Jérémie 8 - UNIMBƆTI NYƆƆBUNDI GBƆŊKU

¹ «Ti-Dindaan bí yii: <Ŋyunti gbantee, bi làá dāá nyāntiń Juuda yab bɔtiibi nì bi-kàliŋkpilib nì bisaraaŋaliibi nì Unimbɔti bɔnaatiliibi nì bin kóò Jeerusaleemee kpabiŋ akaakul poon.

² Bi làá dāá dū akpab gbanti kí yàl̄ an kɔkɔ pu ŋwìiń nì uŋmal nì iŋmalbijaa in bitaŋkpiibi gbanti nìn néeń, ki jáaḿ, ki nóó ní ki bàlifēe nimbiin. An pu ní ubɔ kaa dāa gíti kōontí akpab gbanti kí gíiǹ-ŋi kí ŋá akaakulin. Ama ŋi làá dāá dòon̄ kitiŋ kí kpántí ntiŋkpam.

³ Binikpitib nee kansikin bin yaa láa kíǹ ki bí dimaŋfalinee dāa lì yii ŋkúm sɔ́ǹ dimaŋfal.> Ti-Dindaan Mpɔŋkɔdaan di lī míǹ.»

Ti-Dindaan nibul kaa ti là kí gítiń u-cee

⁴ «Á tùkù-bi yii, ti-Dindaan nín lī puee sɔ̀. Unil yaa lítèe, waa ti yíkáaa? Unil yaa yīntì nsanee, waa gítiń u-boonaaa?

⁵ Ama ba pu ní Jeerusaleem yab yīntì nsan, ní ki gbíntìi nìkì ki fàtī bi-boon ki tìì man ní? Binib gbanti dū bi-ba ki yá ki nákáǹ awaa ní ki yíì kaa là kí fàtīí gítiń m-cee.

⁶ M pílifì tin bi sòoǹee tiŋan, ní tin bi sòoǹee kaa cáá taapu. Ubɔ kaa pée lēē kí fá u-tuŋkpitiŋ. Bi-kansikin ubɔ kaa bàlifī u-ba yii: <Ba ní m ŋá nee?> Bi-kɔkɔ fātìi kíĺ bi-taatandi, a lì kii utaŋwaati di bí kujaaunee.

⁷ Áli gba naakpaapiimbi bin ŋàaǹ kutaa puee nyí ŋyunti ŋun sá bí yīkì kí búntée. Ananjil nì jikpaasib nì ŋkoosiyaakpaamu nyí bi-yuntii kí gítiń. Ama m-nibul kaa nyí kí nóó man bi-Dindaan marab bin m síiǹ-bee.»

⁸ Mana ní ni ŋūǹ kí lì yii: «Ti sá biciŋfitiibi, ti-Dindaan marab bí ti-cee?» Di sá yii bimaradakaliibi bin fàtīi ŋmà marabee sá binyimɔndambi ní ki kpántí marab gbanti.

⁹ Biciŋfitiibi gbanti dū ti-Dindaan marab ki fá. Mimmee bi-ciiŋŋu gbanti gíti bí tilatin? Icoo cúú-bi gbòooo. Dinyoondi kɔ́-bi ní an sàl̄-bi kii kutaliŋŋuee.

Binib bí ki sòoǹ yii tikɔkɔ còom̄ tiŋan

¹⁰ An pu ní ti-Dindaan bí yii: «M làá dū bi-nimpoobi kí tīī biba, kí dū bi-sati kí tīī bin làá dāá fōō-tèe. Di sá yii kí yòon̄ bikpaambi kí tin sāā ŋwaamuee, bi-kɔkɔ bìǹ ki nyàab̀ njim ní. Kí yòon̄ Unimbɔti bɔnaatiliibi kí cáá sāā bisaraaŋaliibee, bi-kɔkɔ cáá inaamuul ní.

