóom̀maan bitindaŋkpilib nì bin kɔkɔ kóò Juuda tiŋkinee kí kpāfì ti-Dindaan ni-Nimbɔtiu diikun, ní kí kúuǹ kí yíiń ti-Dindaan.

Ti-Dindaan wiiŋŋu dal

¹⁵ Óooo! Ba wiiŋŋu ŋúǹ bulifi dee! Ti-Dindaan wiiŋŋuee tóobiń. Ŋu dòoń kí nàan̄ tikɔkɔ, ŋu làá nyānní Mpɔŋkɔdaan cee ní kí dāan̄.

¹⁶ An kaa sá ti-nimbilaaliyin ní tijin wáŋkì, ní mmɔn nì dipɔɔpindi yíkì ti-Nimbɔtiu diikunaaa?

¹⁷ Iwambool in bi búĺee dōoǹ kitiŋin ki sūū. Cakalaabi poon kūń, adiin ŋin poon bi kpáafí tijinee lítì, di sá yii bilee kaa ti bí.

¹⁸ Pīlifìmaan tiwaŋkuti nín bí ki yáliŋkí puee! Inaa kaa ti nyí laakin pú i làá túĺee, di sá yii timool kaa ti bí í ŋmɔ́. Ipii gba bíi jīǹ falaa.

Unimbɔti bɔnaatiliu bíi mèé

¹⁹ M-Dindaan, sii ní m kūuntí ki yíì! Di sá yii ŋŋmi wùn̄ kuteeu pu mooti, aŋmilimbil wùn̄ kusaau sufii kɔkɔ.

²⁰ Ipeel gba fèefī ki nyàab̀-si, di sá yii ibun fóotì. Ŋŋmi wùn̄ kuteeu pu mooti.