Зәбүр 47 - Изге Яҙма

¹ Йыр. Ҡорах улдарының мәҙхиәһе.

² Раббы бөйөк! Аллабыҙ ҡалаһында, Үҙенең мөҡәддәс тауында Ул оло маҡтауға лайыҡ!

³ Гүзәл Сион тауы Сафон түбәләре һымаҡ; Ул бөтә донъяның шатлығы, Бөйөк батшаның ҡалаһы.

⁴ Уның нығытмаларында Алла Үҙен Ышаныслы һаҡлаусы итеп танытты.

⁵ Батшалар бер ергә йыйылдылар, Ҡалаға һөжүм итеү өсөн килделәр.

⁶ Әммә күргәндәренә хайран ҡалдылар, Ҡурҡыуға төшөп ҡастылар.

⁷ Тулғаҡ ғазабы тотҡан ҡатындай, Дәһшәт эсенә төштөләр.

⁸ Көнсығыштан көслө елдәр иҫеп, Таршиш караптарын емергәндәй, Һин уларҙы ҡырып ташланың.

⁹ Күк ғәскәрҙәре Раббыһы ҡалаһында, Аллабыҙҙың ҡалаһында, Нимәне ишеткән булһаҡ, шуны күрҙек, Раббы уны мәңгелеккә һалған. Села

¹⁰ Эй Алла, мөҡәддәс ҡорамыңда Һинең тоғро мөхәббәтең хаҡында уйлайбыҙ.

¹¹ Исемең кеүек, эй Алла, Һинең даның Ерҙең һәр тарафына таралһын. Хаҡлыҡ менән тулы Һинең уң ҡулың.

¹² Һинең хаҡ хөкөмдәреңә Сион тауы ҡыуанһын, Йәһүҙә ҡалалары шатланһын!

¹³ Сионды тирәләй әйләнеп сығығыҙ, Манараларын һанағыҙ,

¹⁴ Диуарҙарына иғтибар йүнәлтегеҙ, Ҡәлғәләренә диҡҡәт бирегеҙ! Быларҙы күреп, киләсәк быуындарға һөйләрһегеҙ:

¹⁵ «Ошо Алла – мәңгегә беҙҙең Аллабыҙ, Ғүмер баҡый беҙҙең юлбашсыбыҙ!»