Jérémie 51 - UNIMBƆTI NYƆƆBUNDI GBƆŊKU

¹ Ti-Dindaan nín sòon̄ puee sèé: «M làá cáań kubuŋu kun nàantée kú jītí Babiloon tiŋki nì ki-nib pu.

² M làá cáań binicambi kí tɔ̄ ki-pu ní bí jà ki-nib kí yàl̄ kii kubuŋu nín yòontí tifeel kí fá puee ní. Bi làá nàan̄ kitiŋee. Dinimbinaamandi dalee, bi làá màntī kí tū-kì ijaan kɔkɔ pu.»

³ Bipintɔliibi ń tɔ̄ binannanliibi pintɔliibi. Binannanliibi ń taa nín̄ pùlifī bi-gbampɔɔŋi pu! Ní taa yàntī bi-janjapɔmbi ubɔ ń ŋmátí! Ní nàan̄ bi-janjakitil kɔkɔ!

⁴ Bin fōō tiweendee làá dāá nīn dɔ̄ Kaldee tiŋkin fìlfil, ní bin bi làá kpɔ̀ kujaaunee ń dāá nīn dɔ̄ adan pu tàbitab.

⁵ Di sá yii ikpiti in bi ŋá Isirayeel circir Nimbɔtiuee gbí bi-tiŋki. Ama Isirayeel nì Juuda Nimbɔtiu un sá ti-Dindaan Mpɔŋkɔdaanee kaa kpíì ki fá-bi.

⁶ Sāǹ kí nyāmaan Babiloon tiŋkin, báà ŋma ń sāǹ kí fīī u-ba! Niinee naa làá kpú ki-kpitii pu. Di sá yii ŋyunti bāań ti-Dindaan ń tɔ̀ ipɔntoon, u làá pà bi-paati nín máaǹ puee.

⁷ Babiloon nìn sá kii sindaariya kɔŋkɔnnyɔkaau ní ki kā ti-Dindaan ŋaan. Kì nìn yàntī kitiŋ pu nib kɔkɔ nyù ki gbéè. Atimbun nib nìn nyù ki-daam ní bi-yiliŋ ń lábití.

⁸ Ama dicilpu dicilpu ní Babiloon lítì ki wúkul̀. Yāliŋkìmaan ki-pu! Nyàab̀maan ŋkpam kí ŋá ki-buuŋyi, an yaa yíì kì làá pɔ̄ɔkì.

⁹ Ti pɔ́ɔǹ kí bàà cáaǹ Babiloon tiŋki, ama ní kàa pɔ́ɔkì. An puee tí yàntī-kì! Báà ŋma ń nīn gítí u-tiŋkin. Tiŋman, ditafadaaldi din lítì ki-puee nyìm̀ tikpil, di jɔ́m̀ ki tin tūū kutagbɔŋu, di tūū atagban.

¹⁰ Ti-Dindaan pɔ̀n̄-ti. Tí cùmaan Siiyɔn tiŋkin kí māafì atuun ŋin ti-Dindaan ti-Nimbɔtiu túnnée.

¹¹ Ti-Dindaan bɔ́ntì kí nàan̄ Babiloon tiŋki. An pu ní u tīī Meedi yab bɔtiibi kunyannyaau bí ŋá u nín bɔ́ntì puee. Ti-Dindaan bíi tɔ̀ ipɔntoon, u bíi tɔ̀ u-diiku pɔntooŋyi. Lòom̄maan ni-piiŋyi, ní gbéem̀maan ni-baataŋŋi.

¹² Ní cóoḿmaan kujaau daaŋku ŋaabiki digundi din bi máń ki tú Babiloon tiŋkee pu. Ní kūtì bijanjaliibi bin cée wíiŋŋu pu! Ní nyàab̀ bijanjaliibi kí síiń sintil, Ní dū bijanjaliibi kí nákań nákań. Di sá yii ti-Dindaan nín bɔ́ntì kí ŋá puee, u làá ŋá míǹ, u làá jáǹ Babiloon yab.

