Esaïe 56 - UNIMBƆTI NYƆƆBUNDI GBƆŊKU

DIJANTATAATIIL ( 56–66 ) Baa làá ti gàntī ubɔ

¹ Ti-Dindaan nín lī puee sèé: «Nín̄ nóómaan mara kí nīn ŋáań tin bí deedeeyee. Di sá yii difiil din m làá cáańee tóob́ kí bàń dee. Án làá lēē kí dàkà-ni yii m là kí fīī-ni ní.

² Unil un di ŋáań tin m lēe, kinibiki kin di ŋúb́ an bɔti tiŋanee, un di tɔ́ ŋwiŋŋuŋfikaa kaa bíiĺ-ŋuee, un di cútí u-ba kí taa ŋá ikpitee bí mmɔnneeee!»

³ Unicaan un di dū u-ba ki nákáǹ ti-Dindaanee ń taa dàkafì kí lì yii: «Báà án ŋá pu, ti-Dindaan làá nyāntí-mi u-nibul kansikin!» Ufaal mun ń taa dàkafì kí lì yii: «Man pée sá busukulimbu ní!»

⁴ Di sá yii ti-Dindaan nín lī puee sèé: «Bifaabi bin di tɔ́ m-wiŋŋuŋfikaai, ki lēē kí nīn ŋáań tin di fáatì-mi, ní ki ŋúb́ m-poondi marab tiŋanee,

⁵ m làá cóoń-bi ditaŋkpal m-Diiku nì m-cindi poon, bí nīn cáa téetí bi-yiŋŋi pu. Án di dāa cáá kudapɔɔu ki jítiǹ jipɔmbi nì bisalib. M làá dāá tīī-bi diyindi din làá nīn pée bí ki cá jaanjaan, kaa làá kpìtī dalba dalbee.»

⁶ Binicambi bin di dū bi-ba ki nákáǹ ti-Dindaan ki tɔ́-u, ki néeń-u, ki sá u-tɔntɔnliibee, ti-Dindaan nín sòon̄ bi-pu puee sɔ̀. Bi yaa tɔ́ ŋwiŋŋuŋfikaa kaa bíil̀-ŋu, ní ki ŋúb́ m-poondee,

⁷ m làá dāá yàntī bí dāan̄ m-circir jool pu, ní kí dāá yàntī bí fàal̀ m-wimmeem Diikun. M làá dāá fōō saraabi nì tiwampɔkaal tin bi cāabìń ki pāantí m-saraafaŋŋu puee. Di sá yii bi làá dāá nīn yíì m-Diiku yii: <Anibul kɔkɔ wimmeem Diiku ní.>

⁸ Ti-Dindaan Unimbɔti un kóoǹ Isirayeel yab ki kpáfèe nín lī puee sɔ̀. M nìn pée kóoǹ biba ki kpáfì bi-cee, m làá fàtīí kóoǹ biba mun kí kūtì.

Bin kaa máaǹ kí nīn sá bikpilibee

⁹ Nimbi ipeel in kɔkɔ kóò tisatinee, nimbi ipeel in kɔkɔ kóò kubambaŋŋunee, dāá jīmaan tijineeee!

¹⁰ Binib bin cí Isirayeel tiŋkee kɔkɔ sá bijɔfub ní, baa pée kāntí tiba. Bi-kɔkɔ sá iboo in sá imuunee ní, iaa ŋūǹ kí gbōol̀. I tātìi dɔ̄ ki dámintí, ní ki néeń ŋgeem.

¹¹ Bi sá kii iboo in cáá mpooyee ní, bi jīǹ kaa díkì. Ama bíǹ di bàà sá bipikpaaliibi! Baa pée gbìl̀ tibɔti taapu báà fiii. Bi pée ŋáań tin fáatiǹ-bee ní, báà ŋma pée dàkafī u-jandi ŋmaniŋma pu ní.

¹² Bi lì yii: «Dāam̄maan tí cùú nyàab̀ ndaam! Ti làá nyɔ̀ ndaam min pɔ̄ɔ̄yee kí gbí. Fool mun làá fu nín̄ bí kii díǹ nee ní, ndaam kíǹ ki wīikí tikpil!»