Esaïe 8 - UNIMBƆTI NYƆƆBUNDI GBƆŊKU

Yeesaya jipɔɔn yindi taapu

¹ Ti-Dindaan bí-mi yii: «Yòon̄ kupiliŋkpaaŋŋu kí ŋmà tibɔti nee ku-pu yii: <Makeer-Salaal-Aasi-Basi>, taapu di sá yii <Yáb́-tigaajati-malaa-difukuldi>.

² Ní m dūu dàkā binib bin pu bi cáá dimákalee seera. Bíǹ di sá usaraaŋal Uriya nì Yeebeereekiyawuu jipɔɔn Seekariyawuu.

³ Boonee ní man nì m-nimpuu un mun sá Unimbɔti bɔnaatiliuee kpáfì. Ní u cáá dipool ki màl̄ kibininjabiki. Niinee ní ti-Dindaan bí-mi yii ḿ pɔ̄-kì diyindi yii <Makeer-Salaal-Aasi-Basi>.

⁴ Di sá yii, kí wàatī kibikee ń ŋmā kí lì yii m-baa àá m-nee, bi làá yòon̄ Damaasi tiŋkin gaajati nì tin kɔkɔ bi fúkúl̀ Samaarii tiŋkinee kí cùnnì kí bíĺ Asuur bɔtiu nimbiin.»

Aram yab làá kpátí kí bìin̄ Juuda tiŋki pu

⁵ Ti-Dindaan fātìi gíti bí-mi yii:

⁶ «Dinibul nee yíì Siiloowee nyim min pùub̀ sooooyee, ní ki fàal̄ Reesiin nì Reemaliyawuu jipɔɔn pu.

⁷ An puee ti-Dindaan làá yàntī Eefiraati mɔɔkpaandi nyim min pɔ̄ɔ̄ ki wīikí tikpilee, an dàkà yii Asuur bɔtiu nì u-pɔŋkpaaŋŋu kɔkɔ ń dāá léeń bi-pu. Eefiraati mɔɔkpaandi nyim làá gbí kí jɔ̄m̀ kí páań.

⁸ Mì làá dāá bà Juuda beelin, kí gbí kí léeń kí jɔ̄m̀ kí tin sāā nneen. Mi-mɔɔgbaŋŋi làá wàan̄ kí jī a-tiŋki waaŋŋu kɔkɔ, Eemanuyeel.»

Anibul ŋin kíǹee ŋáań fám ní

⁹ Anibul, nín̄ jìkìmaan nì tifaandi! Pīlifìmaan tiŋan, nimbi ndandati timmu yab. Báà ni yaa bóob́ dikɔ̀ndi, see bí já kí pɔ̄ɔkiǹ-ni! Tiŋman, báà ni yaa bóob́ dikɔ̀ndi, see bí já kí pɔ̄ɔkiǹ-ni!

¹⁰ Báà ní sòoǹ kí bɔ́ntí tin kamaa, an kaa làá kàl̄. Báà ní kpāfì min kí lēē nlandɔkɔ, ŋuaa làá tɔ̄ ditundi, kun puee Unimbɔti bí ti-cee.

Ti-Dindaan ní binib máaǹ kí nīn tɔ́

¹¹ Ti-Dindaan cúú-mi ní ki kpáafì-mi yii ḿ taa nóó nsan ŋun ní binib nee nóóyee. U lī-mi yii:

¹² «Binib nee yaa bíi bɔ́ntí kí ŋá tiŋyee, ní taa kūtì bi-pu. Ní taa fàŋkì tin bíǹ fàŋkée, ní taa pée fàŋkì-bi.»

¹³ Ti-Dindaan Mpɔŋkɔdaan baba ní ni máaǹ kí yíiń circirdaan. Úǹ ní ni máaǹ kí nīn tɔ́, úǹ baba ní ni máaǹ kí fàŋkì.

¹⁴ U làá nīn sá circir kɔŋkooŋŋu ní ki tīī Isirayeel beel nì Juuda beel, ditaŋkpal din bi làá nīn gbéetée, ditaŋkpakpaandi din làá nīn lɔ̀kɔ̀ ki líikí-bee. U làá nīn sá kii kulaaŋŋu nì kutaliŋŋuee ní ki tīī bin kóò Jeerusaleem tiŋkinee.

¹⁵ Binib tikpil làá dāá gbéetí, bi làá dāá lítí ní kí kɔ̄fì. Kutaliŋŋu làá dāá sàl̄-bi kí kíkí-bi.

Yeesaya kā ki cí ki kpèé ti-Dindaan pú

¹⁶ M kpáafì tibɔti nee nì didàkal nee. M làá dū-tì kí dàkà m-boonnooliibi baba ní.

¹⁷ M kā ki cí ti-Dindaan. U dá láá fātì u-boon ki tīī Jaakɔb naantiibi, ama m máká u-pu.

¹⁸ Man nì mbiyaamu mun ti-Dindaan tīī-mee sá kudaaŋŋu ní Isirayeel tiŋki poon. Timbi pu ní ti-Dindaan Mpɔŋkɔdaan un kóò Siiyɔn jool puee dī ki kpáafì u-nibul.

¹⁹ Biba làá lì-ni yii: «Ní cùú ká bin kàal̀ abɔɔjal ki yíì bitaŋkpiibee, bibɔɔbi bin kpántí nneen ki sòoǹ tin bí ki dòońee. An kítì yii dinibul ń bàlifì ditaŋgbandi, kí yíiń bitaŋkpiibi binifoobi puɔɔ!» Bi yaa lī-ni mimmee,

²⁰ ní kíí-bi yii: «Ti-Dindaan dàkal nì u-bɔti ní ni máaǹ kí pīlifì.» Un kamaa yaa kaa sòon̄ mimmee kaa làá ká ntaafaawalifi.

Dibɔmbɔndi poon saŋkindi

²¹ Binib làá dāá còom̀ kí jītí kitiŋ nee pu. Bi làá dāá gīī ŋkùm ń bà-bi. Ŋkùm nín làá dāá bà-bi puee, bi làá dāá nīn kíǹ ki tòó bi-bɔtiu nì bi-Nimbɔtiu mbusu. Bi làá dāá wáaǹ kí kpèè kutaa,

²² kí dāá fàtīí kpèè kitiŋ. Kun bi làá dāá pée kée di sá dinimbinaamandi nì dibɔmbɔndi nì nnaabu nì kunyeeu kun bɔ̀ǹ kpìmmee.

²³ Bin bí dibɔmbɔndi gbantinee kaa làá dāá ŋmátí. Iyunti in jítèee ti-Dindaan nìn kɔ́ǹ Sabulɔn nì Neefitalii timmu icoo. Ama iyunti in dòońee, u làá dāá tīī didandi din kpàkaǹ tiŋkuee, nì Jɔɔdan buŋŋu ŋwìiń nyalaŋki pú, nì Galiilee tiŋki kin binicambi kóòyee tinyool.