¹³ Sii Babiloon un di kóò dimɔɔkpaandi gbandee, sii un di cáá tigaajati tikpilee, an dóò a-pu dee.

¹⁴ Ti-Dindaan Mpɔŋkɔdaan pūtì úǹ u-ba ki lī yii: «M làá yàntī binib bin wīikí kii inaakitoonee ń gbáb́ kí bìin̄ a-pu. Bi làá kúuǹ a-pu ijanjakuŋkuunti.»

¹⁵ Ti-Dindaan dū u-pɔŋŋu ní ki náań kitiŋ, ní ki dū u-ciiŋŋu ki bíl̀ duulinya ní u bá ki pɔ̄ɔ̄, ní ki dū u-nyil ki kpátì kutagbɔŋu ki dāntì kutaa pu.

¹⁶ U tīī mara ní inyiŋfi kóoǹ ki kpáfì yilpu, ní atagban nyánní kitiŋ kúntinyɔkɔ ki jɔ́m̀. U yāntì utaa ŋmɔ́ ní ki nìn̄. U yāntì kubuŋu nyánní ku-walimbookun.

¹⁷ Án làá dāá ŋá binib bitii, ní bí nīn yú kaa gbìl̀ taapu. Icoo cúú bin dùntī tikúti ki mɔ́ɔ̀ awaayee. Bi-waaŋi gbanti sá tinyimɔŋwan ní, ŋaa cáá kufoou ŋi-ni.

¹⁸ Ŋaa pée bí tiban, ki mɔ̄ tilaal, ditafadaaldi wiiŋŋu dalee, ŋi làá dāá wāŋkì.

¹⁹ Ama Unimbɔti un sá Jaakɔb gaajatee, kaa bí kii ŋi nín bí puee. Úǹ di sá duulinya kɔkɔ náanliu, ní Isirayeel sá-u difakal. Úǹ ní bi yíì ti-Dindaan Mpɔŋkɔdaan

Babiloon kúntitam

²⁰ Sii Babiloon nìn sá-mi kii dikújalee ní, a nìn sá-mi tijanjawan ní. M dī a-pu ki nàn̄ atimbun dúsi dusi ki nāaǹ abee.

²¹ M dī a-pu ki nàn̄ itaamu nì bitanjakaliibi, janjatɔrɔkub nì bin ŋàal̀-bee.

²² M dī a-pu ki nàn̄ bininjab nì binimpoobi, binipɔmbi nì bitikpilib, binaacimpɔmbi nì bisapɔmbi kunaau.

²³ M dī a-pu ki nàn̄ bipikpaaliibi nì bi-picaŋkpunti, bikpaabi nì bi-naai in bi cáa kù tikpaalee, gɔminab nì kɔmandambi.

²⁴ Ama ni-nimbilaaliyin ní m làá pà Babiloon tiŋki nì Kaaldee yab tikpitil tin bi ŋá Siiyɔŋyee paati, man ni-Dindaan di lī míǹ.

²⁵ Tiŋman, m làá já nì sii Babiloon tiŋki, ti-Dindaan di lī míǹ. Kí nàan̄ee, a nìn pɔ̄ɔ̄ kii dijoolee, ní ki nìn nàantí duulinya kɔkɔ. M làá tàntī m-ŋal kí túĺ a-watil pú. M làá téeń-si á gàaǹ ataŋkpee pu kí lítí, ní kí yàntī á kpántí dijool din fòol̄ lìblibee.

²⁶ Baa ti làá ká a-cee ditaŋkpajal àá ataŋkpee ŋin bi dūu bíl̀ a-nyeelee, di sá yii a làá kpántí kuteeu ní kí nīn cá jaanjaan, ti-Dindaan di lī míǹ.

