Зәбүр 64 - Изге Яҙма

¹ Йырсылар етәксеһенә: Дауыттың мәҙхиәһе. Йыр.

² Эй Алла, Сионда яңғыраған маҡтау – Һиңә; Һиңә әйтелгән нәҙерҙәр үтәләсәк.

³ Һин доғаларҙы ишетәһең, Бөтә кеше хозурыңа килер.

⁴ Мин гонаһҡа баттым, Әммә Һин беҙҙе ғәйептәребеҙҙән пакларһың.

⁵ Ниндәй бәхетле Һин һайлап алып, Үҙеңә яҡынайтҡан, Өйөңдөң ишек алдында йәшәткән кеше! Йортоңдоң, мөҡәддәс ҡорамыңдың, Ниғмәттәрен беҙгә насип итһәң ине!

⁶ Эй Алла, беҙҙең ҡотҡарыусыбыҙ! Тетрәткес ғәмәлдәр ҡылып, Һин ғәҙеллек менән яуапларһың беҙгә. Ер йөҙөнөң барлыҡ тарафының, Алыҫ диңгеҙ аръяғындағы илдәрҙең өмөтөһөң!

⁷ Ҡөҙрәт менән билен быуған, Көсө менән тауҙар ҡорған;

⁸ Диңгеҙҙәр ҡоторонғанын, Тулҡындарҙың шаулағанын, Халыҡтарҙың ғауғаларын Баҫылдырған Һинһең.

⁹ Ер йөҙөнөң сиктәрендә йәшәгәндәр, Илаһи билдәләреңде күреп, ҡурҡыуға ҡалыр. Көнсығыштан көнбайышҡа тиклем бар кешеләр Һиңә ҡыуаныслы йырҙар йырлар.

¹⁰ Һин тупраҡты хәстәрләйһең, Уның сарсауын баҫаһың, бәрәкәтен арттыраһың. Эй Алла, йылғаларың һыу менән тулы, Кешеләргә иген үҫтерәһең, Сөнки Һин тупраҡты шулай әҙерләйһең:

¹¹ Бураҙналарҙы туйғансы һуғараһың, Араларын тырмап тигеҙләйһең. Ямғыр һыуҙары менән ерҙе йомшартып, Үҫентеләргә фатихаңды бирәһең.

¹² Һин мул уңыш менән йылды теүәлләйһең, Арбаларың үткән юлдан муллыҡ аға,

¹³ Сүллектәге көтөүлектәр йәшелләнә, Ҡалҡыулыҡтар шатлыҡҡа сорнала,

¹⁴ Болондар көтөүҙәр менән сыбарлана, Үҙәндәр иген менән ҡаплана, Һәр тарафта – шатлыҡ ауаздары, йырҙар.