Зәбүр 50 - Изге Яҙма

¹ Йырсылар етәксеһенә: Дауыттың мәҙхиәһе.

² Дауыт Баҫ-Шевағ менән булғандан һуң, уға пәйғәмбәр Наҫан килеп киткәс.

³ Мөхәббәтең хаҡына, эй Алла, ҡыҙған мине, Сикһеҙ рәхим-шәфҡәтеңә күрә яҙыҡ эштәремде юйып ташла.

⁴ Ғәйебемде ныҡлап йыуып ағарт, Гонаһымдан мине, зинһар, таҙарт.

⁵ Мин үҙемдең боҙоҡ эштәремде беләм, Гонаһтарым күҙем алдымда гелән.

⁶ Һинең алда, бары Һинең алда гонаһ ҡылдым, Һинең күҙеңдә яуызлыҡ булғанды эшләнем. Ғәйепләү һүҙҙәрең хаҡлы, Хөкөмөңдә Һин ғәҙелһең.

⁷ Мин тыуғандан алып ғәйеплемен, Әсәм ҡарынынан гонаһлымын.

⁸ Һин иһә йөрәктең тоғролоғон теләйһең, Булмышымды зирәклеккә өйрәт.

⁹ Мине майағас менән пакла, таҙа булайым; Мине йыу, ҡарҙан да аҡ булайым.

¹⁰ Ишеттер шатлыҡ-ҡыуаныс ауаздарын, Һин иҙгән һөйәктәрем рәхәтлек тойһон.

¹¹ Йөҙөңдө ситкә бор, гонаһтарымды күрмә; Барса ғәйебемде юйып ташла.

¹² Эй Алла, булдыр миндә саф йөрәк, Булмышымда ҡаҡшамаҫлыҡ рух яңырт.

¹³ Мине алдыңдан ситкә тибәрмә, Үҙеңдең изге Рухыңдан мәхрүм итмә.

¹⁴ Ҡотҡарыуыңдың шатлығын миңә ҡайтар, Һине тыңларға ашҡынып торған рух биреп, Миңә таяныс бул.

¹⁵ Шунан мин боҙоҡтарға юлыңды өйрәтермен, Гонаһлылар Һиңә кире ҡайтыр.

¹⁶ Ҡотҡар мине ҡан түгеүҙән, эй Алла, Һәм телем ғәҙеллегеңде данлар, Эй мине ҡотҡарыусы Алла!

¹⁷ Эй бөйөк Хаким, ауыҙымды ас, Телем Һиңә маҡтау һүҙҙәре һөйләр.

¹⁸ Ҡорбан салыр инем – теләмәйһең, Тотош яндырыу ҡорбандарын хушһынмайһың.

¹⁹ Алла ҡабул итә торған ҡорбан – һынған рух ул, Ярылған һәм селпәрәмә килгән йөрәкте кире ҡаҡмаҫһың, эй Алла!

²⁰ Мәрхәмәтле бул, Сионға яҡшылыҡ ҡыл; Йәрүсәлим диуарҙарын торғоҙ.

²¹ Шул саҡ дөрөҫ килтерелгән ҡорбандарҙан, Тотош яндырыу һәм яндырыу ҡорбандарынан хушланырһың. Шул саҡ ҡорбан усағыңда үгеҙҙәр ҡорбан ителер.