Зәбүр 83 - Изге Яҙма

¹ Йырсылар етәксеһенә: «Гиттиҫ» көйөнә. Ҡорах улдарының мәҙхиәһе.

² Эй күк ғәскәрҙәре Раббыһы, Ниндәй ғәзиз Һинең торлаҡтарың!

³ Күңелем ихаталарыңа инер мәлде ашҡынып көтә, Йәнем-тәнем, бар булмышым һөйөнөстән Тере Алла хозурында йырлай.

⁴ Эй күк ғәскәрҙәре Раббыһы, Батшам, Аллам, Ҡорбан усаҡтарыңдың янында Хатта турғай ҙа үҙенә урын тапҡан, Ҡарлуғас балаларына оя ҡорған.

⁵ Ниндәй бәхетле йортоңда йәшәгәндәр; Улар мәңге Һине маҡтар! Села

⁶ Ниндәй бәхетле Һинән көс-ҡеүәт алған, Күңеленән Йортоңа сәйәхәт ҡылыуҙы ниәт иткән кеше!

⁷ Ҡоро үҙән буйлап үткән саҡта Унда инештәр асырҙар, Ямғырҙар уны бәрәкәт менән һуғарыр.

⁸ Был кешеләр атлаған һайын нығыраҡ ҡеүәт алыр, Сионға, Алла хозурына сығырҙар.

⁹ Йә Раббы, күк ғәскәрҙәре Аллаһы, тыңла, Доғама ҡолаҡ һал, эй Яҡуп Аллаһы! Села

¹⁰ Эй Алла, беҙҙең ҡалҡаныбыҙ, Үҙеңдең мәсихеңдең йөҙөнә күҙ һал!

¹¹ Һинең ишек алдыңда үткәргән бер көнөм Башҡа ерҙә уҙғарған мең көндән яҡшыраҡ; Алла йортоноң тупһаһында торғаным Залим сатыры түрендә йәшәүҙән артығыраҡ.

¹² Сөнки Раббы Алла – ҡояш һәм ҡалҡан Ул; Миһырбанлыҡ күрһәтеүсе, дан-шөһрәт биреүсе; Тоғро юлдағыларҙан бар ниғмәттәрен йәлләмәүсе.

¹³ Эй күк ғәскәрҙәре Раббыһы, Ниндәй бәхетле Һиңә өмөт бағлаусы!