Esaïe 47 - UNIMBƆTI NYƆƆBUNDI GBƆŊKU

Ti-Dindaan làá sìntīǹ Babiloon tiŋki taapu

¹ Babiloon tiŋki, kpákatí a-beejal pu kí kàl̄ ntampukumin. Babiloon yab tiŋki, kàl̄ kitiŋ. Di sá yii dalba dalba baa làá ti pée yíiń-si yii <Babiloon kinyannyaaŋŋi>, <Babiloon tiŋki kin là ki-bee>.

² Yòon̄ kunaau nì nnaamintidɔ kí nà ŋyim. Páatí a-ŋaabiiŋkaaŋu, kí kóoǹ a-wɔndoou, bìitī a-tapaŋŋi pu kí dùtī ibun.

³ Binib làá ká a-cancaŋgbeel, kí ká kun di kɔ̄ntí-si icooyee. Man làá tɔ̀ ipɔntoon, ní an kaa cáá yii ubɔ làá pìin̄-mi nsan.

⁴ Un di dá-ti ki líìyee, bi yíì-u yii: «Ti-Dindaan Mpɔŋkɔdaan ní.» Úǹ di sá Isirayeel Circir Nimbɔtiu.

⁵ Babiloon yab tiŋki, tàtīí kàl̄ kí taa pée mūlifì tiba. Kɔ́ kí báĺ dibɔmbɔndin. Di sá yii baa ti làá pée yíiń-si dalba dalba yii: <Un jīǹ abee kɔkɔ pu dinyandee>.

⁶ M nìn gíí m-nibul pu diŋuul ní. M nìn dū bin m yèe ki fá, ní ki nìn dū-bi ki ŋá a-ŋaan. Ama ní aa súń bi-saai báà fiii, a wɔ́b́ bijaŋkpilib an ti kpáàa jítì mara pu.

⁷ A nìn bí ki lì yii: «M làá nīn pée bí kí nīn sá un jīǹ dinyandee ní ki cá jaanjaan.» Aa dākafì a-pɔbil poon tibɔti nee pu, kaa dākafì foolboon pu.

⁸ Kɔŋkɔnnee pīlifì tin bí nee, sii umɔnjil. A pée kā a-beejal pu nì dimákal ki lì a-pɔbil poon yii: «Man baba di pée bí, ubɔ kaa ti bí kii mamee. Dalba dalba maa làá kpántí ukpiipu, ní m-biyaamu mun kpá ki làá kpú.»

⁹ Tibɔti gbanti liitil làá bàń-si dicilpu dicilpu ní, ŋwimbaanti. A-biyaamu làá kpú ní á kpántí ukpiipu. Bikpaŋkpantiibi nì bibɔɔbi kaa làá ŋmā kí pìin̄ nsan tíǹ ń taa bàń-si.

¹⁰ A nìn máká a-tuŋkpitiŋ pu ní ki nìn lì yii: «Ubɔ kaa wāĺ-mi.» An sá a-ciiŋyi nì a-nyil di nìn kíil̀-si, di sá yii a nìn lì a-pɔbil poon yii: «Man baba di pée bí, maa cáá juti!»

¹¹ Nnaabu làá jēetí a-pu, aa làá béé a nín làá ŋá puee. Asaluu làá kɔ́-si, aa dāa ŋūǹ kí wúń a-ba pu. Dinimbinaamandi din pu aa bàà túkúee làá jēetí a-pu dicilpu dicilpu.

¹² Nín̄ pée gbíntìi nìkì ki ŋáań a-bɔɔtuuŋŋi nì a-kpaŋkpantiiku. Atuun gbanti pu ní a gīī doooo a-biyatin. An yaa yíì a làá dāá páatí ŋi-pu, an yaa yíì a làá ŋmā kí fàaǹ bin kíǹee ŋi-pu.

¹³ A bālifì dibalifil ki tin kpáàa gīī. Bin cútí kutagbɔŋu kí yàkatī yàkatī, ki kpèé iŋmalbijaa ki nàatī tin làá jītí a-pu uŋmal kamaayee ń dāan̄ kí fīī-si!

¹⁴ Bi làá dāá kpántí kii timɔkulindee ní, ní ŋŋmi ń dāá wà-bi. Baa làá ŋmátí kí nyā aŋmilimbilin. An kaa dāa sá kii kpɔnɔŋmiŋu, àá kii ŋŋmiwulkaayee!

¹⁵ Míǹ ní bibɔɔbi bin pu a nìn gīī doooo a-biyatinee làá nīn sá ki tīī-si. Kɔŋkɔnnee, bíǹ di tú ki yìiǹ an kɔkɔ puee, ní bi-kansikin ubɔ kaa ŋūǹ kí fīī-si.