Apocalypse 15 - UNIMBƆTI NYƆƆBUNDI GBƆŊKU

Ituun iluli nì falaajoolkaa

¹ Ní m gíti ká kudaaŋŋu kubɔ yilpu, ku náaǹ ki cáá maamaaci. M ká ituun iluli ŋúb́ falaabi biluli. Bíǹ di sá bifalaajoolkaabi bin Unimbɔti làá dūú tɔ̄ binib pu ní u-ŋuul ń nín sɔ̀ŋkèe.

² Ní m ká tiba an náań nì tiŋku ní ki wāĺ kílkil kii digitilee ní ki ŋmàl̄ nì ŋŋmi, ní m ká bin jáń ki pɔ́ɔkiǹ upeelee nì u-naŋku nì namba un sá u-yindee yú tiŋku un wāĺ kílkil kii digitilee cee ki ŋúb́ tibati tin Unimbɔti tīī-bee,

³ ní bi bí ki gà Mooyiisi Unimbɔti tɔntɔnliu nì Dipibil laŋyi yii: «Ti-Dindaan Unimbɔti Mpɔŋkɔdaan, a-tuuŋŋi wīikí ki sá amɔnti, sii di sá atimbun bɔtiu. A nín lēē nsàmbiyaamu muŋyee bí deedee ní ki sá mbaamɔn.

⁴ Ti-Dindaan, ŋma di kaa làá fàŋkì-si? Ŋma di làá yíí, kaa làá tīī-si tinyool? Kun puee sii baba di sá circirdaan, atimbun kɔkɔ làá dāan̄ ní kí gbàan̄ a-nimbiin kí nyɔ̄ŋkì-si, kun puee báà ŋma ká a-tuuŋŋi, ŋi bí deedee.»

⁵ Míǹ boonee m ká kunimbɔtidii kun bí yilpuee cúu pīitì, ní Unimbɔti tantiu un dàkà u-bítamee yú poon,

⁶ ní ituun iluli in ŋúb́ falaabi bilulee nyánní kunimbɔtidiiyee poon ki pēē tiwampin káŋkaŋ ki jìl̀, ní ki dū sindaariya dambalau ki cúú i-biŋŋi.

⁷ Tiwan tinaa tin cáá kufoouee kubɔ tīī ituun ilulee sindaariya sambiyaamu mululi, Unimbɔti un bí jaanjaanee ŋuul gbí poon.

⁸ Niinee ní Unimbɔti nyooti nì u-pɔŋŋu yāntì nnyiim yíkì ki gbí kunimbɔtidiin, ní ubɔ kaa ti ŋūǹ kí kɔ́ niin, see falaabi bin bi tīī ituun ilulee nín dāa jítèe.