Jérémie 30 - UNIMBƆTI NYƆƆBUNDI GBƆŊKU

Unimbɔti pōoǹ Isirayeel nì Juuda yab ipoon

¹ Ti-Dindaan sòon̄ nì Yeereemii yii:

² «Man ni-Dindaan, Isirayeel Nimbɔtiu nín sòon̄ puee sɔ̀. Ŋmà tibɔti tin kɔkɔ m tùkū-see kí ŋá kugbɔŋun.

³ Man ni-Dindaan di sòon̄ yii iwiin bí ki dòoń, m làá fàtīí gíiǹní m-nibul Isirayeel nì Juuda yab bin bi cúú ki cūnnì kuyuŋuee, man ni-Dindaan di lī míǹ. M làá gíiǹní-bi kitiŋ kin m nìn dūu tīī bi-naanjabee poon bí fōō kí nīn kíǹ ki kóò.»

⁴ Ti-Dindaan nín sòon̄ Isirayeel nì Juuda yab pu tiŋyee sɔ̀.

⁵ Ti-Dindaan sòon̄ yii: «Bi gbìl̀ dipɔɔbiildi biilii pu, an sá dinyoondi ní, kaa sá ŋgbansɔŋfi.

⁶ Ní bàlifì binib kí kpèèmaan, uninja màal̀ kibikaaa? Ama m wāĺ bininjab kɔkɔ yú ki nyīī bi-cammu kii unimpu di kā imatiŋween puee. Ba pu ní binib kpèé fáaa míǹ?

⁷ Mbusu! Díǹ wiiŋŋu nee sá ŋwiŋkpaan ní, ŋwiin nee ŋúǹ kaa cáá juti. An sá dinimbinaamandi wiiŋŋu ní ki tīī Jaakɔb naantiibi, ama bi làá dāá ŋmátí.»

*

⁸ «Ti-Dindaan Mpɔŋkɔdaan nín sòon̄ puee sɔ̀. Ŋyunti yaa láa bàn̄ee, m làá dāá léetí bi-neen kpancikiliu. Niinee baa dāa gíti sá binicambi yumbui.

⁹ Ama bi làá dāá nīn sá man bi-Dindaan bi-Nimbɔtiu nì Daafiidi un m làá dāá dūú kàan̄ bi-pu ubɔtee tɔntɔnliibi.»

*

¹⁰ Ti-Dindaan nín sòon̄ puee sèé: «M-tɔntɔnliu Isirayeel, taa fàŋkì. Sii un naanja sá Jaakɔbee, taa kɔ́ dinyoondin! Di sá yii m làá nyāntí-si ntindandatimu nee ni kí fīī-si, ní kí gíiǹní a-biyaamu mun bíń kuyuŋuee. Isirayeel, a làá fàtīí gítiń ní kí nīn bí dipɔɔsɔŋkilin. Ubɔ kaa dāa gíti bí kí páb́-si.

¹¹ M bí a-cee kí fīī-si, ti-Dindaan di lī míǹ. M làá kúntí anibul ŋin cee m nìn jìn̄-si ki kɔ́ǹee kɔkɔ. Ama siiyee, maa làá kúntí-si. An sá mbaamɔn yii m dáaĺ a-tafal, ama nì deedee poon ní m ŋá míǹ. Di sá yii maa bàà ŋūǹ kí yàntī-si kii a sá maanyiibee.»

*

¹² Ti-Dindaan nín sòon̄ puee sèé: «Tiweendi tin a fōōyee kaa cáá dicáaǹdi, baa ŋūǹ kí cáaǹ a-buuŋŋu.

¹³ Ubɔ kaa bí ki mɔ́tí a-pu. Unil yaa fōō tiweendee, bi cāantí-u ní, ama sii ceeyee, an kaa cáá nnyɔkɔ.

¹⁴ A-bɔmbi kɔkɔ súntì a-pu, ubɔ kaa ti dàkafī a-pu. Jeerusaleem, m fáá-si kii a sá m-nannanliuee. M dáaĺ a-tafal ŋkpitim pu, kun puee a-kpitii wīikí ní a-yìntitam náaǹ.

¹⁵ Ba pu ní a gbáà ibiil tiweendi tin a fōōyee pu. A-buuŋŋu kaa cáá dicáaǹdi. An sá a-kpitii in wīikí nì a-yìntitam min náaǹee pu ní m ŋá-si míǹ.

¹⁶ Bin kɔkɔ cátikì-see, bi làá cātikì bi mun. Bi làá cúú a-nannanliibi kɔkɔ pái kí cùnnì kuyuŋu. Bin yùn̄-see, bi làá dāá yɔ̀ bi mun, bin fúkúl̀-see, bi làá dāá fūkul̀-bi.

¹⁷ Bi yíì-si yii <un bi jìn̄ee>, <Siiyɔn un bɔti kaa ti ká ubɔee>. Ama mama ni-Dindaan, m bí yii: M làá cáaǹ tiweendi tin a fōōyee, m làá yàntī a-buuŋyi ń kpú.

*

¹⁸ Ti-Dindaan nín sòon̄ puee sèé: <M làá fàtīí mā Jaakɔb diiŋŋi, m làá sɔ̄ bi-kɔŋkooŋyi saai. Bi làá fàtīí mā ntimu mun bi nìn nāaǹee kí tɔ́kɔń mu-digbuŋŋi pu, ní adinyaan ń fàtīí ká ipaan in pu ŋi nìn yúee.

¹⁹ Bi làá dāá gbìl̄ ilan nì ifaal kuŋkuuntii pu bi-kansikin. M làá dāá yàntī bí bùtī, bi-wíiŋŋu kaa làá dāá bàtī. Baa làá dāá gíti kpèè-bi fám, di sá yii m làá dāá tīī-bi tinyool.

²⁰ Jaakɔb naantiibi làá dāá nīn bí kii bi nín nìn bí pu njaminee ní. Bi làá dāá fàtīí tí kóoǹ kí kpāfì m-nimbiin, ní ḿ dāá jáǹ bi-wɔ́biliibi kɔkɔ.

²¹ Ni-kansikin ubɔ di làá dāá nīn sá ni-kpiliu, tiŋman ni-kansikin ubɔ di làá dāá kpòotī-ni. M làá dāá pɔ̄ udaan diyimɔɔl ú sútí kí pìl̄-mi. Di sá yii ŋma di sá-u kí sútí kí pìl̄-mi? Ti-Dindaan di sòon̄ míǹ.

²² Niinee ní ní dāá nīn sá m-nibul, ní man ń nīn sá ni-Nimbɔtiu.>»

*

²³ Ti-Dindaan buŋkpaaŋku dòoń, u-ŋuul di pōō. Kunaakpaabuŋkpaaŋŋu bíi jītí ki fīintí kí dāá lítí binikpitib pu, ku bí binikpitib yiliŋ pu ki màntī.

²⁴ Ti-Dindaan yaa kaa ŋá u nín lēē kí ŋá puee, u-ŋuul kpá kí sɔ̀ŋkì. Boon kpataaayee, ni làá dāá gbìl̄ taapu.