Jérémie 1 - UNIMBƆTI NYƆƆBUNDI GBƆŊKU

¹ Tibɔti tin Ilikiyawuu jipɔɔn Yeereemii sòon̄ee sɔ̀. Yeereemii nìn sá bisaraaŋaliibi bin kóò Anatooti tiŋkin, Beenjameen naakookun yab tinjandinee dicaŋkun ní.

² Amoon jipɔɔn Joosiyaasi nín kāl̀ dibeel Juuda tiŋki pu abin saalaa nì ditataatiil poonee ní ti-Dindaan sòon̄ nì Yeereemii tibɔti nee.

³ U nìn gíti sòon̄ nì u ŋyunti ŋun Joosiyaasi jipɔɔn Yooyakiim nìn kāl̀ Juuda tiŋki pu dibeelee. U nìn gíti tí sòon̄ nì u njoolkaam Joosiyaasi jipɔɔn Seedeesiyasi nín kāl̀ dibeel abin saalaa nì dipeepeekaal poon ŋmaluluutiu poonee. Ŋyunti gbanti ní bi cúú Jeerusaleem yab ki cūnnì kuyuŋu.

Unimbɔti yíiń Yeereemii ú nīn sá u-bɔnaatiliu

⁴ Ti-Dindaan nín sòon̄ nì mi tibɔti tiŋyee sèé yii:

⁵ «Kí wàatī ḿ mā-si kí tàkan̄ a-na poonee, m nìn pée nyí-si ní. Kí wàatī á nyā a-na poonee, m nìn gāntì-si ki síiǹ á nīn bí m-tundin. M dū-si ki kpántì m-bɔnaatiliu atimbun cee.»

⁶ Ní m kíí yii: «Too, ti-Dindaan Unimbɔti, m dáá sá campɔnti ní, maa nyí isoon.»

⁷ Ní ti-Dindaan kíí-mi yii: «Taa lì yii: <M sá campɔnti.> Laakin m yaa pée tú-see, á cù. M yaa pée tīī-si mara á sòoǹ puee, á sòoǹ míǹ.

⁸ Á taa fàŋkì binib gbanti nimbiin, di sá yii m làá nīn bí a-cee kí fīī-si.» Ti-Dindaan nín sòon̄ nì mi puee dee.

⁹ Niinee ní ti-Dindaan tāntì u-ŋal ki gbēē m-nyɔkɔ ní ki bí-mi yii: «Kpèè, m dū m-bɔti ki ŋá a-nyɔkɔn.

¹⁰ Á béé díǹ yii m tīī-si mpɔn atimbun nì abee pu. A làá kpìkitī kí lábití kí cìb̄, kí bīil̀ kí kpēelikì, ní kí fàtīí mā kí cóoń.»

Amandi supandi nì dikumbool din nùuǹee bɔti

¹¹ Ti-Dindaan gíti sòoǹ nì mi yii: «Yeereemii, ba ní a wāĺ?» Ní m kíí-u yii: «Amandi supandi ní m wāĺ.»

¹² Ní ti-Dindaan bí-mi yii: «A lafun wál̀-dì tiŋman. Di sá yii m cí kí ŋá tin m sòon̄ee.»

¹³ Ní ti-Dindaan gíti sòon̄ nì mi nliliitiim yii: «Ba ní a gíti wāĺ?» Ní m kíí yii: «M wāĺ dikumbool tɔ́kɔ́ ki nùuǹ di-nyɔkɔ túĺ ŋgan pú.»

¹⁴ Ti-Dindaan bí-mi yii: «Ŋgan pú ní nnaabu làá nyānní kí dūú pɔ̀l̄ kitiŋ kɔkɔ nib pu.

¹⁵ Di sá m nín lī puee sèé. M làá yíiń adican nì abee ŋin kɔkɔ bí ŋgan púee nib. Bi làá dāá dāan̄, ní báà ŋma bɔtiu ń dū u-beejal kí síiń Jeerusaleem punyɔmmu nyɔkɔpu. Bi làá dāá màntīí tū ki-gundi, ní kí dāá já nì Juuda timmu kɔkɔ nib.

¹⁶ Míǹ ní m làá ŋá kí sòoǹ bi-bɔti ikpiti in kɔkɔ bi ŋée pu. Di sá yii bi dū-mi ki fá, ki cūtìi bíi tòotī awaa, ki gbàantí awaa ŋin bíǹ bi-ba kpítèe taapu.

¹⁷ Siiyee, yòon̄ a-gbajau kí gbìn̄. Yīkìí yūĺ kí cùú sòoǹ nì bi tin kɔkɔ m tīī-si mara á sòoǹ nì bee. Á taa fàŋkì-bi, yaa sá fám, man m-ba di làá fàaǹ-si bi-nimbiin.

¹⁸ Kí yòon̄ díǹ kí nīn cée, m làá dū-si kí kpántí kii kitiŋ kin bi máń digundi ki túee. A làá nīn bí kii tikúti jaantalkuee, àá tasa kúti gundee kitiŋee kɔkɔ nimbiin, nì Juuda tiŋki bɔtiibi nì ki-bɔtibiliŋ nì ki-saraaŋaliibi nì kitiŋee nibul kɔkɔ nimbiin.

¹⁹ Bi làá já nì si, ama baa làá ŋmā kí ŋá-si tiba. Di sá yii m bí a-cee kí fīī-si. Man a-Dindaan di lī míǹ.»