Зәбүр 59 - Изге Яҙма

¹ Йырсылар етәксеһенә: «Килешеү лилиәһе» көйөнә. Дауыттың шиғыры, нәсихәт өсөн.

² Дауыттың Арам-Наһараим һәм Арам-Сова кешеләре менән бәрелешкән һәм Йоавтың кире боролоп Тоҙло үҙәндә ун ике мең Эдом яугирен үлтереү уңайы менән сығарылған.

³ Эй Алла, ташланың беҙҙе, тар-мар иттең, Беҙгә асыуландың! Инде беҙҙе элекке хәлебеҙгә кире ҡайтар!

⁴ Ерҙе дер һелкеттең, ярғысланың; Ярыҡтарын бөтәштер, сөнки ул һаман сайҡала.

⁵ Үҙ халҡыңды ҡаты һынауҙарға дусар иттең, Илерткес шарап эсерҙең беҙгә.

⁶ Үҙеңдән ҡурҡҡандар осҡан уҡтарҙан Йәшенеп ҡалһындар тиеп, Ишара өсөн байрағыңды күтәрҙең. Села

⁷ Һөйөклөләрең ҡотолһон тиһәң, Уң ҡулың менән йолоп ал беҙҙе, Беҙгә яуап ҡайтар!

⁸ Алла Үҙенең мөҡәддәс торлағында былай тине: «Тантана менән Шәхәмде бүлгеләрмен, Суккоҫ үҙәнен үлсәрмен.

⁹ Ғилғәд – Минеке, Менашше ла Минеке, Әфраим – башыма кейгән тимер торҡам, Йәһүҙә – хакимлыҡ таяғым,

¹⁰ Моав – йыуыныр ялғашым, Эдомға ҡатамды ырғытырмын, Пелешеҫ ерендә еңеү ораным яңғырар».

¹¹ Кем мине нығытмалы ҡалаға алып инер? Кем миңә Эдомға тиклем юл күрһәтер?

¹² Эй Алла, Һин Үҙең беҙҙе ташламаныңмы ни? Ғәскәрҙәребеҙ башында яу сапмайһың.

¹³ Дошманды еңергә ярҙам итсе беҙгә, Кешенең ярҙамынан файҙа юҡ.

¹⁴ Алла менән ҡеүәтебеҙ артыр, Ул дошмандарыбыҙҙы тапап ташлар.