Esaïe 42 - UNIMBƆTI NYƆƆBUNDI GBƆŊKU

Ti-Dindaan tɔntɔnliu (nlampeepeekaa)

¹ Ti-Dindaan bí yii: «Kpèè, m-tɔntɔnliu, m ŋúb́ u-ŋal, m lēē-u ní m-pɔbil sɔ̀m̀ u-pu. M dū m-Fam ki ŋá u-pu ú dāá sòoǹ deedee bɔti kí tùkù atimbun kɔkɔ.

² Waa làá dāá nīn tátí kaa làá dāá sòoǹ mpɔn, baa làá dāá gbìl̄ u-nyɔkɔ pu adan pu.

³ Waa làá dāá púntí mmɔ́ɔn ŋun gíì ki gbàkēe, waa làá dāá gbíntí fitila un bíi fòol̄ bílbilee. Ama u làá dāá lēē tibɔti nín dɔ̄ nsan puee kí dàkà.

⁴ Waa làá dāá wɔ̀b̄, u-wunti mun kaa làá dāá yɔ̀tī kí cáá sāā ŋyunti ŋun ní u làá dāá yóoń kitiŋ pu tibɔti nín dɔ̄ nsan puee. Ntimu mun nnyim māntìi túee dāa kā ki cí kí fōō u-marab.»

Ŋwalifi làá ŋmíntí atimbun pu

⁵ Ti-Dindaan Unimbɔti di náań kutagbɔŋu ní ki kpátì-ku ki dāntì. Úǹ di kpátì kitiŋ nì tin kɔkɔ nyēē ki-puee. Úǹ di tīī binib bin kóò ki-puee dimaŋfal, ki tīī bin bí ki-puee kufoou. U nín tùkū u-tɔntɔnliu puee sèé:

⁶ «An sá man ni-Dindaan di yíiń-si deedee yíintam. M ŋúb́ a-ŋal, man di máń-si. M làá dī a-pu ní kí ŋá mpèé nì dinibul, sii di sá atimbun walifiŋu.

⁷ A làá ŋúbití bijɔfub nimbiliŋ, kí nyāntí bisarkadambi bi-sarkadiiŋŋin, kí yàntī bin pīī dibɔmbɔndinee ń nyā.»

⁸ Man di sá ni-Dindaan, m-yindi dee. Maa làá dū m-nyooti kí tīī ubɔ fám, kaa làá dū m-jilmau kí tīī awaa.

⁹ Tibɔpeekaal tíǹ jítì ki dóò dee. M bíi báakí ki tùkù-ni tipɔn ní nee. M bíi tùkù-ni tibɔpɔn gbanti ní gbìl̄ kí wàatī ní tí nín bàń.

Ti-Dindaan làá tɔ̄ u-tundi

¹⁰ Ní gāāmaan nlampɔɔn kí nyɔ̄ŋkì ti-Dindaan. Ní gāā ilan kí nyɔ̄ŋkì-u doooo kitiŋ kúntilaŋki, nimbi bin bí ki còom̄ tiŋku puee nì tin kɔkɔ di pée bí u-poonee, nì nimbi bin kóò ntimu mun nnyim māntìi túee.

¹¹ Kuteeu nì ntimu mun bí ku-poonee nib ń tóoń ilan kí nīn gà mpɔn, ki kpáaǹ ntimbilimu mun Keedaar yab kóòyee. Binib bin kóò ditaŋkpal puee ń nīn gà ipampakalan, bí nīn kāń doooo ajoon yilpu kúntí kunti ki fàal̀.

¹² Bin kóò ntimu mun nnyim māntìi túee ń tīī ti-Dindaan tinyool, bí gāā ilan mpɔn kí nyɔ̄ŋkì-u.

¹³ Ti-Dindaan làá nyā kii ubaatandaanee án lùkutī-u ú já kujaau kii ujanjalee. U fáá njanjakuŋkuunti mpɔn ki bɔ́ntì kí já nì u-nannanliibi.

