Ecclésiaste 12 - UNIMBƆTI NYƆƆBUNDI GBƆŊKU

¹ Taa súntí a-náanliu pu ŋyunti ŋun ní a dáá pɔ̀ɔǹee. Téetí u-pu kí wàatī ní iwiŋkpiti ń bàń, ŋyunti ŋun ní a làá dāá lì yii: «An kaa ti mɔ̄ǹ-mi ḿ nín bí dimaŋfalin.»

² Ŋyunti gbantee, ŋwìiń nì ŋwalifi làá dāá dūú kpántí dibɔmbɔndi, ní uŋmal nì iŋmalbijaa kaa dāa gíti wāĺ, ní utaa tin lì yii u nì ki báatée atagban fātìi lúntì.

³ Niinee udiciitil kíǹ ki jìkì tɔ́sí tɔsi, ní bibaatandambi ń dūú pɔ́ĺ ki kíǹ ki bōō, ní binimpoobi ń gbèen̄ dinanal bi nín kaa ti náaǹee pu, ní bin gbōontí tɔkɔlabinee kaa ti cáá kunyaaŋŋu.

⁴ Niinee kudii kun punyɔkɔki túĺ didandi púee dūu pīiǹ, ní baa ti gbìl̀ tinàti pu. Kinɔmbiki gbēeǹ kaa ti bíi sūǹ, ní baa ti gbìl̀ ilan pu.

⁵ Binib kíǹ ki fàŋkí kí dàb̄ kigbantaŋ pu, ní dinyoondi bí nsan pu. Tiyikpiti píil̀ kii nsupumpukumee, ní tiwun dūu nyīŋfì kii unaakitoon di nyáń ki lítèe, ní unil maŋfal ń lítí kii disubil di kītì ki lítèe. Tiŋman ŋwiin bí ki dòoń báà ŋma làá kɔ́ dikaakulin laakin sá u-kɔŋkooŋŋu njoolkaayee. Ŋyunti gbantee, binib lālim̀ ki gbí didandi pu kí sɔ̄ u-kpool.

⁶ Niinee ní animbil kúti ŋmibiki ń cúú tìl̄, ní sindaariya sambil ń cúú yàaǹ, ní dibool din poon nnyim gbée ń lítí kí wīī, ní guuka ŋmiiŋu ń kútí ní ú jēetí lɔkɔn.

⁷ Niinee ní ntam ń fàtīí gítí kitiŋin laakin mì nyánnée, ní kufoou ń fàtīí gítí Unimbɔti un tīī-kuee cee.

⁸ Uciŋfiti di lī yii: <Kubuŋu fám, kubuŋu fám, tikɔkɔ pée sá kii kubuŋuee ní.

Tibɔkuntikaal

⁹ Tin ti làá dūú kūtì tin bí nee puee di sá yii Uciŋfiti kaa dàkā yii u sá uciŋfiti ŋmaniŋma, ama u dàkā binib kun u nyée. U bɔ́ntì alaŋkpan tikpil, ki dākafì tiŋan ki nyàab̄ ŋi-taapu ki dɔ́ntì-ŋi.

¹⁰ Uciŋfiti pɔ́ɔǹ u-ba ki nyàab̄ anyɔɔbummɔɔn ní ki dūu ŋmàn̄ tibɔŋman.

¹¹ Biciŋfitiibi nyɔɔbuŋŋi sá kii inyanyee ní, a lì kii akpakpaa ŋin bin ŋmàn̄ tigbɔnee dūu cóoǹee. Unimbɔti un sá upikpaabaantee di tìì tikɔkɔ.

¹² M-jipɔɔn, á taa pée kūtì tiba. Á ŋmà tigbɔnee sá ditundi din kaa kúntée ní, ní kí bīfì tikpil muee gì tiwun.

¹³ Kí kúntí tin kɔkɔ bi sòon̄ neeyee, tin ti làá lèe sèé: Nín̄ fàŋkí Unimbɔti kí nīn tɔ́ u-marab. Tin unifoo kamaa máaǹ kí ŋée dee.

¹⁴ Di sá yii Unimbɔti làá dāá sòoǹ tin kɔkɔ ti ŋée bɔti, ki kpáaǹ atummɔnti nì atuŋkpiti ŋin ti ŋá dibalinee.