Зәбүр 5 - Изге Яҙма

¹ Йырсылар етәксеһенә: тынлы уйын ҡоралдары оҙатыуында. Дауыттың мәҙхиәһе.

² Әйткәндәремә ҡолаҡ һал, Раббы, Аһ-зарымды ишет!

³ Ярҙам ялбарыуымды тыңла, Батшам, Аллам, Мин Һиңә доғамды оҙатам.

⁴ Йә Раббы! Таң һайын ишетәһең ауазымды. Иртә һайын Һиңә ялбарам, Көтөп ҡалам яуабыңды.

⁵ Һин яуызлыҡтан хушһынған Алла түгел, Һинең яныңда залим төйәкләнә алмаҫ.

⁶ Хозурыңда тора алмаҫ тәкәбберҙәр, Бөтә яманлыҡ ҡылыусыларға нәфрәтлеһең,

⁷ Ялған һөйләгәндәрҙе Һин юҡ итәһең; Ҡан ҡойоусы һәм мәкерлеләр Раббы өсөн ерәнгес.

⁸ Ә мин тоғро мөхәббәтең муллығына күрә Йортоңа Һинең инермен. Мөҡәддәс ҡорамыңа йөҙ тотоп, Тетрәнеп сәждә ҡылырмын.

⁹ Йә Раббы, дошмандарым ни тиклем күп минең! Ғәҙеллегең менән мине Үҙеңдең һуҡмағыңдан етәклә, Юлымды тура ит.

¹⁰ Уларҙың ауыҙҙарында дөрөҫлөк юҡ; Эстәре тулы емергес уйҙар. Боғаҙҙары – асыҡ ҡәбер, Телдәрендә – ялағайлыҡ.

¹¹ Эй Аллам, уларҙы язала! Яман ниәттәре үҙҙәренең баштарына етһен. Ҡыу уларҙы һанһыҙ гонаһтары арҡаһында, Улар Һине кире ҡаҡты.

¹² Һиндә ышыҡ тапҡандар барыһы ҡыуанһындар, Һин уларҙы ҡурсалаған өсөн Әйҙә мәңге шатланып гөрләшһендәр! Исемеңде яратҡандар, әйҙә Һиндә һөйөнөс тапһындар.

¹³ Һин, Раббы, тоғроларҙы фатихалайһың; Миһырбаның менән ҡалҡандай уларҙы ышыҡлайһың.