Jérémie 15 - UNIMBƆTI NYƆƆBUNDI GBƆŊKU

¹ Ní ti-Dindaan bí-mi yii: «Báà gba Mooyiisi nì Samiyeel yaa gbāam̀-mi dinibul nee yab pu, maa làá pée sɔ̄ bi-saai. Jà-bi kí nyāntí bí búntí kí wàatī-mi.

² Ní bi yaa bālifì-si yii: <La ní ti làá cù ní?> Á kíí-bi yii: <Ti-Dindaan nín sòon̄ puee sɔ̀. «Bìlbil kúm ń kpɔ̀ un sá bìlbil kúm yɔuee! Un máaǹ kí kpú kujaaunee ń kpú kujaaun! Ŋkùm ń kpɔ̀ un sá ŋkùm yɔuee! Ní un sá kuyuŋun yɔuee ń búntí kuyuŋu!»

³ Ti-Dindaan bí yii: «M làá jáǹ-bi minaa pu ní: kitàataajiki làá kpɔ̀-bi, ní iboo ń fù-bi kí cùnnì ndan, ní kaajiikub ń jī-bi ní sinsiŋkub ń ŋmɔ́ kí tɔ̀ntī-bi.

⁴ Mimmee, kitiŋ pu beeŋi kɔkɔ yaa ká-bee, bi làá kɔ́ dinyoondin. Kun pu m làá ŋá mimmee di sá Eeseekiyaasi jipɔɔn Manasee, Juuda yab bɔtiu nín ŋáaǹ atuŋkpiti ŋin kɔkɔ Jeerusaleem tiŋkinee.»

Ti-Dindaan gīī kí sɔ̄ isaa

⁵ Ti-Dindaan bí yii: «Jeerusaleem, ŋma di làá gíti sɔ̄ a-saai? Ŋma di làá sɔ̄ a-pu? Ŋma di làá dūú páb́ u-ba kí bàlifì kí kpèè tin poon a bée?»

⁶ Ti-Dindaan bí yii: «Sii di dū-mi ki fá, ní ki fātì a-boon ki tīī-mi. An pu ní ma mun jáń nì si ki nāaǹ-si. Di sá yii m gīī kí nīn sūǹ a-saai.

⁷ Kitiŋee timmu kɔkɔ poonee, m yōoǹ ndɔ ŋun m cáa gbáà tijimpinee ki gbáń ki yāaǹ-bi. M nāaǹ-bi ki yāntì baa ti cáá mbiyaamu, ama ní baa kpántì bi-bimbim.

⁸ M yāntì bikpiipoobi wíiǹ ki jítiǹ tiŋku gbandi bul. M cáań nnaabu ki tɔ́ unipɔɔn un sá ujanjalee na pu kuwiŋkaŋu pu. Dibɔbil pu niinee ní m yāntì dinyooŋkpaandi jéetì u-pu.

⁹ Unimpu un nìn cáá jipɔmbi bilulee kaa ti bí tiban. U fìkī ki dɔ̄. Úǹ wìiŋ́ŋu jéetì kuwiŋkaŋu pu. Icoo cúú-u, u fá u-jilmau. Bin kíǹ ki bí dimaŋfalinee, m làá yàntī bí kpú kujaaun bi-nannanliibi nimbiin.» Ti-Dindaan di lī míǹ.

Yeereemii bíi yáliŋkí, Unimbɔti dàkā-u u-tundi Yeereemii

¹⁰ M-na, mbusu kɔ́-mi a nín màl̄-mee pu! Kitiŋ nee kɔkɔ poonee, binib jáà nì mi ní kaa là kí wāl̀-mi. Ma mun kaa pīnnì ubɔ animbil, kaa tí cūtì ubɔ mun cee ki pīnnì animbil. Ama ní báà ŋma tòó-mi mbusu.

¹¹ Ama ti-Dindaan nìn bí-mi yii: «M pūtì yii m làá fīī-si kí kɔ́ǹ-si nnaamin. Nnaabu nì dinimbinaamandi yuntiŋuee, m làá yàntī a-nannanliibi ń dāá gbàan̄ a-nimbiin.

¹² Ubɔ ŋūǹ kí kóoĺ tikútaaa, tikúti tin nyánní ŋgan púee nì tasa kútaaa?»

ti-Dindaan

¹³ «Juuda yab, m làá yàntī bí fūkul̀ ni-gaajawanti nì ni-gaajati, ní an kaa cáá yii ubɔ làá téeǹ-ni. Ikpiti in kɔkɔ ni ŋá ni-tiŋki kɔkɔnee paati dee.

¹⁴ M làá yàntī ní kpántí ni-nannanliibi yumbui kitiŋ kin a nyée poon. Di sá yii m-ŋuul sēē ŋŋmi ŋun di làá wà-see.»

Yeereemii

¹⁵ Sii ti-Dindaan nyí tikɔkɔ! Dàkafì m-pu kí téetí m-pu. Tɔ̀ bin kā m-puee ipɔntoon. Kimɔtii kin a cáá bi-puee puee, á taa yàntī ḿ jī falaa. Béé yii sii pu ní man bíi jīǹ takaasi.

¹⁶ M yaa nìn ká a-nyɔɔbundee, m dù-dì kí ŋmɔ́ ní kí náĺ. Di nìn tìì-mi mmɔn nì dipɔɔpindi ní. Di sá yii bi dū-mi ki sú sii m-Dindaan Unimbɔti Mpɔŋkɔdaan ní.

¹⁷ Maa kāl̀ bibeeliliibi kansikin ki kɔ̄ntì m-nimbiliŋ. Ama a ŋá-mi mpɔn m kākatì m-baba, di sá yii a yāntì m díkí a-ŋuul ki gbí.

¹⁸ Ba pu ní m-falaau kaa cáá dikúntil ní? Ba pu ní m-buuŋŋu kaa kúù ki kpántì taagbunjaanjaan ní? Ibaamɔn, a kpántì m-cee kii mbun ŋun kíiĺ binib, baa ŋūǹ kí nīn máká ŋu-pu yii ŋu cáá nnyimaaa, ŋuaa cááyee ní.

¹⁹ Too, ti-Dindaan nín sòon̄ puee sɔ̀. «A yaa fātìi gítìń m-cee, m làá fàtīí fōō-si á nīn bí m-tundin ní á dāá yūĺ m-nimbiin. A yaa ŋūǹ kí lì tibɔti tin cáá kudapɔɔuee kí yàntī tibɔfanee, m làá fàtīí dū-si kí kpántí kii m-nyɔkɔee. An sá Juuda yab nín fàtīí gítiń a-cee, an kaa sá sii di làá fàtīí gítí bi-cee.

²⁰ Binib nee nimbiinee, m làá dū-si kí kpántí kii tasa kúti gundi din yú ki pɔ̄ɔ̄ kaa cìŋkēe ní. Bi làá jáǹ-si, ama baa làá ŋmā kí ŋá-si tiba, di sá yii m làá nīn bí a-cee kí fīī-si, ní kí gbìntī-si kí líí. Man ni-Dindaan di lī míǹ.

²¹ M làá fīī-si kí nyāntí bitɔŋfitiibi ŋaan, m làá fōō-si bin dàkà tipɔmbɔtee ŋaan kí líí.»