Зәбүр 67 - Изге Яҙма

¹ Йырсылар етәксеһенә: Дауыттың мәҙхиәһе. Йыр.

² Ҡалҡһын Алла, таралһын дошмандары, Хозурынан ҡасһын Уға асыу тотҡандар!

³ Яуыздарҙы төтөн һымаҡ тарат; Ут алдында ирегән балауыҙ һымаҡ Әйҙә улар Алла ҡаршыһында юҡ булһын!

⁴ Ә тәҡүәләр ҡыуанһын, Байрам итһендәр Алланың хозурында, Шатланып күңел асһындар.

⁵ Аллаға дан йырлағыҙ, исеменә мәҙхиәләр көйләгеҙ, Болоттар өҫтөндә гиҙеүсене ҙурлағыҙ. Уның исеме – Раббы, хозурында байрам итегеҙ!

⁶ Мөҡәддәс торлағындағы Алла – Етемдәрҙең атаһы, тол ҡатындарҙың яҡлаусыһы.

⁷ Алла яңғыҙаҡтарға йорт-ғаилә бирер, Тотҡондарҙы именлеккә алып сығыр, Фетнәселәр ҡоро сүлдә ҡала бирер.

⁸ Эй Алла, Һин халҡың алдынан килгәндә, Сүллек аша уҙғаныңда. Села

⁹ Ер сайҡалды, күктән ямғыр ҡойҙо Синай Аллаһының ҡаршыһында, Алла, Исраил Аллаһы хозурында.

¹⁰ Мул ямғырыңды яуҙырҙың, Алла, Йәнләндерҙең талсыҡҡан биләмәңде.

¹¹ Халҡың унда төйәкләнде, Үҙеңдең игелегең арҡаһында Һин уны фәҡирҙәр өсөн әҙерләнең.

¹² Әмер бирҙе Раббы, Бер өйөр ҡатын һөйөнсө таратты:

¹³ «Ҡаса, ҡаса батшалар! Ғәскәрҙәре менән ҡасалар!» Ҡатындар өйҙәрендә таланған мал бүлә:

¹⁴ Ҡанаттары көмөш менән ҡапланған, Ҡаурыйҙары саф алтынға мансылған күгәрсен һындарын бүлешә. Ә һеҙ һарыҡ аҙбарҙары араһында ятаһығыҙ!

¹⁵ Сикһеҙ ҡөҙрәт Эйәһе батшаларҙы туҙҙырғанда, Салмон тауы өҫтөнә ҡар яуҙы.

¹⁶ Эй Алланың тауы, Башан тауы! Үркәстәре бейек Башан тауы!

¹⁷ Ниңә әле һин үркәстәре бейек тау – Алла Үҙенә төйәк итеп һайлаған тауға – Көнсөллөк менән ҡарайһың? Хаҡтыр, Раббы унда мәңге йәшәйәсәк.

¹⁸ Алланың яу арбалары бик күп, Меңәрләгән, һанһыҙ-хисапһыҙ. Раббы Хаким улар менән бергә Синайҙан мөҡәддәс торлағына килде.

¹⁹ Раббы Алла, бейеклеккә күтәрелдең, Әсирҙәрҙе артыңдан эйәрттең. Һин барлыҡ кешеләрҙән, Хатта фетнәселәрҙән дә яһаҡ алдың. Хаҡтыр, Раббы унда йәшәй!

²⁰ Көндән көнгә йөгөбөҙҙө йөкмәп барған бөйөк Хакимыбыҙ, Ҡотҡарыусыбыҙ Алла мөбәрәк булһын! Села

²¹ Беҙҙең Аллабыҙ – ҡотҡарыу алып килгән Алла. Үлемдән ҡотҡарыу бары Хакимыбыҙ Раббының ихтыярында.

²² Алла дошмандарының башын, Гонаһ эсендә йәшәгәндәрҙең ялбыр башын яра һуғыр.

²³ Раббы Хаким былай тине: «Уларҙы Башандан кире килтерермен, Диңгеҙ төптәренән сығарырмын.

²⁴ Аяғыңды дошмандар ҡанына батырырһың, Эттәрең дә дошман ҡанын ялап өлөш алһын».

²⁵ Эй Аллам, Һинең килеүең, Аллам Батшамдың мөҡәддәс торлағына Тантаналы аяҡ баҫыуы күҙ алдыбыҙҙа:

²⁶ Алда йырсылар, артта көй уйнаусылар, Уртала дөңгөр ҡағыусы ҡыҙҙар килә.

²⁷ «Эй Исраил нәҫелдәре, йыйындарығыҙҙа Аллағыҙ Раббыға шөкөрана яуҙырығыҙ».

²⁸ Уларҙың башында – иң бәләкәй Бинйәмин ырыуы, Артынса күп һанлы Йәһүҙә башлыҡтары, Зевулун һәм Нафтали етәкселәре килә.

²⁹ Эй Алла, ҡөҙрәтеңде, Беҙҙең өсөн ҡулланған ҡеүәтеңде күрһәт.

³⁰ Йәрүсәлимдәге ҡорамың хаҡына Һиңә батшалар бүләктәр алып килер.

³¹ Ҡамышлыҡ йыртҡысын – Мысырҙы, Үгеҙ һымаҡ ҡеүәтле сит халыҡтарҙы, Көмөш өсөн бер-береһен тапағандарҙы буйһондор, Һуғыш теләгән халыҡтарҙы пыран-заран килтер!

³² Мысырҙан илселәр килер, Куш халҡы Аллаға табан ҡул һонор.

³³ Эй ер йөҙөндәге батшалыҡтар, Аллаға дан йырлағыҙ, Бөйөк Хакимыбыҙға мәҙхиәләр уҡығыҙ! Села

³⁴ Ул, күктәрҙе, боронғо күктәрҙе иңләп, Үҙенең ҡеүәтле тауышын яңғырата!

³⁵ Алланың ҡөҙрәтен танығыҙ; Уның ғиззәте Исраилдың өҫтөндә, Көсө болоттарҙан аша.

³⁶ Дәһшәтле Һин, Алла, Изге торлағыңда! Исраил Аллаһы Үҙ халҡына ҡөҙрәт, ҡеүәт бирә. Алла мөбәрәк булһын!