Jérémie 9 - UNIMBƆTI NYƆƆBUNDI GBƆŊKU

Ibaamɔn dóò

¹ M bàà là kí nīn bí kuteeun laakin bisaŋkinliibi túutée! M bàà làá dū m-nibul nee kí fá kí cùú nīn bí niin ki dátiǹ-bi. Di sá bi-kɔkɔ sá bilaakpaadambi, ki nyēē binib boon.

² Ti-Dindaan bí yii: «Bi-limbiliŋ bí kii butɔbu bun bi dáaĺee ní. Bi dū nnyimɔn ní ki jíń dibeel kitiŋ pu, kaa sá mbaamɔn. Bi ŋáań ikpiti ní kaa gbèentí, ama baa nyí-mi.

³ Báà ŋma ń nīn nyí nì u-ba nì u-bɔɔ. Ubɔ ń taa nín̄ máká u-nabiki pu, di sá yii kì ŋūǹ kí kīil̀-u ní ubɔɔti mun ŋūǹ kí kūŋfì u-boon.

⁴ Báà ŋma kíiĺ u-juti, ubɔ kaa sòoǹ ibaamɔn. Bi mántì kí nīn mɔ́ntí. Bi-tuŋkpitiŋ puee baa ti ŋūǹ kí gítiń m-cee.»

⁵ Ti-Dindaan bí yii: Bi ŋáań tipɔmbɔti kaa gbèentí, ki mɔ́ntí inyimɔn ki bùsī. Bi yíití kaa là kí béé-mi.

⁶ An pu ní ti-Dindaan Mpɔŋkɔdaan bí yii: «M làá dū-bi kí ŋá ŋŋmin kí ŋá-bi circir, ní kí cɔ̄ŋkì-bi kí kpèè. Ba ní m gíti ŋūǹ kí ŋá nì m-nibul nee kpitii?»

⁷ Bi-limbiliŋ bí kii nlɔpiinee ní, tinyimɔmbɔti ŋma di nyēē bi-nyɔmmun. Bi-nyunculiŋ pu ní bi sòoǹ nì bi-juti yii ŋgbansɔŋfi ń nīn bí u-cee, ama ní bi-pɔbiliŋ poonee, bi pīil̀ udaan kutaliŋŋu.

⁸ Ti-Dindaan bí yii: «Kii tin bí nee kɔkɔ puee, m taa dáaĺ bi-tafalaaa? M taa tɔ̀ ditimbundi din bí kii di neeyee ipɔntoonaaa?»

Nsiim nì iyaliŋki yuntiŋu

⁹ M bí ajoon pu ki sūǹ ki yáliŋkí, m bí ki gà kunaakpaapɔɔu ikpiisilan. Baa ti gbìl̀ tiwaŋkuti siim pu. Inoon nì tiwaŋkuti kɔkɔ sáǹ. Báà tiba kaa ti bí.

¹⁰ M làá yàntī Jeerusaleem ń kpántí ataŋkpakpuku, laakin sinsiŋkub làá nīn kóòyee, ní kí yàntī Juuda timmu ń kpántí kuteeu, laakin binib kaa làá nīn gíti kóòyee.

¹¹ Unil ubɔ bí ki cáá iciin ki ŋūǹ kí gbìl̄ tibɔti nee taapuɔɔɔ? Ti-Dindaan yaa sòon̄ nì udaanee, ú tùkū-ti kun pu ní bi nāaǹ kitiŋ nee, ki wùn̄-kì ŋŋmi kì kpántì kii kuteeu ubɔ kaa ti jītí niinee.

¹² Ti-Dindaan bí yii: «Kun pu tin bí nee bāań-bee di sá yii bi dū marab bin m tīī-bee ki fá. Baa pílifiǹ-mi kaa nóó-mi.»

¹³ Ama bi nóó bíǹ bi-ba landɔkɔi ní. Bi-baabi nìn dàkā-bi awaa ŋin bi yíì Baalee, ní awaa gbanti ní bi nóó.