¹¹ Bi cáá m-nibul naabuŋu ki ŋáań bugbambu ní ki lì yii: <Ŋgbansɔŋfi bí! Ŋgbansɔŋfi bí!> Ama ní ŋgbansɔŋfi kpá.

¹² Ntimbiil tuuŋŋi ŋin bi tūǹee, an kɔ́ǹ-bi icoooo? Aayee, kpataaa! Baa kpáàa nyí gba yii bi ŋá tiba.» Ti-Dindaan bí yii: «An pu ní bi làá kūtì bin bíi lítée pu bí lítí. M yaa láa tāā ki bíikì bi-puee, bi làá dāá ká yii bi dɔ̄ kitiŋ ní.»

Dimákal kaa ti bí ti-Dindaan

¹³ Ti-Dindaan bí yii: «An yaa ŋmāntì ḿ kìtī asubil bi-ceeyee, maa kāntí fiinyi pu abilaaa, kaa kāntí fiigi pu abil. Tifaal gba kūń, m làá dū-bi kí fìtīǹ bisanjitiliibi.»

Isirayeel nibul

¹⁴ «Ba pu ní tí nīn kā kaa cìŋkī? Tí kóoǹ kí kpāfì, kí cùú kɔ́ ntimu mun bi máń digundi ki túee poon, kí nīn kíǹ ki kā ki cí ŋkúm. Di sá yii ti-Dindaan ti-Nimbɔtiu yāntì taa ti ŋūǹ kí cìŋkì ti-ba, ní ki yàntī ti nyù nnyim min cáá ndabiimee, kun puee ti yīntiǹ-u.

¹⁵ Ti bàà kā ki cí ŋgbansɔŋfi, ama kaa ká tiwammɔntiil tiba. Ti bàà kā ki cí kí ká dicáaǹdi, ama tifaandi di dɔ́miń.

¹⁶ Binannanliibi bāań Daani tiŋkin ki dóò. Ti gbìl̄ itanjaa nín fèefī doooo kitiŋ gbantinee. Kuwoou kun bi ŋáańee yāntì kitiŋ kɔkɔ cīŋkì. Bi dòoń kí nàan̄ kitiŋ nì ki-nib, kitiŋee nì bin kóò ki-puee.»

ti-Dindaan

¹⁷ «M làá dū ikoobu in cáá tilool ubɔ kaa cáá i-naajuukee ní kí tɔ̄ ni-pu ní í jūntì-ni», ti-Dindaan di lī míǹ.

Yeereemii timinsii Yeereemii

¹⁸ Tiba kaa bí ki ŋūǹ kí cáaǹ m-nimbaaku, m-poon kaam cɔ́tì.

¹⁹ Pīlifìmaan, m-nibul di kūuntí ki nyàab̀ dijòońdi doooo kitindandatii poonee. Ti-Dindaan kaa ti bí Siiyɔn tiŋkinaaa? Siiyɔn kaa ti cáá ubɔtaaa? Ba pu ní bi cáá bi-waaŋi ki gbítí m-ŋuul, awaa ŋin kaa bí tiban ki nyánní laabee?

ti-Dindaan

²⁰ Tijincakaal yuntiŋu jítì, dipeel jítì, ama nì díǹ, taa láá ká difiil.

²¹ M-nibul nín kɔ́ dinimbinaamandi din poonee cɔ́tì m-poon kaam. Kunimbaau kɔ́-mi, maa ti nyí tin poon m bée.

²² Isufi in bi cáa cāantí iweenee kaa bí Galaadi tiŋkinaaa? Ucaanli ubɔ kaa bí niinaaa? Kin ba pu ní nì díǹ m-nibul buuŋŋu kaa bíi kúù?

²³ M yaa bàà ŋūǹ kí dū m-yil kí kpántí dinyimbunimbil kí dū m-nimbiliŋ kí kpántí nnyinnyim nyimbuliŋu, m bàà làá nīn sūǹ m-nibul yab bin kpíìyee pu ŋwiimpu nì kunyeeu ní.