Esaïe 4 - UNIMBƆTI NYƆƆBUNDI GBƆŊKU

¹ Yaadalee, binimpoobi biluli làá dāá tɔ̄ kí kíĺ uninjabaanti ní kí lì yii: «Timbi di làá nīn kpèé ti-ba ti-jītam nì ti-pèentam. Kun ti pée nyàab̀ a-ceeyee di sá á kíí kí cáá-ti kí nyāntí-ti ti-cooin.»

Binib bin làá kíń Jeerusaleem tiŋkinee

² Ŋwiin gbantee, tin ti-Dindaan làá yàntī án nyēe làá nīn cáá jilma nì tinyool. Tin Isirayeel tiŋki làá dāá lòoǹee làá dāá nīn sá ki-nib bin ŋmátèe faalii nì bi-nyooti.

³ Niinee bi dāa yíì binib bin kíǹ ki bí dimaŋfalin Siiyɔn tiŋkinee, bin ŋmátì ki kíǹ Jeerusaleem tiŋkinee yii <circir nib>. Bíǹ di dāa sá bin kíǹ Jeerusaleem tiŋkin, ti-Dindaan ŋmàn̄ bi-yiŋŋi u-gbɔŋkun bí nīn bí dimaŋfalinee.

⁴ Ti-Dindaan làá yàntī kubuŋu kun ŋáań binib deedee nì circiree ń jītí ní kí fíntí Siiyɔn nimpunyaambi jɔkɔnti. U làá fíntí Jeerusaleem tiŋki fatiku un u nyántèe pu.

⁵ Míǹ boonee, Siiyɔn jool kɔkɔ pu nì bin kɔkɔ làá dāá kóoǹ kí kpāfì niinee puee, ti-Dindaan làá dāá yàntī ditagbandi diba ń nyā ŋwiimpu ní ŋŋminyiim nì aŋmilimbil ń nīn ŋmíntí kunyeeu. Ní ti-Dindaan nyooti ń dāá nīn dàn̄ yilpu kii kadantikuee,

⁶ a lì kii kadantiku un bi dū tifaal ki píń án tìì mboon kutuntuŋkpaaŋŋu yuntiŋuee. Kubuŋkpaaŋŋu nì utaa yuntiŋuee, u làá dāá kpántí kibalilaŋ nì laakin binib sáń ki kóòyee.