¹⁴ Too, ti-Dindaan Mpɔŋkɔdaan, Isirayeel yab Nimbɔtiu bí yii: M làá tīī kisubiki kin tū ki cáá tiloolee bí ŋmɔ́, ní kí tīī-bi nnyim min cáá ndabiimee bí nyɔ̀.

¹⁵ M làá jà-bi bí yàl̄ kí kɔ́ atimbun ŋin bíǹ bi-ba kaa nyáaa, bi-naanjab mun kaa nìn nyée poon. M làá dū ajanjakiti kí páań bi-boon, ŋí kpɔ̀ kí céetí-bi.

¹⁶ Ti-Dindaan Mpɔŋkɔdaan bí yii: «Bɔ́ntímaan kí yíiń binimpoobi bin sūǹee bí dāan̄ kí sɔ̄. Ní nyàab̀ bimɔmmɔntiibi!

Isirayeel nibul

¹⁷ Bí yáb́ malaa. Bí gāā-ti ikpiisilan! Nnyinnyim ń gbí ti-nimbiliŋin. Ti-niŋgbunti ń díkí nnyinnyim ń nīn pùub̀!»

Yeereemii

¹⁸ Ti gbìl̄ Siiyɔn pú ikpiisilan pu. Bi nāaǹ-ti! «Ba cooi bulifi poon ní ti bí na! Ti làá yīkì kí fá ti-tiŋki, di sá yii bi kpéelikì ti-diiŋŋi.»

¹⁹ Nimbi binimpoobee, pīlifìmaan ti-Dindaan nyɔɔbundi nee. Ní ŋátí ni-tafal kí pīlifì u-nyɔɔbundi! Ní dàkà ni-bisalib ŋkpiisilan nee, báà ŋma ń dàkà u-kɔŋkɔnnaatɔ iyaliŋki laŋŋu nee:

²⁰ «Di sá yii ŋkúm dàb̄ ti-tɔkɔlab ki kɔ́ ti-pu, mì kɔ́ ti-dinyaaŋŋin. Mì yōoǹ ti-biyaamu adan pu, ki yōoǹ binipɔmbi sampaambi pu.»

ti-Dindaan

²¹ «Sii Yeereemii, gíti sòoǹ tin ti-Dindaan lēe yii: <Anikpil dɔ̄ kitiŋ fìlfil kii tinaabin ní bi bíl̀ kusaaunee. Ŋi náań nì idifin in bicaliibi cáń ki bíl̀ ubɔ kaa pá bi-boon ki kōontée.>»

Iciin in sá tiŋman pu yayee

²² Ti-Dindaan nín sòon̄ puee sèé: «Uciŋfiti ń taa nín̄ yòontí u-ba u-ciiŋyi pu. Upɔndaan ń taa nín̄ yòontí u-ba u-pɔŋŋu pu. Ugaaja ń taa nín̄ yòontí u-ba u-gaajati pu.

²³ Ama ubɔ yaa làá yòon̄ u-ba yilpuee, án nīn sá u nín ká dinyil ki béè-mee pu. Di sá yii man ni-Dindaanee, m cáá disaasɔl ní ki ŋáań tin dɔ̄ nsan ki bí deedeeyee kitiŋ pu. Tíǹ di fáatì-mi.» Ti-Dindaan di lī míǹ.

Bin kaa gíí dikpancandi tiŋman pu yalee

²⁴ Ti-Dindaan bí yii: «Ŋwiin ŋubɔ dòoń m làá tāā kí bīikì bin gíí dikpancandi ŋwuŋgban pu gíitamee pu,

²⁵ an dàkà yii Eejipiti yab nì Juuda yab nì Eedoom yab nì Amɔn yab nì Moowaab yab nì bin kɔkɔ kòol̄ bi-gatikii ki kóò kuteeunee. Di sá yii anibul gbanti kɔkɔ kaa gíí tiŋman pu gíitam, ní Isirayeel yab bi-ba kaa gíí bi-pɔbiliŋ.»