Amos 5 - UNIMBƆTI NYƆƆBUNDI GBƆŊKU

Ti-Dindaan sūǹ Isirayeel yab pu

¹ Isirayeel yab, pīlifìmaan tibɔti nee, ŋkpiisilan ŋun m làá gāā ni-pu nee.

² Isirayeel bí kii usapɔɔn un kpíì ki dɔ̄ gbàlaayee ní. U lítì ki dɔ̄ ki gíti kpá kí yīkì. U pée gbíntì ki dɔ̄ u-tiŋki pu ní báà ubɔ kaa bí kí yòon̄-u!

³ Di sá yii ti-Dindaan Unimbɔti nín sòon̄ Isirayeel nibul pu puee sèé: «Kitiŋ kiba yaa tú bijanjaliibi kutuku, bijanjaliibi dilaataal di làá kínní. Kitimbilii kiba yaa tú bijanjaliibi dilaataal, bijanjaliibi saalaa di làá kínní.»

Unil yaa kaa kpántì u-ba, u kpá kí ká difiil

⁴ Ti-Dindaan nín sòon̄ nì Isirayeel yab puee sèé: «Ni yaa là kí nīn bi dimaŋfalinee, nyàab̀maan-mi.

⁵ Ama ní taa nyàab̀-mi Beeteel tiŋkin, kí taa cù Giilgaal tiŋkin, ni-taal ń taa tāā Beerseeba tiŋkin. Giilgaal yab kɔkɔ làá búntí kuyuŋu, ní Beeteel, Unimbɔti diiku ń kpántí kuwaadii.»

⁶ Ni yaa là kí nīn bí dimaŋfalinee, nyàab̀maan ti-Dindaan. An yaa kaa sá míǹ, u làá dāá jēetí Jooseefi yab pu kii ŋŋmee. U làá wà ti-kɔkɔ Beeteel tiŋkin, ní báà uniseen dāa kpá kí gbíntí-ŋu.

⁷ Ni yāntì ibaamɔn túŋkì kátí kati, ní kaa dū tin bí deedeeyee ki yíiń tiba!

⁸ Úǹ di náań kuŋmalbicukuu kɔkɔ. Úǹ di yàntī dibɔmbɔndi ń kpántí ntaafaawalifi, ki yàntī ŋwiimpu kpántí kunyeeu. Úǹ di yíì tiŋku nyim ní ki cáá-mì ki yàantí kitiŋ pu. Úǹ ní bi yíì yii <Ti-Dindaan>.

⁹ Úǹ di yàntī bí nàan̄ upɔɔl, ní kí nàan̄ kitiŋ kin bi máń digundi ki túee.

¹⁰ Bi ná un sòoǹ tibɔti ti-puee, kaa là bi-nimbil ń wāl̀ bin sòoǹ ibaamɔnee.

¹¹ Ni mùul̄ binandambi, ki fòol̄ bi-kpaajinti dijandi. An puee naa làá kɔ́ adinyaan ŋin ni máń ki yóoǹee poon, kaa làá nyɔ̀ ni-fiinyi sufimɔntiŋ ŋin ni kùn̄ee damam.

¹² M nyí ni-kpitii nín wīikí tikpil puee, nì ni-yìntitam nín gíti lákatì mara pu puee. Ni sá deedeedambi nannanliibi, ki fòol̄ tiwampɔkaal tin bi cáa ŋēeb̀ ni-nyɔmmuee. Ni pìintí nsan ibɔsoon laŋki bí taa sòoǹ biwɔfib bɔti.

¹³ Ŋyunti gbanti sá mbusu yuntiŋu ní, an pu ní un sá uciŋfitee kíǹ ki ŋmí.

¹⁴ Ní nyàab̀maan kí nīn ŋáań tin ŋān̄ee, kí fàtī ni-boon kí tīī ikpiti. Niinee ni làá nīn bí dimaŋfalin, ní ti-Dindaan Unimbɔti Mpɔŋkɔdaan ń lafun nín̄ bí ni-cee, kii nimbi ni-ba nín lì puee.

¹⁵ Nín̄ námaan tikpitil, kí nīn néeń tiŋan. Ní nīn sòoǹ tibɔti ti-pu ibɔsoon laŋki. An yaa yíì, ti-Dindaan Unimbɔti Mpɔŋkɔdaan làá sɔ̄ nimbi Jooseefi yab bin kíǹ nee saai.

¹⁶ An puee ti-Dindaan Unimbɔti Mpɔŋkɔdaan, ti-Dindaan nín lī puee sèé: «Bi làá dāá nīn gbìl̀ nsiim pu imɔŋkijaa kɔkɔ pu, dituweel làá dāá nīn gà adan kɔkɔ pu. Bi làá dāá bòotīń bikpaabi kusaau bí dāan̄ dinisibil, ní kí yíiń bin gà ikpiisilanee bí dāá gāā.

¹⁷ M yaa láa jítì ni-kansikinee, binib làá dāá nīn gà ikpiisilan ni-fiinyi sufii satin.» Ti-Dindaan di lī míǹ.

Ti-Dindaan wiiŋŋu dal

¹⁸ Mbusu dɔ̄ ki cí bin kā ki cí ti-Dindaan wiiŋŋuee! Ti-Dindaan wiiŋŋu gbanti làá dāá nīn sá ba ní ki tīī-ni ní? Ŋu làá dāá nīn sá dibɔmbɔndi wiiŋŋu ní, kaa sá ŋwalifi wiiŋŋu.

¹⁹ Ŋu sá kii unil nín sáń gbikinti kí cùú tū digbiŋgbil nsanni puee ní. Àá u nín kùǹ u-dumpu ki dū u-ŋal ki nyīī digundi ní ukoobu jú-uee ní.

²⁰ Ti-Dindaan wiiŋŋu dāa sá ŋwalifi níii? Aayee, ŋu dāa sá dibɔmbɔndi ní, ŋu dāa bɔ̀ǹ ní kpìmm, ŋuaa dāa wāĺ báà fiii.

Unimbɔti kaa là Isirayeel yab jaamii

²¹ M ná ni-jiŋaalib, maa pée là kí wāl̀-bi. Ni-kpafiŋ kóò m-poon ki lèekī baadakam.

²² Bisaraawɔkaabi nì tijimpin saraabi bin ni ŋáań ki tìì-mee kaa fáatiǹ-mi. Ni-waŋkuti tin bí màlmal ni cáa ŋáań-mi saraayee, maa fàtīi kpèé gba.

²³ Ní kpáaǹ ni-laŋyi wookuee kí nyā niin. Maa ti là kí gbìl̄ ni-bati pu.

²⁴ Ama ní yàntī ibaamɔn ń nīn pùub̀ kii nnyimee, ní tin bí deedeeyee ń nīn bí kii mbun ŋun kaa fóotée.

²⁵ «Isirayeel yab, ni nín nìn ŋá abin imuŋku ili kuteeunee, ni nìn ŋá tiwaŋkuti nì tijimpin saraabi ki tīī-maaa?

²⁶ Ama díǹ pu nee, ni tūntí awaa ŋin nimbi ni-ba kpítèe, din ni yíì Siikuuti di sá ni-bɔtiu nì ni-nimbɔtiuee, nì din ni yíì Kiiyuuni di sá ni-ŋmalbijau nì ni-nimbɔtiuee.

²⁷ An puee m làá cáá-ni kí cùnnì kuyuŋu laakin dátì ki jítiǹ Damaasee.» Ti-Dindaan di lī míǹ. U-yindi di sá Unimbɔti Mpɔŋkɔdaan.