Jérémie 3 - UNIMBƆTI NYƆƆBUNDI GBƆŊKU

Isirayeel yab sá kii kinimpulaakpaai kin yil pɔ̄ɔ̄yee

¹ Ti-Dindaan lī yii: Unil yaa jìn̄ u-nimpuu ní u yīkìi cūtìi mɔ́ǹ ubɔee, udaan gíti cáá nsan kí fàtīí fōoń-uaaa? Aayee! Di sá yii atuun gbanti pu ní kitiŋ kɔ́ tijɔkɔndi. Ama sii Isirayeel, a ŋá tilaakpaal nì bibɔntiibi tikpil ní ki bàà là kí fàtīí gítiń m-cee! Ti-Dindaan di lī míǹ.

² Wáaǹ kí kpèè ŋgbantamu yilpu. Kigbantaŋ kiba pée bí si nì a-bɔɔn ubɔ kaa jɔ́m̀ ki-pu ki dōoǹaaaa? A kàal̀ isan caŋin ki cīití-bi kii ulaalibuja un kóò kuteeunee. A dū a-jɔkɔntuuŋŋi nì a-laakpaatuuŋŋi ki kɔ́ǹ kitiŋ tijɔkɔndi.

³ An puee maa yāntì utaa nìn̄, maa yāntì a ká utaa kuseeun. Ama a ŋá mpɔɔgbifin ki gbíntìi nìkì ki ŋáań a-laakpaatuuŋŋi, ní ki yíì kaa béè a-bɔkpil.

⁴ Ní kɔŋkɔnnee a cáá dipɔbil ki kūuntí ki yíì-mi yii: «M-baa, sii un sá m-bɔɔ doooo m-biyatinee!

⁵ A gbíntìi gíí m-pu diŋuulaaa? A gbíntìi díkí m-puɔɔɔ?» A lì míǹ ní ki gbíntìi nìkì ki ŋáań ikpiti, a nyí ikpiti diŋál nan ní!

Isirayeel nì Juuda yab kaa yúliǹ Unimbɔti deedee

⁶ Ubɔti Joosiyaasi yuntiŋu ní ti-Dindaan nìn bí-mi yii: «Kéè a ká Isirayeel yab nín nyáń m-boonee yaa? Bi jɔ́m̀ ajoon ŋin fɔ̀kɔ̀ee kɔkɔ yilpu, ki cūtì isufi in faati sɔ̀m̀ee kɔkɔ taapui ki ŋá tilaakpaal.

⁷ Ní m lī m-neen yii: <Bi yaa ŋá míǹ kɔkɔ ki dóòyee, bi làá fàtīí gítiń m-cee, ama baa gítìń. Ní u-naal Juuda tiŋkin yab bin kaa yú deedeeyee mun ká.

⁸ Tilaakpaal tin Isirayeel yab ŋée puee, m jìn̄-bi kii uninja nín jì u-nimpuu puee, ki ŋmàn̄ kugbɔŋu kun dàkà kun pu ní m jìn̄-bee ki ŋúbiǹ-bi. Ama u-naal Juuda tiŋkin yab bin kaa yú deedeeyee ká míǹ ní an kaa cúú-bi tifaandi. Nì míǹ kɔkɔee, bi mun páatìi jéetì tilaakpaal pu.

⁹ Bi ŋá tilaakpaal nì awaa ŋin sá ataŋkpee nì isufee. An nín kaa ŋá-bi nyàaa bí ŋá tilaakpaalee, bi kɔ́ǹ kitiŋ tijɔkɔndi.

¹⁰ Nì míǹ kɔkɔee, Isirayeel naal Juuda un kaa yú deedeeyee kaa fātìi gítìń m-cee nì dipɔbil diba. U-bakpantil kaa sá mbaamɔn.» Ti-Dindaan di lī míǹ.

¹¹ Ti-Dindaan bí-mi yii: «Isirayeel yab pɔɔgaatib sɔ́ǹ Juuda yab bin kaa yú deedeeyee.

¹² Á cù kí dū tibɔti nee kí bāakì ŋgan watil pú yii: <Isirayeel yab pɔɔgaatib, fàtīí gítímaan m-cee, m làá bútí m-nimbiin kí tīī-ni. Tiŋman, m sá ubɔɔtimɔnti ní, maa làá nīn díkí ni-pu diŋuul míǹ kí nīn cá jaanjaan.

