Galates 5 - UNIMBƆTI NYƆƆBUNDI GBƆŊKU

Ní taa fá ni-batɔl

¹ Kriisitoo nyántì-ti kuyuŋun tí nīn tɔ́ ti-ba ní. Míǹ puee, ní nīn bímaan dibatɔlee ni, kí taa gíti kɔ́ kuyuŋun.

² Ní pīlifìmaan-mi! Man Pɔɔl bíi tùkù-ni yii, ni yaa yāntì bi gíí-ni dikpancandee, naa ti bíi páatí tiba Kriisitoo pu.

³ M làá gíti bùsì kí tùkù uninja sá kamaa yii, un yaa yāntì bi gíí-u dikpancandee, an bàlifī ú nīn ŋúb́ Mooyiisi marab kɔkɔ ní.

⁴ Nimbi bin kɔkɔ nyàab̀ kí nīn bí deedee Unimbɔti nimbiin nì marab ŋúbitam puee, ni nì Kriisitoo yākatì tɔbin, ni nyáń Unimbɔti bìintamin.

⁵ An yaa sá timbee, ti máká ní ki kā ki cí kí kpántí deedeedambi Unimbɔti nimbiin, kun puee ti fōō Kriisitoo ki kíí ní Unimbɔti Fam bí ti-ni.

⁶ A yaa kpántì Yeesu Kriisitoo yɔuee, a yaa gíí dikpancandaaa, a yaa kaa gííyaaa, an kaa páb́, kun di páb́ee di sá a-fookiiu ń nīn tūǹ ditundi nì dineendi.

⁷ Ni nìn còom̄ tiŋan. Ŋma di pīiǹ-ni nsan ní gbèen̄ kí taa ti gbìl̄ kí tīiǹ ibaamɔn ní?

⁸ An kaa sá un di yíì-ni ní nīn nóó-uee cee ní tíǹ nyánní.

⁹ Ŋkpɔnɔnyɔkɔ fiii di yàntī kpɔnɔ saabu kɔkɔ jɔ́ḿ.

¹⁰ Ama man máká ni-pu yii ti-Dindaan puee, naa làá kpántí ni-landɔkɔi. Un di yaa cáań fìkil fikil ni-kansikinee, báà udaan yaa yāntì ki sá un, ditafadaaldi dɔ̄ ki cí-u.

¹¹ Nnabiyaamu, m yaan bíi tùkù binib yii an máaǹ bí gíí dikpancandee, ba pu ní bi bàà gíti páb̀-mi? M yaan lī míǹ, Kriisitoo dɔpuntikaaŋu bɔti kaa bàà sá tibɔti tin páb̀ binibee.

¹² M bàà là bin páb́-ni ní gííyee ń cù bí fàatī-bi.

¹³ Míǹ puee, nnabiyaamu, ni ká yii Unimbɔti yíiń nimbi ní nīn bí dibatɔlin. Ní taa lákatí dibatɔlee pu kí nīn ŋáań min ni-bimbikpitim lèe, ama ní nīn néeń tɔb kí nīn tútúǹ tɔb.

¹⁴ Di sá yii marab kɔkɔ taapu di sá unee, yii: «Á nīn néeń a-juti kii sii a-bee.»

¹⁵ Ama ní kpèè tiŋan: ni yaa bí ki júntí tɔb ki cátikí tɔbee, ni làá kúntí tɔb dee.

Tí yàntī Unimbɔti Fam ń kpòotī-ti

¹⁶ Tin m tùkù-nee di sá yii ní yàntī Unimbɔti Fam ń kpòotī-ni, kí taa nín̄ nóó min ni-bimbikpitim bàlifēe.

¹⁷ Di sá yii, ti-bimbikpitim nín là min miŋyee, Unimbɔti Fam kaa là míǹ, ní min min Unimbɔti Fam lèe, ti-bimbikpitim mun kaa là míǹ. Tiwan tilee jáaǹ tɔb ní. An di yì-tì ní taa ŋūǹ kí ŋá min ti bàà là kí ŋée.

¹⁸ Ama Unimbɔti Fam yaa kpòotī-nee, naa ti bí Mooyiisi marab taapu.

¹⁹ An kaa pɔ̄ɔ̄ tí béé mbimbikpitim nín tūǹ atuun ŋin ti-wuntinee: an di sá tilaakpaal, tijɔkɔndi, bimaramɔntiibi fátam,

²⁰ diwaatootil, dinyɔɔjil, kináŋ, kujaau, kudɔ̀ŋu, diŋuul, ikummunti, diyakatil, digàntil,

²¹ nnimbidiki, ndanyoon, mpoo, nì tin kɔkɔ náań nì tibɔti neeyee. Kii m nín nìn tùkū-ni puee, m tí bíi kpáafí-ni yii bin ŋáań an bɔti gbantee kaa dāa kóò Unimbɔti Beelin.

²² Ama, dibil din Circir Fam yàntī unil ń lòoǹee di sá dineendi, dipɔɔpindi, ŋgbansɔŋfi, kimɔtii, á nīn sūǹ binib saai, kí nīn ŋáań tiŋan, kí nīn bí deedee,

²³ kí nīn mɔ̄, kí ŋúb́ a-ba. Mara ubɔ kaa bí ki jáà nì an bɔti gbanti.

²⁴ Di sá yii Yeesu Kriisitoo yab dū bi-bimbikpitim nì tin mì néeń ki lèe ki kpáá ndɔpuntikaa pu.

²⁵ Ŋfam nín tīī-ti dimaŋfalee, tí yàntī Ŋfamee ń nīn kpòotī ti-bimbim mun.

²⁶ Tí taa nín̄ yòontí ti-ba yilpu, kí taa nín̄ tákà tɔb tibɔti, kí taa nín̄ cáá ipoompoon tɔb pu.