Amos 3 - UNIMBƆTI NYƆƆBUNDI GBƆŊKU

Unimbɔti làá dáaĺ u-nibul tafal

¹ Isirayeel yab, nimbi bin di sá kudicaŋu kun ti-Dindaan nyántìń Eejipiti tiŋkinee, pīlifìmaan tin ti-Dindaan cáá kí sòoǹ ni-puee.

² «Kitiŋ pu dicaŋŋi kɔkɔ poonee, nimbi baba ní m lēē ki kpèé. An pu ní m làá dáaĺ ni-tafal ikpiti in kɔkɔ ni ŋáaǹee pu.»

Unimbɔti yaa sòon̄ee, u-bɔnaatiliu kaa ŋūǹ kí nīn ŋmí

³ Binib bili cá nsan kaa kpáfì ki sòon̄ ki bɔ́ntàaa?

⁴ Gbikinti yaa kaa ká upeel kí cúú, u làá nīn sūǹ kupɔɔun fámaaa? Kigbikintibiki yaa kaa cúú tiba, kì làá nīn bí ki-kɔŋkooŋŋun ki mùuǹaaa?

⁵ Kutaliŋŋu sàtī unoon fám baa dū tiba kí píĺaaa? Kutaliŋŋu mun tòó fám kaa pée sàl̄ báà tibaaa?

⁶ Bi búǹ dibaŋwul kitiŋin tifaandi kaa cútí binibaaa? Dinimbinaamandi kóòń kitiŋin kaa nyánní ti-Dindaan ceeee?

⁷ Míǹ mbaantiim ní ti-Dindaan kaa ŋáań tiba kaa lēē ki dàkā u-tɔntɔnliibi bibɔnaatiliibi.

⁸ Gbikinti yaa téeńee, ŋma sá-u ní kaa làá fàŋkì? Ti-Dindaan Unimbɔti yaa sòon̄ee, ŋma làá yíí kaa làá nàatī?

Samaarii bɔsooŋyi

⁹ Asidoodi tiŋki beeciŋŋi yilpu nì Eejipiti tiŋki beeciŋŋi yilpuee, ní bāakìmaan kí lì yii: «Kóoǹ kí kpāfìmaan Samaarii jooŋŋi pu kí kpèè fìkil fikil un bí kitiŋ gbantinee, nì tipɔmbɔti tin ŋáań ki-nee!»

¹⁰ Ti-Dindaan di lī yii: «Samaarii yab kaa nyí kí tɔ̄ ditummɔntiil. Tiwaŋfìkikaal nì tinaayuwan ní bi kùl̄ ki gbéeǹ bi-dimɔntiŋ poon.»

¹¹ An pu ní ti-Dindaan Unimbɔti sòon̄ sii Samaarii tiŋki pu ki lī yii: «Unannanli làá dāá màntīí tū a-tiŋki, kí gbākal̀ a-pɔŋŋu ní kí fūkul̀ a-dimɔntiŋ wanti.»

Difiil nín bí la dee?

¹² Ti-Dindaan nín lī puee sèé: «Gbikinti yaa cúú upiiyee, upikpaal dátí ayaka ali nì kitafakatii ní kí fōō u-nyɔkɔn. Míǹ mbaantiim ní bi làá dāá fīī Isirayeel yab bin kóò Samaarii tiŋkin, ki dɔ̄ dijal pu àá ndoo puee.»

Ti-Dindaan kpáafì Isirayeel yab

¹³ Ti-Dindaan Unimbɔti, Unimbɔti Mpɔŋkɔdaan nín sòon̄ puee sèé: «Ní pīlifìmaan kí dū tibɔkpaafikaal nee kí nàatī Jaakɔb naantiibi.

¹⁴ Ŋwiin ŋun m làá dāá dáaĺ Isirayeel yab tafal bi-kpitii puee, m làá dāá gbá kí wìil̀ isaraafan in bí Beeteel tiŋkinee kɔkɔ. M làá dāá gbá kí kéetí nsaraafan yiŋyi ní í nīn kíǹ ki dɔ̄ kitiŋ.

¹⁵ M làá dāá wìil̀ bi-dikpaaŋŋi, nì bi-diwaammu. M làá dāá wìil̀ adiin ŋin pu bi nákáǹ akuntinyin ki nyáantì-ŋee, adikpaan kɔkɔ làá dāá lítí.» Ti-Dindaan di lī míǹ!