Esaïe 53 - UNIMBƆTI NYƆƆBUNDI GBƆŊKU

¹ Ŋma di fōō tibɔti tin ti gbìl̄ee ki kíí? Ŋma ní ti-Dindaan lēē u-pɔŋŋu ki dàkā?

² Ti-Dindaan nimbiin ní u wíiǹ kii disupɔmbilee, kii nsunyaan ŋun nyáń kitiŋkuliŋŋi pu ki túkúee. Waa nìn cáá kunyaaŋŋu àá jilma ubɔ kí ŋmā kí dáaĺ ti-nimbikpeeŋu. Tiba kaa nìn bí u-ni kí ŋmā kí fáatíǹ-ti.

³ Binib nìn kpēē ki sīŋkiǹ-u ní ki nìn fātì bi-boon ki tīī-u. U nìn sá unil un jíń falaayee, ki nìn mántiǹ iyaliŋki. Kii unil un ní báà ubɔ kaa là kí wāl̀ee, ti nìn kpēē-u fám, kaa nìn dū-u ki yíiń tiba.

⁴ Ama an sá ti-weeŋyi ní u nìn fōō, timbi falaau ní u nìn yōoǹ ki túǹ. Ní timbi nìn dàkafī yii Unimbɔti di bíi dátí u-tafal míǹ, Unimbɔti di fáá-u ki sīntiǹ-u taapu.

⁵ Ama timbi yìntitam pu ní u nìn fōō tiweendi, timbi kpitii pu ní bi nìn sāaǹ-u. Ditafadaaldi din tìì ŋgbansɔŋfee jéetì u-pu. Tiweendi tin u nìn fōōyee di tìì-ti dicáaǹdi.

⁶ Ti-kɔkɔ nìn tú ki yìiǹ kii ipiiyee, ní báà ŋma túĺ u-saŋŋu. Ama ní ti-Dindaan dū ti-kɔkɔ yìntitam tafadaaldi ki túǹ-u.

⁷ Bi sāaǹ-u, ama ní u sīntiǹ u-ba taapu kaa wāaǹ kinyɔkɔ. Kii bi nín cáǹ upii kí kpɔ̀ puee, àá kii bi nín cēē dipibil kuti di ŋmí kaa sūǹ puee, míǹ ní u nìn ŋmí kaa wāaǹ kinyɔkɔ.

⁸ Bi nìn cúú-u mpɔn, ki sòon̄ u-bɔti, ki cáá-u ki búntì. U-yuntiŋu yab ŋma di nìn súń u-pu? Bi lēē u-maŋfal binifoobi tiŋkin. Bi gbáń-u u fōō tiweendi u-nibul yìntitam pu.

⁹ Bi síb́-u binikpitib kansikin. U-kaakul bí bigaajab yaŋ kansikin. Ama waa ŋá tipɔmbɔti tibaaa, nnyimɔn ŋubɔ mun kaa nyáń u-nyɔkɔn.

¹⁰ Ti-Dindaan di nìn yāntì falaa bàn̄-u. Min kamaa sii Unimbɔti dū u-maŋfal ki ŋá dibɔkpil saraau bin kíǹee puee, u làá ká u-naantiibi ní kí kàl̄ kí yúntí. Ti-Dindaan làá dī u-pu kí ŋá u nín là puee.

¹¹ U nín jíń falaa uŋyee puee, u làá dāá ká ŋwalifi ní kí nīn bí nnaamin. M-tɔntɔnliu, deedeedaan tiŋman pu yɔuee, làá yàntī binib tikpil ń kpántí deedeedambi, kun puee úǹ u-ba di fōō bi-yìntitam ki túǹ.

¹² An puee ní m làá kàaǹ-u kí kūtì binikpaambi pu. U nì mpɔndambi di làá yàkatī tiwan tin ní bi jáń ki fōōyee. Di sá yii u dū u-maŋfal ki sú ki kpíì, ní ki kíí bi kàan̄-u ki tɔ́ binikpitibin. Tiŋman, u kíí ki túǹ binib tikpil kpitii, ní ki mēē binib bin di ŋá ikpitee yil pu.