Genèse 40 - UNIMBƆTI NYƆƆBUNDI GBƆŊKU

Faaroo tɔntɔŋkpilib bili damintiiti

¹ Míǹ boonee ní bin pūul̀ Faaroo kpɔnɔbee kpiliu nì bin bàtī ndaam ki tìì-uee kpiliu yīntiǹ bi-dindaan Eejipiti bɔtiu.

² Ní Faaroo fōō u-tɔntɔŋkpilib bilee pu diŋuul, an dàkà yii bin pūul̀-u kpɔnɔbee kpiliu nì bin bàtī ndaam ki tìì-uee kpiliu.

³ Ní u yāntì bi cáá-bi ki pīiǹ sarka ujanjakpil un kpèé u-sarkadambee cee, laakin bi nìn pīiǹ Jooseefee.

⁴ Ní ujanjakpilee lēē Jooseefi ú nīn bí bi-cee ki tútúǹ-bi atuun. Bi nìn yúntì sarka poon ŋwaam.

Jooseefi lēē bisarkadambi bili damintiiti taapu

⁵ Bi bí sarkan niin ní kunyeeu kubɔee, un pūul̀ Eejipiti bɔtiu kpɔnɔbee nì un bàtī ndaam ki tìì-uee liitil dámintì, báà ŋma nì u-damintiiku nì ku-taapu.

⁶ Kutaa wúntèe Jooseefi dɔ́miń bi-cee ní ki ká yii an kaa mɔ̄ǹ-bi.

⁷ Ní u bālifì-bi yii: «Ba ŋá ní ni kā míǹ díǹ an kaa mɔ̄ǹ-ni ní?»

⁸ Ní bi kíí-u yii: «Ti dámintì ní ubɔ kaa bí kí tùkù-ti taapu.» Ní Jooseefi bí-bi yii: «Unimbɔti di kaa tùkù tidamintiil taapuɔɔɔ? Míǹ puee māafìmaan-mi ni nín dámintì puee.»

⁹ Ní bin bàtī ndaam ki tìì ubɔtee kpiliu máafì Jooseefi u-damintiiku yii: «M dámintì yii busubu bun bi yíì fiinyee di yú m-nimbiin,

¹⁰ ki cáá apan ata. Ní busubuee púkuḿ ki lòon̄ abil ní abil mántì.

¹¹ Ní m ŋúb́ Faaroo sambinyɔkaaki m-ŋaan, ki kītì fiinyi biliŋee ki ŋmáaḿ ŋi-nyim ki ŋá Faaroo sambinyɔkaakin ní ki dūu tīī-u.»

¹² Ní Jooseefi bí-u yii: «A-damintiiku taapu sèé. Asupan atee, taapu sá iwiin ita.

¹³ An kíǹ iwiin ita Faaroo làá nyāntí-si sarkan kí gíiǹ a-tundi kí ŋúbíǹ-si, ní á tīī-u tinyɔkaal kii a nín nìn pée kpààa tìì-u puee.

¹⁴ Ama m gbāam̀-si, bi yaa fātìi fōō-si ní a-pɔbil sɔ̄ŋkèe, a mun ń téetí kí ŋá-mi tiniti kí sòoǹ m-bɔti kí tùkù Faaroo kí nyāntí-mi sarka nee poon.

¹⁵ Di sá yii bi cúuń-mi mpɔn ní Eebru yab tiŋkin. Doo nee muee, maa ti ŋá tiba ní bi dū-mi ki tɔ́ sarka.»

¹⁶ Bin pūul̀ ubɔti kpɔnɔbee kpiliu nín ká yii Jooseefi tùkū u-bɔɔ u-damintiiku taapu an ŋān̄ee, ní u mun bí Jooseefi yii: «Ma mun dámintì yii bikpɔnɔmɔntiibi tikabiti tita ŋɔ́kɔ́ tɔb pu ní m tú.

¹⁷ Ní kukabiku kun tɔ́kɔ́ yilpuee poonee, bikpɔnɔmɔntiibi bin kɔkɔ ubɔti ŋmóòyee kā, ní inoon dòoń ki jīǹ an kpɔnɔbee m-yil pu.»

¹⁸ Ní Jooseefi bí-u yii: «Kpèè, a-damintiiku taapu sèé. Tikabiti titee, taapu di sá iwiin ita.

¹⁹ An kíǹ iwiin ita Faaroo làá nyāntí-si sarkan, kí lēē a-yil, kí cáá a-wunti kí lúntí ndɔ pu, ní inoon ń dāá jī a-nanti.»

²⁰ Iwiin ita dalee, an dūu ŋmāntiǹ Faaroo maaliwiiŋŋu jiŋaaliu, ní u yíiń u-tɔntɔnliibi kɔkɔ jiŋaal. U yāntì bi nyántì bin bàtī ndaam ki tìì-uee kpiliu nì bin pūul̀-u kpɔnɔbee kpiliu ki cáań u-tɔntɔnliibi kɔkɔ nimbiin.

²¹ Ní Faaroo gíiǹ bin bàtī ndaam ki tìì-uee kpiliu tundi ki ŋúbiǹ-u, ní úǹ bātì ndaam ki tīī-u.

²² Ama ní u yāntì bi dū bin pūul̀-u kpɔnɔbee kpiliu ki lúntì ndɔ pu, kii Jooseefi nín nìn tùkū-bi bi-damintiiti taapu puee.

²³ Ama ní bin bàtī ndaam ki tìì Faarooyee kpiliu súntì Jooseefi pu, kaa téetì kí sòoǹ u-bɔti kí tùkù ubɔti.