¹³ Tin bée di sá yii á béé a-bɔkpil, béé yii a jáń nì man, a-Dindaan a-Nimbɔtiu. A cūtì ilaan kɔkɔ ki nyàab̄ awaa isuboon kɔkɔ taapui, ní kaa pílifì man nyɔkɔ. Ti-Dindaan di lī míǹ.>»

Juuda yab gítintam

¹⁴ Ti-Dindaan bí yii: «Fàtīí gítímaan mbiyaamu mpɔɔgaatimu. Man di sá ni-kpiliu. M làá lēē ubɔ kitiŋ kiba poon, ní kí lēē bili kudicaŋu kubɔ poon, ní kí cáá-ni kí cùnnì Siiyɔn.

¹⁵ M làá dāá tīī-ni bikpootiliibi bin kā m-pɔbil puee ní bí dāá dū iciin nì dinyil kí kpòotī-ni.»

¹⁶ Ti-Dindaan gíti lī yii: «Ŋyunti gbantee, ni làá dāá bùtī ki gbí kitiŋ nee. Ubɔ kaa dāa gíti tùkù u-juti dipoondi dakaau bɔti, ní ubɔ mun kaa dāa gíti dàkafī u-pu. Baa làá dāá gíti téetí u-pu, kaa làá dāá yāliŋkì u-kpátam pu. Baa làá dāá gíti kpáá upɔɔn ubɔ mun.

¹⁷ Ŋyunti gbantee, bi làá dāá yíiń Jeerusaleem yii <Ti-Dindaan beejal>. Atimbun kɔkɔ làá dāá kóoǹ kí kpāfì niin, man ni-Dindaan cee. Bi làá dāá fá bi-landɔkɔkpitii.

¹⁸ Ŋyunti gbantee, Juuda yab làá dāá cùú kpāfì nì Isirayeel yab, ní bi-kɔkɔ ń nyānní ŋgan pú tiŋkin dicilpu kí fàtīí gítiń kitiŋ kin m nìn dūu tīī bi-naanjab an nīn sá bi-fakalee poon.»

Isirayeel yab pɔɔgaatib làá fàtīí gítiń Unimbɔti cee ti-Dindaan

¹⁹ M lī m-ban yii: «M bàà là kí dū-si kí kpántí m-jipɔŋkpiliu, kí tīī-si mmɔn tiŋki kin ŋān̄ ki jítiǹ mu-kɔkɔ duulinya poonee án nīn sá-si difakal atimbun kansikin. M lī yii a làá dāá yíiń-mi yii: <M-baa>, ní aa ti làá fàtī a-boon kí tīī-mi dalba dalba.

²⁰ Kii unimpu nín nyēē u-cal boon puee, míǹ ní nimbi Isirayeel yab, ni nyáń m-boon. Man ni-Dindaan di lī míǹ.

²¹ «Bi gbìl̄ ibiil pu ŋgbantamu pu, an sá Isirayeel yab di bíi sūǹ ki tíminsí. Di sá yii bi yīntì nsan ki súntì man bi-Dindaan bi-Nimbɔtiu pu.

²² Fàtīí gítiḿmaan, nimbi pɔɔgaatib. M làá cáaǹ-ni ni nín gáatì puee weeŋyi.» «Kpèè ti sèé, ti gítiń a-cee, di sá yii sii ti-Dindaan di sá ti-Nimbɔtiu.

Isirayeel nibul

²³ Tiŋman ti yāntì ŋgbantamu pu waatootii nì kuwoou kun bi ŋáań ajoon puee kíil̀-ti. Ibaamɔn, ti-Dindaan ti-Nimbɔtiu di ŋūǹ kí fīī Isirayeel yab.

²⁴ Doooo ti-biyatin ní icoo waaŋi jíń ti-baabi nín pɔ́ɔǹ ki túń atuun ki ká tigaajati tiŋyee. Ŋi jíń bi-piii nì bi-ŋoobui nì bi-naai nì bi-jipɔmbi nì bi-bisalib.

²⁵ Tí dòom̄maan ti-cooi poon! Tí kíí kí fá ti-jilmau. Di sá yii ti nì ti-naanjab kaa yúl̀ nì ti-Dindaan ti-Nimbɔtiu deedee, doooo ti-biyatin ki dāa sāā díǹ. Taa pílifiǹ ti-Dindaan ti-Nimbɔtiu nyɔkɔ.»