²⁷ Ní cóoḿmaan kujaau daaŋku ŋaabiki kitiŋin, ní búń ŋyin atimbun nib ń gbìl̄. Kóom̀maan atimbun kí kpāfì ŋí jáǹ Babiloon tiŋki, yíiḿmaan Ararati nì Miini nì Asikeenaasi beeŋi ŋí jáǹ-kì. Ní lēēmaan bijanjakpilib bí fōō bijanjaliibi bí jáǹ-kì. Dūmaan itaamu in wīikí kii inaakitoonee kí tɔ̄ ki-pu í jáǹ-kì.

²⁸ Kóom̀maan atimbun kí kpāfì ŋí jáǹ-kì, cilinjee Meedi bɔtiibi nì bi-gɔminab nì bi-kɔmandambi nì ntimu mun kɔkɔ bi kpòotēe.

²⁹ Kitiŋ cīŋkì màkà maka ki kɔ́ dinyoondin, ŋyunti ŋun ti-Dindaan ŋá u nín bɔ́ntì kí ŋá Babiloon tiŋki puee. U yāntì Babiloon tiŋki kpántì kuteeu báà unil kaa ti kóò ki-ni.

³⁰ Babiloon baatandambi gbēeǹ kaa ti bíi jáà, bi sáǹ ki kɔ́ ki bál̀ bi-balilammun. Baa ti cáá dipɔbil, bi kpántì binimpoobi ní. Kitiŋ punyɔmmu pīitì ki wāā, bi tūū ki-diiŋŋi ŋŋmi.

³¹ Ituun sáń ki fòol̄ tɔb. Bi sáń malaa malaa ki cá Babiloon bɔtiu cee kí cùú tùkù-u yii bi jáń ki fōō u-tiŋki kɔkɔ.

³² Bi pīiǹ laakin unil ŋūǹ kí còom̀ kí dùtī mbunee, digundi din bi máń ki tú kitiŋee wùn̄ ŋŋmi, ní tifaandi cúú bijanjaliibi.

³³ Ti-Dindaan Mpɔŋkɔdaan Isirayeel Nimbɔtiu bí yii: «Babiloon tiŋki náań nì didigbanaapaal din bi ŋātèe ní. An kaa ti làá sūŋkì kudiceeu yuntiŋu làá bàń ki-pu.»

Ti-Dindaan làá tɔ̀ u-nibul pɔntooŋyi Jeerusaleem

³⁴ Babiloon bɔtiu Neebukadineesaar, cátikì-mi ki tɔ̄ntì-mi. U dū-mi ki fá kii disambikulindee. U dū-mi ki náĺ kii kupeebiliŋŋuee, u jíń m-jimmɔntiiti ki gbéeǹ u-pool, míǹ boonee ní u jìn̄-mi.

³⁵ Babiloon ń fōō nnaabu nì falaabi bin kì kɔ́ǹ-tee tafadaaldi! Siiyɔn yab ń lì yii: «Tiŋman Kaaldee yab ń túń ti-fatikuu kpuulool.»

*

³⁶ Ti-Dindaan nín sòon̄ nì Jeerusaleem pu puee sèé: «Mama m-ba di làá mɔ̄tì a-pu, man di làá tɔ̀ a-pɔntooŋyi. M làá yàntī Babiloon buŋyi ń kpā ní kí yàntī u-nyimbulii ń gúń.

³⁷ M làá yàntī Babiloon tiŋki ń kpántí adigbun ŋma. Iŋɔkɔ di làá nīn kíǹ ki kóò niin, ní an kpántí mpaan ŋun fàantée. Bi làá dāá nīn gbáà inimɔɔn biilii, ní báà uniseen kaa dāa gíti kíikí kí kɔ́ niin.

³⁸ Babiloon yab mùuǹ dicilpu kii gbikintibee, bi gbùkum̄ kii agbikintipɔmbilee.

³⁹ Ŋyunti ŋun ní kpɔkɔsi cúú-bee ní ḿ bɔ́ntí tijimmɔntiil kí tīī-bi. M làá yàntī bí nyɔ̀ kí gbí, bi làá gèeǹ ŋgeem min kaa kúntée, man ni-Dindaan di lī míǹ.

