Amos 9 - UNIMBƆTI NYƆƆBUNDI GBƆŊKU

Dileedakal diŋmooŋmootiil

¹ M ká ti-Dindaan yú nsaraafan pu ki lì yii: «Gbá kí wìil̀ jaantalkub yilpu ní taapu ń cìŋkì! Gbá kí wìil̀-bi bí lítí kí tàbitì bi-yiliŋ. Bi-kansikin bin kíǹ kaa kpíìyee, m làá dū ntàataajimu kí kpɔ̀-bi. Báà unil kaa làá dāá ŋmā kí sāǹ, ní uniseen kaa làá dāá ŋmátí.

² Báà bi yaa pɔ́ɔǹ kí kɔ́ ditaŋkpiilinaaa, m làá dāá cù niin kí fàtīí gíiǹní-bi. Bi yaa láa tí jɔ́m̀ yilpuɔɔɔ, m làá dāá cù niin kí sìntīń-bi.

³ Bi yaa láa bál̀ Kaarmeel jool yilpu kúntí kuntaaa, m làá dāá cù niin kí cúuń-bi. Bi yaa láa sáǹ ki bál̀ tiŋku taapu ḿ taa ká-baaa, m làá dāá tɔ̄ tiŋkun koobuu ú jūntì-bi.

⁴ Bi-nannanliibi yaa láa jáń ki pɔ́ɔkiǹ-bi ní ki cúú-bi kuyuŋu ki cūnnì bi-tiŋkinee, m làá dāá tīī-bi mara bí pɔ̀fì-bi. M-nimbil làá dāá nīn cɔ́ bi-pu, kí ŋá-bi tikpitil, kaa sá tiŋan.»

⁵ Ti-Dindaan Unimbɔti Mpɔŋkɔdaan yaa gbēē kitiŋee, kì cìŋkī ní, ní ki-nib kɔkɔ ń kàl̄ dikpool. Kii Eejipiti mɔɔl Niil nín yaa gbí an yíkí puee, míǹ ní kitiŋ nee làá yīkì yilpu, ní kí fàtīí lítí bɔ̀b.

⁶ U máń u-kɔŋkooŋŋu yilpu fɔ́ŋŋŋ ki dū kutagbɔŋu ki dāntì kitiŋ pu. Úǹ di yíì tiŋku nyim ní ki cáá-mì ki yàantí kitiŋ pu. Úǹ ní bi yíì yii <Ti-Dindaan>.

Dibɔkpil dambi bɔsooŋyi

⁷ Ti-Dindaan lī yii: «Isirayeel yab, ni pɔ̄ɔ̄ m-cee kudaau ki jítiǹ Kuusi yabaaa? M nyántì-ni Eejipiti tiŋkin, ama ki nyántì Fiiliistii yab Kafitoor tiŋkin, ní ki nyántì Aram yab Kiiri tiŋkin.»

⁸ Ti-Dindaan Unimbɔti nimbil cɔ́ Isirayeel beel din fōō dibɔkpil nee pu. U lī yii: «M làá kúntí-dì kitiŋ pu. Ama maa làá nàan̄ Jaakɔb naantiibi kɔkɔ.

⁹ Di sá yii m làá tīī mara ní bí jáká Isirayeel timbundi atimbun ŋin kíǹee kɔkɔ poon, kii bi nín dù kidicaai kí jáká tiwan pu, báà kitaŋkpalii kaa lùntī kí lítée.

¹⁰ M-nibul kansikin bikpitiŋaliibi làá kpú kujaaun, bíǹ bin lì yii: <Nnaabu ŋubɔ kpá kí làá dāan̄, u làá sútiń kí pìlīń-ti!>»

Nnaabu yaa láa jítèe bɔti

¹¹ «Ŋwiin gbantee m làá dāá yòon̄ Daafiidi bìŋ́ku kun bíi lítée kí yóoń, ní kí ŋéeb́ ku-digbuŋweeŋyi kɔkɔ, kí mā ku-guŋŋi ŋin lítì ki dɔ̄ee, dí fàtīí gítí di nín nìn bí puee.

¹² Án nín làá ŋá pu Isirayeel yab ń dāá fàtīí fōō Eedoom yab cee nì atimbun ŋin kíǹee kɔkɔ yab cee ntimu mun di nìn sá man yɔmuee. Man ni-Dindaan di sòon̄, ní ki làá yàntī án ŋá míǹ!»

¹³ Ti-Dindaan gíti lī yii: «Ŋwiin dòoń bi làá dāá cā tikpaajin tikpil án nīn dɔ̄ kí tin sāā ŋyunti ŋun bi làá kpɔ̀ tipɔnee. Míǹ mbaantiim, bi làá dāá kìtī fiinyi biliŋ án nīn dɔ̄ kí tin sāā ŋyunti ŋun ní bi làá bɔ̄l̀ bileeyee. Niinee ndapɔm dāa pùub̀ ajoon pu ní ki còol̀ ŋgbantamu kɔkɔ pu.

¹⁴ M làá fàtīí gíiǹní m-nibul Isirayeel yab bi-tiŋkin bí fàtīí mā bi-timmu mun wīil̀ee kí kàl̄. Bi làá dāá cóoń fiinyi sufii kí nyɔ̀ i-daam. Bi làá kpɔ̀ tikuŋfaal kpaaŋŋi kí dāá ká kí jī.

¹⁵ M làá dāá fàtīí gíiǹ m-nibul kí kàan̄ bi-tiŋki pu. Baa làá ti jà-bi kitiŋ kin m tīī-bee pu jaanjaan. Man ni-Dindaan ni-Nimbɔtiu di lī míǹ!»