Tin ní ti-Dindaan bɔ́ntì ki làá ŋée

¹⁴ Ti-Dindaan bí yii: «An yúntì tikpil m kā ki ŋmí, m cúú m-ba kaa lī tiba. M bíi dùǹ kii unimpu di yáliŋkí imatiŋweenee, m-fam bíi tìfī, m fòotī kaa bà.

¹⁵ «M làá kpēelikì ajoon nì ŋgbantamu, kí yàntī kumɔsɔŋu kɔkɔ ń kpā. M làá yàntī ibun ń kpántí kitiŋkuliŋŋi ní kí yàntī anyimbɔbil ń fóotí.

¹⁶ M làá kpòotī bijɔfub kí tàkan̄ didandi din baa nyée pu. M làá kpòotī-bi bí còom̀ nsan ŋun pu baa nìn nyée pu. M làá yàntī bi-nimbiinee dibɔmbɔndi ń kpántí ŋwalifi, ní laakin kamaa aganlaka bée ń cúú tàntī. Tin bí nee kɔkɔee, see m ŋá-tì, an kaa cáá yii m làá yíí kí taa ŋá.

¹⁷ «Binib bin dū bi-mákal ki páaǹ awaa pu, ki lì tiwan tin bi dū tikúti ki mɔ́ɔ́yee yii: <Nimbi di sá timbi nimbɔtiiyee>, làá tūlifì kí gítí boon, ní icoo ń cúú-bi.

Dinibul din sá bijɔfub nì bitafakpaafubee

¹⁸ Nimbi bin sá bitafakpaafubee, ní pīlifìmaan tiŋan! Nimbi bin di sá bijɔfubee, ní ŋúbitímaan kí kpèè!

¹⁹ Ŋma di sá ujɔfu, án yaa kaa sá m-Tɔntɔnliu? Ŋma di sá utafakpaafu kii Ntuun ŋun m làá tɔ̄ee? Tiŋman, ŋma sá ujɔfu kii man ni-Dindaan nibulee? Ŋma sá ujɔfu kii man ni-Dindaan Tɔntɔnliu?

²⁰ «Sii Isirayeel nibul, a kántì tiwan tikpil, ama aa cúú báà tiba ki síiǹ. A cáá a-tafamɔnti, ama aa gbìl̄ báà tiba.

²¹ Ti-Dindaan nín sá deedeedaanee puee, an mɔ́ɔkiǹ-u ú dàkà yii u-marau sá ukpaan ki ŋān̄.

²² Ama ni sá dinibul din ní bi fúkúl̀ ki nāaǹee ní. Bi cúú ni-wanti kɔkɔ ki fōō. Bi dū ni-kɔkɔ ki tɔ́ mbòó poon sarka, ki dū-ni ki bál̀ asarkadiinni. Bi fúkúl̀-ni pílpil ní ubɔ kaa bí kí jòoń-ni. Bi cúú-ni ki cūnnì kuyuŋu, ní báà ubɔ kaa lī yii: <Gíiǹnímaan-bi!>

²³ «Ni-kansikin ŋma làá pīlifì tibɔti nee tiŋan? Ŋma di làá gíiǹ nlandɔkɔ kí pīlifì-tì kɔŋkɔnnee?

²⁴ «Ŋma di dū Isirayeel yab ki tīī bi nāaǹ? Ŋma di dū Jaakɔb yab ki tīī bi fúkúl̀? An kaa sá ti-Dindaanaaa? Di sá yii ti yīntiǹ-u, ki yíì kaa nóó u-saŋŋu ní kaa ŋúb́ u-marab.

²⁵ An pu ní ti-Dindaan kpáatì u-ŋuukpaandi nì kujaau bilisii ki sītì Isirayeel yab pu. Ku-poonee, bi sēē Isirayeel tiŋki ki māntìi tú, ama ní ki-nib kaa pée gbìl̄ taapu. Ŋŋmi fōō ki wùn̄ dinibul, ama ní baa kpáàa fōotìi yīkiǹ!»