Biblia Todo Logo
Bìoball air-loidhne

- Sanasan -

Esaïe 54 - UNIMBƆTI NYƆƆBUNDI GBƆŊKU


Jeerusaleem kaa ti sá kitiŋ kin bi dūu fée

1 Unimpuŋmaŋŋmanti un kaa màl̄ ki kée, nín̄ kūuntí nì dipɔɔpindi. Sii un kaa nyí imatiŋween ki kée, nín̄ fátí iwiliili kí nīn fàal̀, di sá yii sii unimpu un a-cal cāntèe làá màal̀ mbiyaamu kí jītíǹ un cáá calee. Ti-Dindaan di lī míǹ.

2 Wàan̄ tanti un poon ní a kóòyee, mɔ̀tīí kpátí a-tantiu satab mpaan ń wàan̄. Taa yàntī laaba ń kíń fám! Dáaĺ a-tantiu ŋmiii í mɔ̀tīí dàntī tiŋan, kí mɔ̀tīí kpáá u-kpakpaaŋi ŋí báań tiŋan.

3 Di sá yii a làá wàan̄ a-tiŋki ŋŋaŋgan pú nì ŋŋaŋgiil pú, a-nibooliŋu làá fōō atimbun kí nīn kíǹ ki yì. Bi làá dāá kàl̄ ntimu mun bi dūu fée poon.

4 Taa fàŋkì tiba, icoo kaa làá ti cúú-si. Taa yàntī yári yari ń kɔ́-si, baa làá ti kpèè kí sìŋkīǹ-si. A làá súntí a-pɔnti cooi, aa ti làá téetí bi nín sīī-si pu ŋyunti ŋun a sá ukpiipuee.

5 Di sá yii un náań-see, úǹ di sá a-cal. U-yindi di sá <Ti-Dindaan Mpɔŋkɔdaan>. Un dá-si ki líìyee di sá Isirayeel Circir Nimbɔtiu, úǹ ní bi yíì yii <Kitiŋ kɔkɔ Nimbɔtiu>.

6 Kii unimpu un u-cal cāntèe, a nìn kɔ́ kunimbaakpaaŋŋun. Ama ti-Dindaan fātìi yíiń-si. A-Nimbɔtiu bí yii: «Unil kíikí kí fá unimpu un u cáá u-naacimpɔntineeee?»

7 M nìn dū-si ki fá ŋyunti ŋubɔ poon fiii, ama m-neeŋkpaandi puee, m làá fàtīí gíiǹní-si.

8 M nìn gíí a-pu diŋuul ŋkpitim pu, ní ki nìn fātì m-kpaŋkpamboon ki tīī-si. Ama m-neendi din kaa cáá dikúntilee puee, m làá dàkà-si m-saasɔl. Man a-Dindaan un dá-si ki líìyee di lī míǹ.

9 «M làá ŋá kii Noowa yuntiŋuee ní. M nìn pōoǹ yii m kpá kí gíti yàntī nnyiŋgbeen ń dāan̄ kitiŋ pu. Míǹ mbaantiim ní díǹ nee m tí pūtì yii maa làá ti gíí diŋuul a-pu ní kaa nín kpìl̄-si.

10 Báà ajoon yaa kpīkitì, ní ŋgbantamu yaa cīŋkì, dineendi din m cáá a-puee kpá kí kpántí, ní dipoondi din m pōoǹ-si kí yàntī á nīn bí ŋgbansɔŋfinee kpá kí kpìtī. Man a-Dindaan un dàkà-si u-saasɔlee di lī míǹ.»


Jeerusaleempɔɔn

11 Jeerusaleem tiŋki unandaan, sii un ní kubuŋkpaaŋŋu cīŋkì ní ubɔ kpá kí ŋméeǹ-see. Man a-Dindaan di lī-si yii: «Kpèè, m làá fàtīí mā-si kí tɔ́kɔń ataŋkpamɔnti ŋin máǹee pu. A-nyeel làá nīn sá ataŋkpamɔnti abɔn ŋin bi yíì yii safiiree ní.

12 M làá dū ataŋkpamɔnti ŋin bi yíì yii rubiisee kí mā a-guŋŋi yilpu, ní kí dū ataŋkpamɔnti ŋin jìl̀ee kí mā a-punyɔmmu.

13 M làá dāá dàkà a-biyaamu kɔkɔ, ní bí dāá nīn bí ŋgbansɔŋfin.

14 Deedee poon ní a làá dāá nīn bá kaa cìŋkī. Ubɔ kaa ti làá wɔ́b́-si jaanjaan, ní aa ti làá fàŋkì tiba mun. Ubɔ kaa ti làá fàaǹ-si, dinyoondi kaa làá ti cúú-si dalba dalba.

15 Ubɔ di yaa táká-see, an kaa nyánní man cee. Un kamaa di yaa táká-see, see udaan ń lítí a-nimbiin.

16 Kpèè, man di náań ucaa un di fùkum̄ amɔsiŋkoon ŋmiŋu kí mɔ́ɔ́ tijanjawan tin kamaayee. Man di tí nāantí unil un ŋūǹ kí bīil̀-tèe.

17 Tijanjawan tin kamaa ní bi yaa mɔ́ɔ́ kí dūú já nì see, án kaa làá ŋá-si báà tiba. Ní ubɔ yaa cūnnì-si ibɔsoonee, a làá sòoǹ kí líí-u. «Difakal din man ni-Dindaan bɔ́ntì ki yóoǹ m-tɔntɔnliibee dee, m nín làá sòoǹ kí pɔ̀-bi puee dee. Man ni-Dindaan di lī míǹ.»

BIBLE EN N'TCHAM (Bassar) © Alliance Biblique du Togo, 2013. 

Bible Society of Togo
Lean sinn:



Sanasan