Amos 6 - UNIMBƆTI NYƆƆBUNDI GBƆŊKU

Bin dàkafī yii tiba kaa ŋūǹ kí bàń-bee

¹ Mbusu dɔ̄ ki cí nimbi bin kóò Siiyɔn jool pu ni-pɔbiliŋ sɔ̀m̀ee, nimbi bin kóò Samaarii jool pu kaa fàŋkí yii tiba ŋūǹ kí ŋá-nee. Binib lì yii atimbun kɔkɔ kansikinee, nimbi di līī, ní ni-nabiyaamu Isirayeel yab kpèé ni-pú!

² Ní cùmaan Kalnee tiŋkin kí kpèè! Niinee ní cù Amaati kitiŋkpaaŋŋin kí kpèè. Míǹ boonee, ní sìntī Gaati tiŋkin Fiiliistii yab cee. Ni sɔ́ǹ ntimu gbantaaa? Ni-tiŋki wāā ki jítiǹ bi-tiŋkaaa?

³ Ni nín bíi téekí mbusu wiiŋŋu ń taa bàń kɔŋkɔnnee, ni bíi yíì tipɔmbɔti wiiŋŋu ń bàń malaa dee.

⁴ Ni dɔ̄ idoomɔnti in pɔ̄ɔ̄ kudaauee pu ki dɔ̄ ni-lambammu pu ki ŋmóò ni-picaŋkpunti pibiliŋ nì ni-nacaŋkpunti nabiliŋ nanti.

⁵ Ni bɔ̀ɔ́ kubeeu ki gà ilan. Ni mɔ́ɔ́ tiwambɔɔkaal tipɔn kii Daafiidee.

⁶ Ni nyù ndamam asambikpaan poon, ki ŋmìtī ikpafi in sɔ́fèe, ama naa bí ki sūǹ mbusu un dòoń Jooseefi yab puee pu.

⁷ An pu ní kɔŋkɔnnee, nimbi di làá nīn sá bipeepeekaabi bin bi làá cúú kí cùnnì kuyuŋuee. Ní nimbi biwutijoodambi kitil nee ń kúntí.

Samaarii tiŋki làá wīī

⁸ Ti-Dindaan Unimbɔti, Unimbɔti Mpɔŋkɔdaan pūtì ki lī yii: «Isirayeel yab lambil kóò ki dóotí-mi, m ná bi-dimɔntiŋ. An puee m làá dū Samaarii tiŋki kí ŋá ki-nannanliibi ŋaan.»

⁹ Binib saalaa di yaa kíǹ kudicaŋu poon, bi làá kpú.

¹⁰ Bi-nabiki làá nyāntí bi-wuntee kí wà ŋŋmi. Ubɔ yaa kíǹ ki bí poon diikunee, kinabikee làá dāá bàlifì udaan yii: «Ubɔ gíti bí ki kútì a-pu niinaaa?» Ní úǹ ń dāá kíí yii: «Aayee, ubɔ gíti kpá.» Ní kinabikee ń dāá lì yii: «Ŋmīĺ fɔ́ŋfɔŋ! Ubɔ ń taa ti pútí ti-Dindaan yindi!»

¹¹ Di sá yii ti-Dindaan yaa pée tīī maree, adikpaan wùtī ní kí lítí, ní ndiwaamu ń fáá iwèeń.

Dijajil mili pu fám

¹² Itaamu sáń ataŋkpajal puɔɔɔ? Inaa kù ataŋkpajal puɔɔɔ? Kin ba ŋá ní ni dū ibaamɔn ki kpántì tilool, ki dū tin bí deedeeyee ki kpántì ntuntun?

¹³ Ni bí ki fàal̀ ni nín jáń ki fōō Loo-Deebaar tiŋki, an dàkà yii kitiŋ kin kaa bí tibanee pu. Ni bí ki lì yii: «Timbi ti-ba pɔŋŋu pu ní ti jáń ki fōō Kaarnayiim tiŋki, an dàkà yii Iyin ili tiŋki.»

¹⁴ Ama man ni-Dindaan Unimbɔti Mpɔŋkɔdaan nín lī puee sèé: «Isirayeel yab, m làá yàntī ditimbundi diba ń jáǹ-ni ní kí nà-ni, kí yòon̄ Leeboo-Amaati tiŋki ŋgan pú kí tin cáá bà Arabaa buŋŋu ŋgiil pú.»