Зәбүр 60 - Изге Яҙма

¹ Йырсылар етәксеһенә: Ҡыллы уйын ҡоралдары оҙатыуында. Дауыттың мәҙхиәһе.

² Эй Алла, ялбарыуымды ишет, Доғама минең ҡолаҡ һал!

³ Төшөнкөлөк күңелемде алды, Ер сигенән саҡырамын Һине. Артыла алмаҫлыҡ ҡаяға алып мен мине,

⁴ Сөнки Һин – минең ышығым, Дошманға ҡаршы ҡеүәтле манарамһың.

⁵ Сатырыңда мәңге йәшәйемсе, Ҡанатың аҫтына һыйынайым. Села

⁶ Һин, эй Алла, нәҙерҙәремде ишеттең, Исемеңдән ҡурҡҡандарға тәғәйен өлөштө миңә бирҙең.

⁷ Батшаның ғүмеренә Һин көндәр өҫтә, Тормошо быуындан-быуынға дауам итһен!

⁸ Алла хозурында мәңге тәхеттә ултырһын; Уны мөхәббәтең менән тоғролоғоң һаҡлаһын!

⁹ Мин иһә исемеңә мәңгелек дан йырлармын, Көндән көнгә нәҙерҙәремде үтәрмен.