Esaïe 12 - UNIMBƆTI NYƆƆBUNDI GBƆŊKU

Ní gāā ilan kí nyɔ̄ŋkì Unimbɔti ufiil

¹ Ŋwiin gbantee, sii dinibul din ká difiilee làá dāá lì yii: «M nyɔ́ŋkí-si, ti-Dindaan! Di sá yii a nìn gíí m-pu diŋuul, ama ní a-ŋuul sɔ̄ŋkì m-pu ní a sɔ̄ŋkì m-pɔbil.

² Kpèè Unimbɔti di fīī-mi, m cáá dimákal ní kaa ti fàŋkí. Di sá yii ti-Dindaan di sá m-pɔŋŋu nì m-laŋŋu. Úǹ di sá m-fiiliu.»

³ Ni làá dāá lúń nnyim difiil nyimbulii poon nì dipɔɔpindi.

⁴ Ŋwiin gbantee, ni làá dāá lì yii: «Nyɔ̄ŋkìmaan ti-Dindaan! Ní sòoǹ mpɔn kí dàkà u nín sá uŋyee. Ní yàntī anibul kɔkɔ ń béé u-tuŋkpaaŋŋi. Māafìmaan kitiŋ pu nib kɔkɔ min ní u-yindi sá dikpaandee.

⁵ Gāāmaan ilan kí pàkà ti-Dindaan, di sá yii u túń atuŋkpaŋkpaan. Ní yàntī duulinya kɔkɔ ń béé ŋi-pu!»

⁶ Sii un kóò Siiyɔn jool puee, fáá ŋwiliili nì dipɔɔpindi kí nīn nyàkantī, di sá yii Isirayeel Nimbɔtiu un bí a-cee ki bí circiree, sá ukpaan ní!