Jérémie 20 - UNIMBƆTI NYƆƆBUNDI GBƆŊKU

Bi bóob́ Yeereemii ki nákáǹ ndɔ

¹ Usaraaŋakpil Pasuur, Imeer jipɔɔn, di nìn sá ti-Dindaan Diiku pilisikpiliu. U nìn gbìl̄ Yeereemii nín nāatì ti-Dindaan bɔti puee.

² Niinee ní u fáá Yeereemii ntampa ní ki yāntì bi bóob́-u ki nákáǹ ndɔ Beenjameen punyɔkɔki yilpu pú yaka kin bi dì ki kóò ti-Dindaan Diikunee.

³ Kutaa wúntì Pasuur yāntì bi bútì Yeereemiiyee, ní Yeereemii bí-u yii: «Ti-Dindaan kaa ti làá yíiń-si Pasuur, ama u làá nīn kíǹ ki yíì-si yii: <Tifaandi bí an kɔkɔ pu.>

⁴ Di sá yii ti-Dindaan nín sòon̄ puee sèé: <M làá kɔ́ǹ sii a-ba nì a-bɔɔbi tifaandi ní fàŋkì yɔ́kɔ́ yɔkɔ. A-nimbilaaliyin ní bi-nannanliibi làá kpɔ̀-bi. M làá dū Juuda yab kɔkɔ kí líiǹ Babiloon yab bɔtiu. U làá cúú-bi kí cùnnì u-tiŋkin kuyuŋu ní kí kpɔ̀ bin kíǹee.

⁵ Jeerusaleem tiŋki gaajati kɔkɔ, kì nín túń ditundi ki ká tiŋyee kɔkɔ nì ki-gaajawammɔntiiti nì Juuda yab bɔtiibi gaajati kɔkɔee, m làá dūú ŋá bi-nannanliibi ŋaan. Bi làá fūkul̀ tíǹ gbanti kɔkɔ pílpil kí yòon̄ kí cáá cùnnì Babiloon tiŋkin.

⁶ Sii Pasuur nì a-dicaŋkun yab kɔkɔee, bi làá cúú-ni kí cùnnì kuyuŋu. A yaa láa bàn̄ Babiloon tiŋkinee, a làá kpú. Bi làá síb́-si niin, ki kpáaǹ a-bɔɔbi bin a nì bi nāatì tinyimɔmbɔtee kɔkɔ.>»

Yeereemii timinsii

⁷ M-Dindaan, a kíil̀-mi ní ma mun lafun fōō ki kíí míǹ. A cúú-mi mpɔn, ní ki pɔ́ɔkiǹ-mi. Binib lāā-mi baabadal, báà ŋma bèel̄-mi ní.

⁸ Ŋyunti kamaa m yaa làá sòoǹee, see ḿ téeń kí bāakì yii: Tipɔmbɔti nì dinàandi! Tiŋman baabadalee, sii ti-Dindaan nyɔɔbundi puee, binib sìí-mi ki bèel̄-mi.

⁹ M yaa bí yii: «Maa làá ti dàkafì ti-Dindaan pu, maa làá ti nàatī u-nyɔɔbundi.» Ama ní m-pɔbil poonee, an wù kii ŋŋmee. M bíi pɔ̄ɔntí fám kí pɔ̄ɔkiǹ-u, ama ní kaa ŋūǹ.

¹⁰ M gbìl̄ binib tikpil sòoǹ ki bíiĺ-mi. Bi yíì-mi yii: «Tifaandi bí an kɔkɔ pu». Biba lì yii: «Tí bìitī u-pu!» ní bin kíǹee kíikí yii: «Tiŋman, tí lafun bìitī u-pu.» M-bɔɔbi gba kā ki cí yii ḿ lítí ní. Bi lì yii: «An yaa yíì u làá yàntī án túuǹ-u. Niinee ti làá pɔ̄ɔkiǹ-u ní kí tɔ̀-u ipɔntoon.»

¹¹ Ama ti-Dindaan un sá ubaatandaan ki cáá mpɔnee bí m-cee. Bin bíi sàantí-mee làá lítí, baa làá ŋmā kí ŋá-mi tiba. Icoo làá cúú-bi, kun puee baa làá ŋmā kí já kí pɔ̄ɔkiǹ-mi. Bi-cooi làá nīn bí ní ki cá jaanjaan ní ubɔ kpá kí súntí i-pu.

¹² Ti-Dindaan Mpɔŋkɔdaan, a nyí unil un yú nì si deedeeyee. A nyí kun ti lèe nì ti-landɔkɔi. M cí kí ká a nín làá tɔ̀-bi ipɔntoon puee, di sá yii sii ŋaan ní m dū m-bɔti ki ŋá.

¹³ Tí gāāmaan ilan kí pàkà ti-Dindaan! Tí nyɔ̄ŋkìmaan ti-Dindaan, di sá yii u fìil̄ uwɔfi ki nyāntí binikpitib ŋaan!

*

¹⁴ Mbusu ń kɔ́ ŋwiin ŋun bi màl̄-mee! Ŋwiin ŋun m-na núuĺ-mi ki bíl̀ee ń taa ká diyimɔɔl!

¹⁵ Mbusu ń kɔ́ un di nìn cūtìi tùkū m-baa yii: «Bi màl̄-si kibininjabiki!» ní ki yāntì an mɔ́ɔkiǹ-uee!

¹⁶ An niliuee ń nīn bí kii ntimu mun ti-Dindaan lábitì ki cìb̄ kaa súń isaayee. Udaan làá nīn bí iyaliŋki pu kutaafaau ní kí nīn gbìl̀ ijanjakuŋkuunti pu ŋwiimpu.

¹⁷ Ba pu ní Unimbɔti kaa yāntì m kpíì m-na poon ní? Kéè m-na poon bàà kpántì m-kaakul deeyaa! M bàà làá nīn pée kā u-poon míǹ ní kí nīn pée cá jaanjaan.

¹⁸ Ba pu ní m nyáń m-na poon ki jéetì kunimbaau nì falaa poon, kí kúntí m-maŋfal wiiŋyi icoo poon míǹ?