⁴⁰ M làá péetí-bi kí cùnnì laakin bi làá kpɔ̀-bee kii bi nín péetí apibil nì ipijaa nì iŋɔjaa ki cáǹ kí kpɔ̀ puee ní.»

Bi bíi yáliŋkí Babiloon tiŋki pu

⁴¹ Bi jáń ki pɔ́ɔkiǹ Seesaki tiŋki ki fōō-kì. An dī mana ní ki bāań míǹ? Babiloon tiŋki kpántì kuteeu kun gbí inimɔɔnee atimbun kansikin.

⁴² Tiŋku gbí ki bīiǹ Babiloon tiŋki pu, u-nyiŋgbanti yíkìi léeǹ ki-pu.

⁴³ Ki-timmu kpántì kuteeu kun gbí inimɔɔnee. Kitiŋee kpántì kitiŋkuliŋŋi, mpaan ŋun pu báà ubɔ kaa kóò, ní báà uniseen kaa ti jītée ní.

⁴⁴ M làá jáǹ diwaal Beeli Babiloon tiŋkin. M làá dáaĺ kí lēē kun kā ki-nyɔkɔnee, atimbun kaa làá nīn gíti bìtifī ki cá ki-cee. Babiloon gundi gba lítì.

⁴⁵ M-nibul, sāǹ kí nyā kitiŋ gbantin! Báà ŋma ń sāǹ kí fīī u-ba ti-Dindaan ŋuukpaandi ń taa kpáaǹ-u.

⁴⁶ Ni-wunti ń taa yɔ̀tī! Ní taa yàntī tin bi sòoǹ kitiŋee ni ń fàaǹ-ni. Dibindi dibee bi sòoǹ tiba, ní dibindi dibee, bí tí sòoǹ tiba mun. Tipɔmbɔti jíń dinyandi kitiŋee ni, ní ubɔ ń yīkì kí já nì ubɔti un kēe kí fōō u-yil.

⁴⁷ Too, iwiin bí ki dòoń, m làá jáǹ Babiloon waaŋi. Kitiŋee kɔkɔ làá kɔ́ icoo ni. Ki-nikpiliŋ kɔkɔ làá nīn dɔ̄ kitiŋ kansikin fìlfil.

⁴⁸ Bin làá nàan̄ Babiloon tiŋkee làá nyānní ŋgan pú ní. Niinee yilpu nì taapu nì tin kɔkɔ bí bi-puee làá dāá nīn kūuntí nì dipɔɔpindi ki-pu. Ti-Dindaan di lī míǹ.

Ubɔnaatil

⁴⁹ Duulinya kɔkɔnee, binib tikpil kpíì Babiloon pu. Míǹ mbaantiim ní Babiloon mun làá kpú Isirayeel yab bin kpíì u-puee pu.

Unimbɔti nibul

⁵⁰ Nimbi bin ŋmátì kaa kpíìyee, nín̄ cámaan, taa nín̄ kāmaan doo. Ni yaa bí ndanaaa, ní nīn dàkafī ti-Dindaan pu, kí nīn téetí Jeerusaleem pu.

⁵¹ Ti yaa nìn gbìl̀ bi sìí-tee, an nìn wù-ti ní. Icoo nìn cútí-ti, di sá yii binicambi nìn kɔ́ ti-Dindaan circir kɔŋkooŋŋun.

⁵² An pu ní ti-Dindaan bí yii: «Ŋwiin bí ki dòoń m làá jáǹ Babiloon waaŋi. Kitiŋee kɔkɔ poonee, bin fōō tiweendee làá dāá nīn yáliŋkí.

⁵³ Báà Babiloon yaa jɔ́m̀ ki tin tūū kutagbɔŋu, báà kì yaa máń digundi din ubɔ kaa ŋūǹ kí dàb̄ee ki tú ki-ba, m làá tīī mara ní bin làá nàan̄-kèe ń bàń-kì, ti-Dindaan di lī míǹ.»

⁵⁴ Binib gbáà ibiil Babiloon tiŋkin ki nyàab̀ dijòońdi, bi gbìl̀ bi nín bíi nàantí Babiloon tiŋkee.

⁵⁵ Di sá yii ti-Dindaan di bíi nàantí Babiloon tiŋki, u yāntì u-wookpaaŋku ŋmíl̀. Binannanliibi janjakitil bíi gà dibintindi kii tiŋku nyiŋgbantee. Kuwoou kun bi ŋáańee náań nì ditaadundee ní.

⁵⁶ Di sá yii un làá nàan̄-kèe bāań-kì. U làá jáǹ Babiloon tiŋki. U làá cúú ki-baatandambi kí cùnnì kuyuŋu, u làá kɔ̄fì ki-tɔfii. Tiŋman, ti-Dindaan sá Unimbɔti un tɔ̀ ipɔntoonee ní. U làá pà báà ŋma u nín máaǹ tipaal tiŋyee ní.

⁵⁷ M làá nyùntī ki-kàliŋkpilib nì ki-ciŋfitiibi nì ki-gɔminab nì ki-kɔmandambi nì ki-baatandambi ndaam bí gbí. Bi làá gèeǹ talku geem, bi pée gíti kpá kí fìntī. Ubɔti un bi yíì ti-Dindaan Mpɔŋkɔdaanee di lī míǹ.

⁵⁸ Ti-Dindaan Mpɔŋkɔdaan bí yii: «Babiloon guŋkpaaŋŋi kpéelikì kɔkɔ múb, ki-punuufɔkɔbee wùn̄ ŋŋmi. Anibul pée bíi ŋáań falaa fám deeyaa, atimbun pée bíi gì ki tìì ŋŋmi deeyaa!»

Dinyɔɔbundi din bi dūu tɔ́ Eefiraati mɔɔlinee

⁵⁹ Unimbɔti bɔnaatiliu Yeereemii nìn tīī Neeriya jipɔɔn Seereeya, Meeseeya naantiiu mara ŋyunti ŋun u nì Juuda bɔtiu Seedeesiyasi nìn cūtì Babiloon tiŋkinee. Ŋyunti gbantee, Seedeesiyasi nìn kā dibeel an ŋá abin anaa dee. Seereeya di nìn sá ubɔti kpambal din bɔ́ntí u-bɔti kɔkɔee.

⁶⁰ Yeereemii nìn ŋmàn̄ kugbɔmbaantiiu poon inaabu in kɔkɔ làá jēetí Babiloon tiŋki puee, anyɔɔbun ŋin di jáǹ Babiloon tiŋkee.

⁶¹ Yeereemii nìn bí Seeraya yii: «A yaa bàn̄ Babiloon tiŋkinee, á kàaǹ tibɔti tin kɔkɔ ŋmàn̄ ki kā kugbɔŋu nee poonee.

⁶² Míǹ boonee ní á lì yii: <Ti-Dindaan, sii a-ba di sòon̄ ki síiǹ yii bi làá nàan̄ Babiloon tiŋki, ní báà unilaaa, kuwaŋkuluaaa, tiba kaa ti làá nīn bí ki-pu. Kì làá kpántí kuteeu kun gbí inimɔɔnee kí nīn cá jaanjaan.>

⁶³ A yaa láa kàan̄ kugbɔŋu gbanti ki dóòyee, á nyàab̀ ditaŋkpal kí páań kí bóob́ ní kí cáá tɔ̄ Eefiraati mɔɔlin.

⁶⁴ A yaa ŋá míǹ ki dóòyee ní á lì yii: <Míǹ ní Babiloon tiŋki làá wāŋkì. Ti-Dindaan di làá cáań nnaabu ŋun kí tɔ̄ ki-pu boonee, kàa ti làá ŋmā kí yīkì.>» «Yeereemii bɔti nín kúntí laakiŋyee dee.»